ରିୟାଧ: ଦୁବାଇର ମ୍ୟୁଜିୟମ୍ ଅଫ୍ ଦ ଫ୍ୟୁଜର୍ କର୍ତ୍ତୃପକ୍ଷ ସେମାନଙ୍କ ସହ ଆଉ ଜଣେ ନୂଆ ମେମ୍ବରଙ୍କୁ ସାମିଲ କରିବାକୁ ଯାଉଛନ୍ତି। ତେବେ ନୂଆ ମେମ୍ବର ହେଉଛି ହ୍ୟୁମାନୋଏଡ୍ ରୋବୋ, ଯାହାର ନଁା ହେଉଛି ‘ଆମେକା’। ତେବେ ଏହି ହ୍ୟୁମାନୋଏଡ୍ ରୋବୋକୁ ପ୍ରଦର୍ଶନୀ ପାଇଁ ନୁହେଁ ବରଂ ମ୍ୟୁଜିୟମ୍ ବୁଲିବାକୁ ଆସୁଥିବା ଦର୍ଶକଙ୍କ ସେବାରେ ନିୟୋଜିତ କରାଯିବ। ସଂଗ୍ରହାଳୟକୁ ଆସୁଥିବା ଦର୍ଶକଙ୍କୁ ପ୍ରଥମେ ଆମେକା ଶୁଭେଚ୍ଛା ଜଣାଇବ। ଏହାପରେ ସେମାନଙ୍କୁ ଆମେକା ସଂଗ୍ରହାଳୟ ବୁଲି ଦେଖାଇବ। ଖାଲି ସେତିକି ନୁହେଁ, ଆମେକା ଦର୍ଶକଙ୍କ ସବୁ ପ୍ରଶ୍ନର ଉତ୍ତର ମଧ୍ୟ ଦେବାକୁ ସକ୍ଷମ ବୋଲି କୁହାଯାଉଛି। କଥା କହିବା ସାଙ୍ଗକୁ ଆମେକା ମୁହଁର ଅଙ୍ଗଭଙ୍ଗୀ ମଧ୍ୟ ବଦଳାଇ ପାରିବ। ଆମେକା ଏକାଧିକ ଭାଷାରେ କଥା କହିପାରିବ। ତେବେ ଏ ସବୁ ଫିଚର୍ସ ପାଇଁ ହ୍ୟୁମାନୋଏଡ୍ ରୋବୋକୁ ନେଇ ତର୍ଜମା ଜାରି ଥିବା କୁହାଯାଉଛି।
ତେବେ ଆମେକା ଫିଚର୍ସ ସମ୍ପର୍କରେ ଅବଗତ କରାଇବା ପାଇଁ ମ୍ୟୁଜିୟମ୍ ଅଫ୍ ଦ ଫ୍ୟୁଚର ଟୁଇଟରରେ ଏହି ହ୍ୟୁମାନୋଏଡ୍ ରୋବୋର ଭିଡିଓ ଶେୟାର କରିଛି। ଏଥିରେ ଆମେକା ମ୍ୟୁଜିୟମ୍ର ଜଣେ ମହିଳା କର୍ମଚାରୀଙ୍କୁ ଶୁଭେଚ୍ଛା ଜଣାଇବା ସହ ସଂଗ୍ରହାଳୟ ବିଷୟରେ କହୁଥିବା ଦେଖିବାକୁ ମିଳିଛି।
କର୍ନଓ୍ବାଲର ଫାର୍ମ ଇଞ୍ଜିନିୟର୍ଡ ଆର୍ଟସ ପକ୍ଷରୁ ଆମେକା ତିଆରି କରାଯାଇଛି। ହ୍ୟୁମାନୋଏଡ୍ ରୋବୋ ଭବିଷ୍ୟତରେ ରୋବୋଟିକ୍ସ ଟେକ୍ନୋଲୋଜି ପ୍ରତି ଉପଯୋଗୀ ସାବ୍ୟସ୍ତ ହେବ ବୋଲି ଇଞ୍ଜିନିୟର୍ଡ ଆର୍ଟସ ପକ୍ଷରୁ କୁହାଯାଇଛି। ଚଳିତବର୍ଷ ଫେବୃୟାରୀରେ ଦୁବାଇ ଶାସକ ଶେଖ୍ ମହମ୍ମଦ ବିନ୍ ରଶିଦ୍ଙ୍କ ଦ୍ୱାରା ଏହି ବିଶାଳ ସଂଗ୍ରହାଳୟ ଲୋକାର୍ପିତ କରାଯାଇଥିଲା। ୩୦ ହଜାର ସ୍କୋୟାର୍ମିଟର ପରିମିତ ସ୍ଥାନରେ ୭ ମହଲା ବିଶିଷ୍ଟ ମ୍ୟୁଜିୟମ୍ ଅଫ୍ ଦ ଫ୍ୟୁଚର ତିଆରି ହୋଇଛି।
