ମୁମ୍ବାଇ,୨୨ା୯: ଜାତୀୟ ମାନବାଧିକାର ଆୟୋଗ (ଏନଏଚଆରସି) ଅଭିନେତା ରଣବୀର କପୁର, ଓ୍ଵେବ ସିରିଜ ‘ଦି ବାଷ୍ଟାର୍ଡସ ଅଫ ବଲିଉଡ’ର ପ୍ରଯୋଜକ ଓ ନେଟଫ୍ଲିକ୍ସ ବିରୁଦ୍ଧରେ ଇଲେକ୍ଟ୍ରୋନିକ ସିଗାରେଟ ନିଷିଦ୍ଧ ଆଇନ, ୨୦୧୯ର ଉଲ୍ଲଂଘନ ଅଭିଯୋଗରେ ମାମଲା ରୁଜୁ କରିବାକୁ ମୁମ୍ବାଇ ପୋଲିସକୁ ନିର୍ଦ୍ଦେଶ ଦେଇଛନ୍ତି।
ଅଭିଯୋଗକାରୀ ବିନୟ ଜୋଶୀଙ୍କ ଅନୁଯାୟୀ, ସିରିଜର ଏକ ଦୃଶ୍ୟରେ ରଣବୀର କପୁର କୌଣସି ଚେତାବନୀ ବା ଡିସକ୍ଲେମର ବିନା ଇ-ସିଗାରେଟ ସେବନ କରୁଥିବା ଦେଖାଯାଇଛନ୍ତି। ଏହି ଘଟଣା ଇଲେକ୍ଟ୍ରୋନିକ ସିଗାରେଟର ବିଜ୍ଞାପନ ବା ପ୍ରଚାର ସହ ଜଡ଼ିତ ବୋଲି ଅଭିଯୋଗ ହୋଇଛି।
ଆୟୋଗ ସୂଚନା ଓ ପ୍ରସାରଣ ମନ୍ତ୍ରଣାଳୟର ସଚିବଙ୍କୁ ନୋଟିସ ଜାରି କରି ଏଭଳି ବିଷୟବସ୍ତୁକୁ ତୁରନ୍ତ ନିଷିଦ୍ଧ କରିବାକୁ ଏବଂ ଯୁବ ପିଢ଼ିଙ୍କୁ ଭୁଲ ଦିଗରେ ପ୍ରଭାବିତ କରୁଥିବା ସାମଗ୍ରୀ ଉପରେ ଉଚିତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦେଇଛନ୍ତି।
ଏହା ସହିତ ମୁମ୍ବାଇ ପୋଲିସ କମିଶନରଙ୍କୁ ଇଲେକ୍ଟ୍ରୋନିକ ସିଗାରେଟର ଉତ୍ପାଦନକାରୀ ଓ ଆମଦାନୀକାରୀଙ୍କ ପରିଚୟ ଓ କାର୍ଯ୍ୟକଳାପ ସମ୍ପର୍କରେ ତଦନ୍ତ ଆରମ୍ଭ କରିବାକୁ କୁହାଯାଇଛି।
