କୋରାପୁଟ,୧୯।୧୦(ସ୍ବ.ପ୍ର)-କୋରାପୁଟ ଜିଲା ମାଛକୁଣ୍ଡ ସୀମାବର୍ତ୍ତୀ ଅଞ୍ଚଳରେ ଥିବା ଜଙ୍ଗଲରେ ମାଓବାଦୀଙ୍କ ଏକ ଆଡ୍ଡା ଉପରେ ରବିବାର ପୋଲିସ ପକ୍ଷରୁ ଚଢାଉ କରାଯାଇ ବିପୁଳ ପରିମାଣର ବିସ୍ପୋରକ ସାମଗ୍ରୀ, ମାଓବାଦୀ କ୍ୟାଡରଙ୍କ ଫଟୋ, ଅତ୍ୟାଧୁନିକ ବିସ୍ପୋରକ ଜବତ କରାଯାଇଛି। ଏ ନେଇ ସୋମବାର କୋରାପୁଟ ଏସ୍ପି ମୁକେଶ କୁମାର ଭାମୁ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ଚଢାଉ ସମୟରେ ଘଟଣାସ୍ଥଳରେ ଥିବା ୧୫ରୁ ୨୦ ଜଣ ମାଓବାଦୀ ଖସି ପଳାଇଥିବା ଜଣାଯାଇଛି।
ସୂଚନା ମୁତାବକ, କୋରାପୁଟ ଓ ମାଲକାନାଗିରି ଜିଲା ସୀମାନ୍ତ ମାଛକୁଣ୍ଡ ଅଞ୍ଚଳରେ ମାଓବାଦୀମାନେ କୌଣସି ଅଘଟଣ ଘଟାଇବା ଲାଗି ଯୋଜନା କରୁଥିବା ଜିଲା ପୋଲିସ ସୂଚନା ପାଇଥିଲା। ରବିବାର ଅପରାହ୍ନରେ ଜିଲା ଡିଭିଏଫ ପୋଲିସ ଓ ଅନ୍କାଡେଲିସ୍ଥିତ ବିଏସ୍ଏଫର ମିଳିତ ଉଦ୍ୟମରେ ମାଛକୁଣ୍ଡ ଅଞ୍ଚଳର ଆନ୍ଧ୍ର ସୀମାବର୍ତ୍ତୀ ଅଞ୍ଚଳରେ ଚଢାଉ କରାଯାଇଥିଲା। ଚଢାଉ ସମୟରେ ଏକ ବଡ ପ୍ଲାଷ୍ଟିକ ଜାରରୁ ସ୍ଲରୀ ଓ ଏମୁଲସନ ଅତ୍ୟାଧୁନିକ ବିସ୍ପୋରକ ପଦାର୍ଥ ୧୮ଟି, ୫୦୦ଟି ଜିଲୋଟିନ ଷ୍ଠିକ, ୩ଟି କ୍ୟାମେରା ଫ୍ଲାସ, ୧୫ ମିଟର ତାର, ୧୨ଶହ ଗ୍ରାମ ସିପ୍ଲଟରସ ତଥା ତରଳ ବିସ୍ପୋରକ ପଦାର୍ଥ, ମାଓବାଦୀ କ୍ୟାଡରଙ୍କ ବହୁ ଫୋଟ ଜବତ କରାଯାଇଥିଲା।
