ଭୁବନେଶ୍ୱର,୧୩।୧(କ୍ରୀଡ଼ା ପ୍ରତିନିଧି): ଭୁବନେଶ୍ୱରର କଳିଙ୍ଗ ଏବଂ ରାଉରକେଲାର ବିର୍ସା ମୁଣ୍ଡା ଷ୍ଟାଡିୟମ ପ୍ରସ୍ତୁତ। ଉଦ୍ଘାଟନୀ ସମାରୋହର ଗୋଟିଏ ଦିନ ପରେ ଆରମ୍ଭ ହେବାକୁ ଯାଉଛି ହକିର ଅସଲ ରୋମାଞ୍ଚ। ଶୁକ୍ରବାରଠାରୁ ପଡ଼ିଆକୁ ଓହ୍ଲାଇବେ ବିଶ୍ୱର ତାରକା ଖେଳାଳି। ପ୍ରଥମ ଦିବସରେ ଅନୁଷ୍ଠିତ ହେବ ୪ଟି ମ୍ୟାଚ। କଳିଙ୍ଗ ଷ୍ଟାଡିୟମରେ ଆର୍ଜେଣ୍ଟିନା ପ୍ରଥମ ମ୍ୟାଚରେ ଦକ୍ଷିଣ ଆଫ୍ରିକାକୁ ଭେଟିବାକୁ ଥିବାବେଳେ ଦ୍ୱିତୀୟ ମ୍ୟାଚରେ ଫ୍ରାନ୍ସକୁ ଭେଟିବ ଅଷ୍ଟ୍ରେଲିଆ। ଓଡ଼ିଶା କ୍ରୀଡ଼ା ଇତିହାସରେ ନୂଆ ଅଧ୍ୟାୟ ଯୋଡ଼ିଥିବା ବିର୍ସା ମୁଣ୍ଡା ଷ୍ଟାଡିୟମରେ ପ୍ରଥମେ ଇଂଲଣ୍ଡକୁ ଭେଟିବ ଓ୍ବେଲ୍ସ। ଏହାପରେ ଭାରତ ଏହାର ପ୍ରଥମ ମ୍ୟାଚରେ ସ୍ପେନ୍ ସହ ମୁକାବିଲା କରି ଅଭିଯାନ ଆରମ୍ଭ କରିବ। ବିଶ୍ୱକପ୍ର ପ୍ରଥମ ମ୍ୟାଚ ହୋଇଥିବାରୁ ଉଭୟ ଭାରତ ଓ ସ୍ପେନ୍ ଦଳର ଖେଳାଳିମାନେ ଏହାକୁ ଗୁରୁତ୍ୱର ସହ ନେଉଛନ୍ତି। ବିର୍ସା ମୁଣ୍ଡା ଷ୍ଟାଡିୟମରେ ଗୁରୁବାର କଡ଼ା ଅଭ୍ୟାସ ସହ ପ୍ରସ୍ତୁତିକୁ ଅନ୍ତିମ ରୂପ ଦେଇଛନ୍ତି। ସ୍ପେନ୍ ଦଳରେ ସ୍ଥାନ ପାଇଥିବା ଅଧିକାଂଶ ଖେଳାଳି ୧୦୦ରୁ କମ୍ ଅନ୍ତର୍ଜାତୀୟ ମ୍ୟାଚ ଖେଳିଛନ୍ତି। ଭାରତୀୟ ଦଳ କିନ୍ତୁ ବେଶ୍ ସନ୍ତୁଳିତ। ୧୦୦ରୁ ଅଧିକ ମ୍ୟାଚ ଅର୍ଦ୍ଧାଧିକ ଖେଳାଳି ଖେଳି ସାରିଛନ୍ତି। ଭାରତୀୟ କୋଚ୍ ଗ୍ରାହାମ ରିଡ୍ କିନ୍ତୁ ଏଥିରେ ବିଶ୍ୱାସ କରନ୍ତି ନାହିଁ। ଅଭିଜ୍ଞ ଖେଳାଳିମାନେ ଯେ ସବୁବେଳେ ଚମତ୍କାରିତା ଦେଖାଇପାରିବେ ତା’ର କିଛି ମାନେ ନାହିଁ । ନିର୍ଦ୍ଦିଷ୍ଟ ଦିବସରେ ଶ୍ରେଷ୍ଠ ହକି ଖେଳିବାଠାରୁ ଆଉ ବଡ଼ କିଛି ନାହିଁ ବୋଲି ସେ କହିଛନ୍ତି। ”ଆମେ ଘରୋଇ ପରିବେଶରେ ବିଶ୍ୱକପ୍ ଖେଳିବାକୁ ଯାଉଛୁ। ତେଣୁ ଶ୍ରେଷ୍ଠ ପ୍ରଦର୍ଶନ ନିହାତି ଆବଶ୍ୟକ। ଟୁର୍ନାମେଣ୍ଟ ଜିତିବାକୁ ହେଲେ ଏହା ହିଁ କରିବାକୁ ହେବ, ଯାହାକି ସମ୍ଭବ। ଅଭିଜ୍ଞତା ଅନେକ ସମୟରେ ଏଭଳି ବଡ଼ ଟୁର୍ନାମେଣ୍ଟରେ ଫାଇଦା ଦେଇଥାଏ। ଭାରତ ଏହାର ଫାଇଦା ଉଠାଇବ“ ବୋଲି ରିଡ୍ ପ୍ରକାଶ କରିଛନ୍ତି। ରିଡ୍ ଆହୁରି କହିଛନ୍ତି, ଭୁଲିଯିବା ଉଚିତ ନୁହେଁ ଯେ ସ୍ପେନ୍ ଏକ ବିପଜ୍ଜନକ ଦଳ। ଯେତେ ଆକଳନ ଲଗାଇଲେ ମଧ୍ୟ ଏହି ଦଳ ତା’ଠାରୁ ଭଲ ପ୍ରଦର୍ଶନ କରିଥାଏ। ଆମକୁ ସବୁ ପରିସ୍ଥିତିରେ ଶ୍ରେଷ୍ଠ ପ୍ରଦର୍ଶନ କରିବାକୁ ପଡ଼ିବ। ଅଧିନାୟକ ହରମନ୍ପ୍ରୀତ ସିଂ ମଧ୍ୟ କୋଚ୍ଙ୍କ ସହ ଏକମତ ହୋଇଛନ୍ତି। ”ଘରୋଇ ପରିବେଶରେ ବିଶ୍ୱକପ୍ ଜିତିବା ପାଇଁ ବଡ଼ ସୁଯୋଗ ଆସିଛି। ଦର୍ଶକଙ୍କ ସମର୍ଥନ ଆମ ସପକ୍ଷରେ ରହିବ। ୪ ବର୍ଷରେ ଥରେ ବିଶ୍ୱକପ୍ ଆସୁଥିବାରୁ ଏଥିରେ ଭଲ ପ୍ରଦର୍ଶନ କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ପରବର୍ତ୍ତୀ ବିଶ୍ୱକପ୍ ବେଳକୁ ଦଳରେ କେଉଁ ଖେଳାଳି ଥିବେ ବା ନ ଥିବେ କହିହେବନି। ତେଣୁ ଏବେ ମିଳିଥିବା ସୁଯୋଗର ଭରପୂର ସଦୁପଯୋଗ ସମସ୍ତେ କରିବା ଆବଶ୍ୟକ। ପ୍ରଥମ ମ୍ୟାଚ ସବୁବେଳେ ଗୁରୁତ୍ୱ ବହନ କରିଥାଏ। ଏଥିରେ ବିଜୟ ସହ ଅଭିଯାନ ଆରମ୍ଭ କରିବାକୁ ଆମେ ଯୋଜନା ପ୍ରସ୍ତୁତ କରିଛୁ। ସମସ୍ତ ଖେଳାଳି ପ୍ରଥମ ମ୍ୟାଚ ଖେଳିବାକୁ ବ୍ୟଗ୍ର“ ବୋଲି ହରମନ୍ପ୍ରୀତ ପ୍ରକାଶ କରିଛନ୍ତି। ସ୍ପେନ୍ ବିପକ୍ଷରେ ମ୍ୟାଚ ଖେଳିବା ପରେ ଭାରତ ଏହାର ଦ୍ୱିତୀୟ ମ୍ୟାଚ ସେହି ରାଉରକେଲାରେ ୧୫ ତାରିଖରେ ଇଂଲଣ୍ଡ ବିପକ୍ଷରେ ଖେଳିବ। ଏହାପରେ ଭୁବନେଶ୍ୱର ଆସି ୧୯ ତାରିଖରେ ଓ୍ବେଲ୍ସକୁ ଭେଟିବ।
