ଶିମଲା,୧୦ ।୧୧: ହିମାଚଳ ପ୍ରଦେଶ ବିଧାନସଭା ନିର୍ବାଚନର ପ୍ରଚାର ଆଜି ଅର୍ଥାତ୍ ଗୁରୁବାର ଶେଷ ହେବ । ଏହାସହ ପୋଲିଂ ପାର୍ଟି ମତଦାନ କେନ୍ଦ୍ରକୁ ବାହାରିଯିବେ । ପାହାଡିଆ ଅଞ୍ଚଳରେ ଥିବା ମତଦାନ କେନ୍ଦ୍ର ଗୁଡିକରେ ତୁଷାରପାତର ସ୍ଥିତିକୁ ଦେଖି ପୋଲିଂ ପାର୍ଟି ଓ ନିର୍ବାଚନ ସାମଗ୍ରୀକୁ ଚପର ଦ୍ୱାରା ପଠାଯିବ । ସନ୍ଧ୍ୟା ୫ଟାରେ ପ୍ରଚାର ସରିବା ପେର ପଡୋଶୀ ରାଜ୍ୟକୁ ଲାଗି ରହିଥିବା ସମସ୍ତ ସୀମାକୁ ସିଲ୍ କରି ଦିଆଯିବ ।
ପ୍ରଚାରର ଶେଷ ଦିନରେ ଭାରତୀୟ ଜନତା ପାର୍ଟି(ଭାଜପା) ନେତା ତଥା ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହା କାଂଗଡାର ସୁଲହ ଓ ପାଂୱଟା ସାହିବରେ ରାଲି କରିବେ । ଅନ୍ୟପଟେ କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ସତୌନରେ ଜନସଭା କରିବା ସହ ଶିମଲାରେ ରୋଡ ଶୋ’ କରିବେ । ଭାଜପାର ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା, ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟ ନାଥ, ଉତ୍ତରାଖଣ୍ଡର ମୁଖ୍ୟମନ୍ତ୍ରୀ ପୁଷ୍ପର ସିଂ ଧାମି, କେନ୍ଦ୍ର ମନ୍ତ୍ରୀ ସ୍ମୃତି ଇରାନୀ ବିଭିନ୍ନ ରାଲିରେ ଯୋଗ ଦେବେ । ଏହାସହ ପ୍ରାର୍ଥିମାନେ ଡୋର ଟୁ ଡୋର ପ୍ରଚାର ବି କରିବେ । କଂଗ୍ରେସ ସମସ୍ତ ୬୮ ବିଧାନସଭା ନିର୍ବାଚନ ମଣ୍ଡଳିରେ ବିଜୟ ଆଶୀର୍ବାଦ ରାଲି ବାହାର କରିବ । ଏହି ରାଲିର ଆରମ୍ଭ ମନ୍ଦିରରେ ଦେବୀ-ଦେବତାଙ୍କ ଆଶୀର୍ବାଦରୁ ଆରମ୍ଭ କରାଯିବ ।
ସାରା ରାଜ୍ୟରେ ୭,୮୮୧ ମତଦାନ କେନ୍ଦ୍ରରେ ୧୨ ନଭେମ୍ବରରେ ଭୋଟ ଗ୍ରହଣ କରାଯିବ । ରାଜ୍ୟର ମୁଖ୍ୟ ନିବାଚନ ଅଧିକାରୀ ମନିଷ ଗର୍ଗ କହିଛନ୍ତି, ପୋଲିଂ ପାର୍ଟି ଦୂରଦୂରାନ୍ତ ମତଦାନ କେନ୍ଦ୍ରକୁ ୧୦ ନଭେମ୍ବର ଓ ନିକଟରେ ଥିବା ମତଦାନ କେନ୍ଦ୍ରକୁ ୧୧ ନଭେମ୍ବରରେ ଗସ୍ତ କରିବେ ।
