ନୂଆଦିଲ୍ଲୀ, ୨୦।୯ : ମଙ୍ଗଳବାର ସୁପ୍ରିମକୋର୍ଟରେ କର୍ନାଟକ ହାଇକୋର୍ଟଙ୍କ ଶିକ୍ଷାନୁଷ୍ଠାନରେ ହିଜାବ୍କୁ ନିଷିଦ୍ଧ କରିବା ନିଷ୍ପତ୍ତିକୁ ଚ୍ୟାଲେଞ୍ଜ କରାଯାଇଥିବା ପିଟିଶନଗୁଡ଼ିକର ଶୁଣାଣି ହୋଇଥିଲା। ସର୍ବୋଚ୍ଚ ଅଦାଲତରେ ଶୁଣାଣିର ଅଷ୍ଟମ ଦିନରେ କର୍ନାଟକ ସରକାରଙ୍କ ପକ୍ଷରୁ ସଲିସିଟର ଜେନେରାଲ ତୁଷାର ମେହେଟ୍ଟା ଯୁକ୍ତି ବାଢ଼ିଥିଲେ ଯେ, କର୍ନାଟକ ସରକାର ସମସ୍ତ ଛାତ୍ରୀଛାତ୍ରଙ୍କୁ ନିର୍ଦ୍ଦିଷ୍ଟ ପୋଷାକ ପିନ୍ଧିବାକୁ ପରାମର୍ଶ ଦେଇଛନ୍ତି। ସେ କହିଛନ୍ତି ଯେ ଏହି ସର୍କୁଲାର ଏକ ଧର୍ମ ନିରପେକ୍ଷ ଦିଗରେ ଅଛି, ସମସ୍ତ ଧର୍ମର ଛାତ୍ରୀଛାତ୍ରମାନଙ୍କ ଉପରେ ୟୁନିଫର୍ମ ଲାଗୁ କରାଯିବା ଉଚିତ। ମେହେଟ୍ଟା କହିଛନ୍ତି ଯେ ୨୦୨୧ପର୍ଯ୍ୟନ୍ତ ସମସ୍ତ ଛାତ୍ରୀଛାତ୍ରମାନେ ନିଜ ସୁବିଧାରେ ଡ୍ରେସ କୋଡ ଅନୁସରଣ କରୁଥିଲେ। ସୋସିଆଲ ମିଡିଆରେ ଏକ ଅଭିଯାନ ଚଳାଇ ଲୋକଙ୍କୁ ଉସୁକା ଯାଇଛି।
ସେ କହିଛନ୍ତି ଯେ ଅନେକ ମୁସଲମାନ ଛାତ୍ରୀ ହିଜାବ ପିନ୍ଧିବା ଆରମ୍ଭ କରିଥିଲେ। ଏହାର ଜବାବରେ ହିନ୍ଦୁ ଛାତ୍ରମାନେ ଗୈରିକ କପଡ଼ା ପିନ୍ଧିବା ଆରମ୍ଭ କରିଥିଲେ। ଅନୁଶାସନକୁ ଦୃଷ୍ଟିରେ ରଖି ଡ୍ରେସ କୋଡ ଲାଗୁ କରିବାକୁ ରାଜ୍ୟ ସରକାର ଶିକ୍ଷାନୁଷ୍ଠାନଗୁଡ଼ିକୁ କହିଛନ୍ତି। ହିଜାବ୍ ଇସଲାମର ଏକ ଅନିବାର୍ଯ୍ୟ ଅଂଶ ନୁହେଁ। ଇରାନ ସମେତ ଅନେକ ଇସଲାମ ଦେଶରେ ମହିଳାମାନେ ହିଜାବ୍ ବିରୋଧରେ ଲଢୁଛନ୍ତି। କେବଳ କୁରାନରେ ହିଜାବ୍ର ଉଲ୍ଲେଖ ରହିଛି। ଏହା ଇସଲାମର ଏକ ଅତ୍ୟାବଶ୍ୟକ ଅଂଶ ନୁହେଁ।
ଜଷ୍ଟିସ ହେମନ୍ତ ଗୁପ୍ତା ଏବଂ ଜଷ୍ଟିସ ସୁଦର୍ଶନ ଧୁଲିଆଙ୍କ ଏକ ବେଞ୍ଚ ଏହାର ଶୁଣାଣି କରୁଛନ୍ତି। ହିଜାବ୍ ନିଷେଧାଦେଶରେ ଦୁଶାନ୍ତ ଦାଭେ କହିଛନ୍ତି ଯେ ସରକାରଙ୍କ ଯୁକ୍ତି ହେଉଛି ଧାରା ୨୫ ଏବଂ ୨୬ ଅନୁଯାୟୀ କେବଳ ଧର୍ମର ଏକ ଅବିଚ୍ଛେଦ୍ୟ ଅଙ୍ଗକୁ ସୁରକ୍ଷିତ ରଖାଯିବ। ଏହି ଅଭ୍ୟାସ ଧାର୍ମିକ ପ୍ରଥା ହୋଇପାରେ, କିନ୍ତୁ ଏହା ଧର୍ମର ଅଭ୍ୟାସର ଏକ ଅତ୍ୟାବଶ୍ୟକ ଏବଂ ଅବିଚ୍ଛେଦ୍ୟ ଅଙ୍ଗ ନୁହେଁ। ଏହା ସମ୍ବିଧାନ ଦ୍ୱାରା ସୁରକ୍ଷିତ ନୁହେଁ, କିନ୍ତୁ ସରକାରଙ୍କ ଏହି ଯୁକ୍ତି ଠିକ ନୁହେଁ। ଜଷ୍ଟିସ ଧୁଲିଆ କହିଥିଲେ ଯେ, ଅତ୍ୟାବଶ୍ୟକ ଧାର୍ମିକ ପ୍ରଥାକୁ ଅଲଗା କରି ଆମେ ପରିସ୍ଥିତିର ମୁକାବିଲା କରିପାରିବୁ ନାହିଁ କି? ଦାଭେ କହିଥିଲେ ହାଇକୋର୍ଟ କେବଳ ଜରୁରୀ ଧାର୍ମିକ ପ୍ରଥା ଉପରେ ଏହି ମାମଲାର ବିଚାର କରିଛନ୍ତି। ବୁଧବାର ସୁପ୍ରିମକୋର୍ଟ ଏହି ମାମଲାର ଶୁଣାଣି କରିବେ।
