ନୂଆଦିଲ୍ଲୀ,୧୬।୫: ସାରା ଦେଶରେ ଗ୍ରୀଷ୍ମପ୍ରବାହ ଜାରି ରହିଛି। ଚଳିତ ବର୍ଷ ସବୁ ବର୍ଷଠାରୁ ଅତ୍ୟଧିକ ଗରମ ହେବା ସହ ଗୁଳଗୁଳି ଅନୁଭୂତ ହେଉଛି। ଫଳରେ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି। ଇତିମଧ୍ୟରେ ରବିବାର ଦିଲ୍ଲୀର ଅଧିକାଂଶ ଅଞ୍ଚଳରେ ଗ୍ରୀଷ୍ମ ପ୍ରବାହ ଦେଖିବାକୁ ମିଳିଥିବା ବେଳେ ବର୍ଦ୍ଧିତ ତାପମାତ୍ରା ପୂର୍ବର ସମସ୍ତ ରେକର୍ଡ ଭାଙ୍ଗିଛି। ପାଣିପାଗ ବିଭାଗର ୨ଟି ଷ୍ଟେସନ ମୁଙ୍ଗେଶପୁର ଏବଂ ନଜଫଗଡ଼ରେ ତାପମାତ୍ରା ୪୯.୨ ଏବଂ ୪୯.୧ ଡିଗ୍ରୀ ସେଲ୍ସିୟସ ରେକର୍ଡ କରାଯାଇଛି। ପାଣିପାଗ ବିଭାଗ ଅନୁଯାୟୀ, ଗତ ନଅ ବର୍ଷ ମଧ୍ୟରେ ଚଳିତ ମାସ ସବୁଠାରୁ ଉତ୍ତପ୍ତ ବୋଲି କୁହାଯାଉଛି। ସେହିପରି ସୋମବାର ବି ଗରମରୁ ଆଶ୍ୱସ୍ତି ମିଳିନାହିଁ। ସୋମବାର ଦିଲ୍ଲୀର ସର୍ବାଧିକ ତାପମାତ୍ରା ୪୪.୪ ଡିଗ୍ରୀ ସେଲ୍ସିୟସ ରହିଛି, ଯାହା ରବିବାର ଅପେକ୍ଷା ସାମାନ୍ୟ ଭଲ। କିନ୍ତୁ ହିଟ୍ ଓ୍ବେଭ ଯୋଗୁ ଦିଲ୍ଲୀ ରାସ୍ତାରେ ଯାତାୟତ କରିବା ଏକ ଚ୍ୟାଲେଞ୍ଜ ସଦୃଶ। ଚଳିତ ବର୍ଷ ମାର୍ଚ୍ଚରୁ ହିଟ୍ ଓ୍ବେଭ ଆରମ୍ଭ ହୋଇଛି ବୋଲି ପାଣିପାଗ ବିଜ୍ଞାନୀ ଆର.କେ ଜେନମାନି ସୂଚନା ଦେଇଛନ୍ତି।
