ନୂଆଦିଲ୍ଲୀ,୩୧।୫: ଗତ କିଛି ଦିନ ହେବ ପ୍ରବଳ ଉତ୍ତାପ ଏବଂ ଗୁଳୁଗୁଳି ସାରା ଦେଶରେ ସମସ୍ତଙ୍କୁ ଅସ୍ତବସ୍ତ କରିଦେଇଛି। ଏହି ସମୟରେ, ନୌତପାରେ ତାପମାତ୍ରା ବୃଦ୍ଧି ନିଶ୍ୱାସ ନେବାରେ ଏକ ସମସ୍ୟା ସୃଷ୍ଟି କରିଛି। ଲୁ ଯୋଗୁଁ ଦେଶରେ ଦୁଇଶହରୁ ଅଧିକ ଲୋକ ପ୍ରାଣ ହରାଇଥିବା କୁହାଯାଉଛି।
ଅତ୍ୟଧିକ ଉତ୍ତାପ ବିହାରରେ ବିପର୍ଯ୍ୟୟରେ ପରିଣତ ହୋଇଛି। ଏଠାରେ ୧୨ଟି ଜିଲାରେ ୬୫ ଜଣଙ୍କର ମୃତ୍ୟୁ ହୋଇଥିବାବେଳେ ୨୫୦ରୁ ଅଧିକ ଲୋକ ରାଜ୍ୟର ବିଭିନ୍ନ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ଭୋଜପୁର, ରୋହତସ ଏବଂ ଔରଙ୍ଗାବାଦରେ ଅବସ୍ଥା ଆହୁରି ଖରାପ ହୋଇଛି। ପାଟନା ସମେତ ସମଗ୍ର ବିହାର ଡହଡହ ଗରମରେ ଜଳି ଯାଉଛି।
ଏଥି ସହିତ ଉତ୍ତରପ୍ରଦେଶରେ ମଧ୍ୟ ୧୬୦ରୁ ଅଧିକ ଲୋକ ହିଟ ଓ୍ବେଭ ଯୋଗୁଁ ପ୍ରାଣ ହରାଇଛନ୍ତି। ୟୁପିରେ ସର୍ବାଧିକ ୭୨ମୃତ୍ୟୁ ବାରାଣାସୀ ଏବଂ ଏହାର ଆଖପାଖ ଅଞ୍ଚଳରେ ଘଟିଛି।
ବୁନ୍ଦେଲଖଣ୍ଡ ଏବଂ କାନପୁରରେ ୪୭ ଜଣଙ୍କର ମୃତ୍ୟୁ ହୋଇଛି। ଏଠାରେ ମହୋବାରେ ୧୪ ଜଣ ପ୍ରାଣ ହରାଇଲେ, ହମିରପୁରରେ ୧୩ଜଣଙ୍କର ମୃତ୍ୟୁ ହୋଇଛି, ପାଞ୍ଚ ଜଣଙ୍କର ବୃନ୍ଦାରେ ମୃତ୍ୟୁ ଘଟିଛି। ଏହା ବ୍ୟତୀତ କାନପୁରରେ ଚାରି ଜଣ ଏବଂ ଚିତ୍ରକୋଟରେ ଦୁଇ ଜଣଙ୍କ ମୃତ୍ୟୁୃ ସମ୍ପର୍କରେ ସୂଚନା ସାମ୍ନାକୁ ଆସିଛି।
ମେ’ ୩୦ ଗୁରୁବାର ଲକ୍ଷ୍ନୌରେ ୨୯ ବର୍ଷ ପୁରୁଣା ରେକର୍ଡ ଭାଙ୍ଗିଛି। ଏଠାରେ ସର୍ବାଧିକ ତାପମାତ୍ରା ୪୫.୧ ଡିଗ୍ରୀ ସେଲସିୟସରେ ପହଞ୍ଚିଛି। ଏହାପୂର୍ବରୁ ମେ ୩୧, ୧୯୯୫ରେ ସର୍ବାଧିକ ତାପମାତ୍ରା ୪୬.୫ ଡିଗ୍ରୀ ସେଲସିୟସରେ ରେକର୍ଡ କରାଯାଇଥିଲା। ତେବେ ଚଳିତ ବର୍ଷ ହିଟ ଓ୍ବେଭରେ ଓଡ଼ିଶାରେ ଗୋଟିଏ ଦିନରେ ୧୯ ଜଣଙ୍କ ମୃତ୍ୟୁ ହୋଇଥିବା କୁହାଯାଉଛି।
ଫାଲୌଦି ଚଳିତ ବର୍ଷ ରାଜସ୍ଥାନର ସବୁଠାରୁ ଉତ୍ତପ୍ତ ଅଞ୍ଚଳ ହୋଇଛି। ଏଠାରେ ୫୦ ଡିଗ୍ରୀରୁ ଅଧିକ ତାପମାତ୍ରା ରେକର୍ଡ କରାଯାଇଥିଲା। ଏହା ବ୍ୟତୀତ ଦିଲ୍ଲୀର ନଜାଫଗଡରେ ସର୍ବାଧିକ ତାପମାତ୍ରା ରେକର୍ଡ କରାଯାଇଥିଲା। ମର୍କର ଏଠାରେ ୪୮ଡିଗ୍ରୀ ପର୍ଯ୍ୟନ୍ତ ବୃଦ୍ଧି ପାଇଛି।
