ଅମରପାଲି,୨୩।୧୧(ପୀତାମ୍ବର ସାହୁ): ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ଉପଖଣ୍ଡର ଉପାନ୍ତ ବହଳପଦର, ଦୁର୍ଜନତୈଲା ଓ କୋଟସମଲାଇ ପଞ୍ଚାୟତରେ ସପ୍ତାହରେ ୪ ଜଣଙ୍କ କିଡନୀରେ ମୃତ୍ୟୁ ହୋଇଥିଲେ। ଏନେଇ ଦୈନିକ ଧରିତ୍ରୀ ରେ ” ସପ୍ତାହରେ କିଡନୀ ରୋଗରେ ଗଲାଣି ୪ ଜୀବନ, ସ୍ବାସ୍ଥ୍ୟ ବିଭାଗ ପାଖରେ ଖବର ନାହିଁ” ଶୀର୍ଷକ ଏକ ଖବର ଶନିବାର ପ୍ରକାଶ ହୋଇଥିଲା। ଖବର ପ୍ରସାରଣ ପରେ ସ୍ବାସ୍ଥ୍ୟ ବିଭାଗ ତତ୍ପରତା ପ୍ରକାଶ କରିଛି। ଏକ ମେଡ଼ିକାଲ ଟିମ ମୃତକଙ୍କ ଘରକୁ ପହଞ୍ଚି ମୃତ୍ୟୁର କାରଣ ଖୋଜିବା ସହିତ ଏହି ସବୁ ଗ୍ରାମରେ ଲୋକଙ୍କୁ ସଚେତନ କରିଛି।
ସୂଚନା ଅନୁସାରେ, କିଡନୀ ରୋଗରେ ପ୍ରଥମେ ଗତ ଶନିବାର ଦିନ ବହଳପଦର ପଞ୍ଚାୟତ ର ବଡ଼ମାଳ ଗ୍ରାମର ଅଶ୍ବିନୀ ପ୍ରଧାନ(୩୮) ଙ୍କ ମୃତ୍ୟୁ ହୋଇଥିଲ। ପରେ ରବିବାର ଦିନ ଉକ୍ତ ପଞ୍ଚାୟତର କୁହିଦାଦର ଗ୍ରାମର ପ୍ରେମଭକ୍ତି ଭୋଇ(୩୬) ନାମକ ଜଣେ ଯୁବକଙ୍କ ମଧ୍ୟ ଏହି ରୋଗରେ ମୃତ୍ୟୁ ହୋଇଥିଲା। ସେହିପରି ଦୁର୍ଜନତୈଲା ପଞ୍ଚାୟତ ମାଳିଦାଦର ଗ୍ରାମର ଯୋଗିନ୍ଦ୍ର ଜଗଦଲା (୫୫) ଙ୍କ ମଧ୍ୟ କିଡନୀ ରୋଗରେ ଆକ୍ରାନ୍ତ ହୋଇଥିବା ବେଳେ ଏହି ଦିନ କୋଟସମଲାଇ ପଞ୍ଚାୟତ ର ସୁନାପାଲି ଗ୍ରାମର ଭାରତ ଭୋଇ (୩୧) ନାମକ ଜଣେ କିଡନୀ ଆକ୍ରାନ୍ତଙ୍କ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଥିଲା। ମାତ୍ର ଏନେଇ ଜିଲା ସ୍ବାସ୍ଥ୍ୟ ବିଭାଗ ପାଖରେ କୌଣସି ଖବର ନ ଥିଲା। ସମସ୍ତ ମୃତକଙ୍କ ଆର୍ଥିକ ସମସ୍ୟା ଯୋଗୁ ଅଧିକ ଚିକିତ୍ସା ହୋଇ ପାରି ନ ଥିଲା। ଏନେଇ ଧରିତ୍ରୀ ରେ ଖବର ପ୍ରକାଶ ପାଇଥିଲା।
ଶନିବାର ବୀରମହାରାଜପୁର ଉପଖଣ୍ଡିୟ ଚିକିତ୍ସାଳୟର ଏକ ଟିମ ମାଳିଦାଦର, କୁହିଦାଦର ଓ ବଡ଼ମାଳ ଯାଇ ସେଠାରେ ମୃତକଙ୍କ ଘରକୁ ଯାଇ କାରଣ ଖୋଜିବା ସହିତ ଗ୍ରାମରେ ସଚେତନ କରିଛନ୍ତି। ବୀରମହାରାଜପୁର ଉପଖଣ୍ଡ ଚିକିତ୍ସାଳୟର ମେଡିକାଲ ଅଫିସର ଡା. ମାନସ କୁମାର ନାଏକ ଙ୍କ ସମେତ ସିଏଚଓ ବିଭୂନ୍ଦ୍ର ପ୍ରତାପ ବିଶାଳ, ଭାରପ୍ରାପ୍ତ ସ୍ବାସ୍ଥ୍ୟ ପରିଦର୍ଶକ ଗିରିଧାରୀ ସାହୁ ,ଫାର୍ମାସିଷ୍ଟ ଗଦାଧର ସୁରଜାଲ, ଏଲଟି ବିଶ୍ୱଜିତ ବାରିକ, ଏଏନଏମ ସଞ୍ଜୁ ମଲ୍ଲିକ, କାବ୍ୟସିନୀ ସେଠୀ ଓ ଭାମାବତୀ ହାତୀ ଆସି କିଡନୀ ରେ ମୃତକଙ୍କ ଘରକୁ ଯାଇଥିଲେ। ଏହାପରେ ମାଳିଦାଦର ଗ୍ରାମରେ ଏକ ସଚେତନ ସଭା କରି ଲୋକଙ୍କୁ କିଡନୀ ରୋଗର ସଚେତନ କରିଥିଲେ। ଏହା ପରେ ମୃତକଙ୍କ ଗ୍ରାମରେ ଥିବା ବିଭିନ୍ନ ଜଳାଶୟ ଓ ନଳକୂପରୁ ପାନୀୟ ଜଳ ନମୁନା ସଂଗ୍ରହ କରିଥିଲେ। ତେବେ ଅଞ୍ଚଳର ସର୍ବାଧିକ କିଡନୀ ପ୍ରଭାବିତ ଗ୍ରାମ ସୁନାପାଲି ରେ ଗୁରୁବାର ଏହି ରୋଗରେ ମୃତ୍ୟୁ ହୋଇଥିବା ଭରତ ଭୋଇ ଙ୍କ ଘରକୁ ଏଯାଏ ସ୍ବାସ୍ଥ୍ୟ ବିଭାଗ ପହଞ୍ଚି ପାରି ନାହିଁ। ତେବେ ଅଞ୍ଚଳରେ ବ୍ୟାପକ କିଡନୀ ରୋଗ ବ୍ୟାପୁଥିବାରୁ ଏହାର ପ୍ରତିକାର ପାଇଁ ବ୍ୟବସ୍ଥା ଗ୍ରହଣ କରିବାକୁ ସାଧାରଣରେ ଦାବି ହେଉଛି।
Dharitri – Odisha’s No.1 Odia Daily
