ଦେବେନ୍ଦ୍ର ଆନ୍ଦିଆ
ଭଣ୍ଡାରିପୋଖରୀ ,୨୦।୪: ନିଜର ପେନ୍ସନ ଟଙ୍କା ଖର୍ଚ୍ଚ କରି ଅଞ୍ଚଳବାସୀଙ୍କ ଯାତାୟାତ ସୁବିଧା ପାଇଁ ନଦୀଘାଟ ମରାମତି ସହ ପାହାଚ ନିର୍ମାଣ କରି ଜଣେ ବ୍ୟକ୍ତି ଆଖପାଖ ଅଞ୍ଚଳରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛନ୍ତି। ଏଭଳି ମହାନ ବ୍ୟକ୍ତି ଜଣକ ହେଉଛନ୍ତି ୮୪ ବର୍ଷୀୟ ଅବସରପ୍ରାପ୍ତ ସରକାରୀ ଚକବନ୍ଦୀ ଅଧିକାରୀ ରାମଚନ୍ଦ୍ର ଦାଶ। ତାଙ୍କ ଘର ଭଦ୍ରକ ଜିଲା ଭଣ୍ଡାରିପୋଖରୀ ବ୍ଲକ ଅନ୍ତର୍ଗତ ବନ୍ଦାଳ ଗ୍ରାମରେ। ୬୦ ହଜାରରୁ ଊଦ୍ଧର୍ବ ଟଙ୍କା ଖର୍ଚ୍ଚ କରି ରାମଚନ୍ଦ୍ର ଅଞ୍ଚଳବାସୀଙ୍କ ସୁବିଧା ପାଇଁ ନଦୀଘାଟରେ କଙ୍କ୍ରିଟ ପାହାଚ ନିର୍ମାଣ କରିଛନ୍ତି।
ନଦୀ ଘାଟକୁ ଶୌଚ ଓ ଗାଧୁଆ ପାଇଁ ଲୋକଙ୍କ ଦୀର୍ଘ ଦିନର ସମସ୍ୟା ଥିବାରୁ ଗ୍ରାମବାସୀ ସ୍ଥାନୀୟ ପଞ୍ଚାୟତ ଓ ପ୍ରଶାସନକୁ ଅବଗତ କରିବା ପରେ ମଧ୍ୟ କେହି ଏଥିପ୍ରତି ଦୃଷ୍ଟି ଦେଉ ନ ଥିଲେ। ଶେଷରେ ଅନ୍ୟ ଉପାୟ ନ ପାଇ ରାମଚନ୍ଦ୍ର ନିଜର ପେନ୍ସନ ଟଙ୍କାରେ ଏହି କାର୍ଯ୍ୟ କରିବାକୁ ସଂକଳ୍ପ ନେଇଥିଲେ। ବନ୍ଦାଳ ମଢିଆଳୀ ପଞ୍ଚାୟତ ଦେଇ ବହି ଯାଇଥିବା ବୈତରଣୀ ନଦୀର ଖପୁରିଆପଦା ସ୍ଥିତ ମିଶ୍ର ସାହି ନଦୀ ଘାଟତୁଠ ଅନେକ ଦିନ ହେବ ବିପଜ୍ଜନକ ଅବସ୍ଥାରେ ପଡ଼ି ରହିଥିଲା। ପ୍ରତିଦିନ ଗାଧୋଇବା ଓ ଶୌଚ ହେବାକୁ ଆସୁଥିବା ଲୋକମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଥିଲେ। ବିଶେଷ କରି ରାହାସ ପୂର୍ଣ୍ଣିମାରେ ସ୍ନାନ କରିବା ଓ ଶ୍ରାବଣୀ ପାଣି ଉଠାଇବା ସମୟରେ ଏଇ ଘାଟରେ ଶହ ଶହ ଭକ୍ତଙ୍କ ଭିଡ଼ ଜମିଥାଏ। ଏପଟେ ଘାଟର ତୁଠଟି ଅଗମ୍ୟ ହୋଇଥିବାରୁ ଅନେକ ଲୋକ ପଡ଼ି ଆହତ ହୋଇଥିବା ବେଳେ କିଛି ଦିନ ତଳେ ଧନେଶ୍ୱର ସାହୁ ନାମକ ଜଣେ ଯୁବକ ଗାଧୋଇବା ବେଳେ ସେହି ତୁଠରେ ପଡ଼ିଯାଇ ପ୍ରାଣ ହରାଇଥିଲେ। ଏସବୁକୁ ଦୃଷ୍ଟିରେ ରଖି ନିର୍ମାଣ ପାଇଁ ଅଣ୍ଟା ଭିଡିଥିଲେ ରାମଚନ୍ଦ୍ର। ବର୍ତ୍ତମାନ ସୁଦ୍ଧା ନିର୍ମାଣ କାର୍ଯ୍ୟ ଶେଷ ପର୍ଯ୍ୟାୟରେ। ରାମଚନ୍ଦ୍ରଙ୍କ ଏପରି କାର୍ଯ୍ୟ ଦେଖି ଆଖପାଖ ଅଞ୍ଚଳର ଲୋକେ ତାଙ୍କର ପ୍ରଶଂସା କରିଛନ୍ତି।
