ନୂଆଦିଲ୍ଲୀ, ୧୬ା୪(ପି.ଟି.)- ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ବାର୍ଷିକ ଚୁକ୍ତି ତାଲିକା (ସେଣ୍ଟ୍ରାଲ କଣ୍ଟ୍ରାକ୍ଟ) ଗୁରୁବାର ପ୍ରକାଶ ପାଇଛି। ଏଥିରେ ୪ଟି କାଟେଗୋରିରେ ମୋଟ ୨୮ ଜଣ ଖେଳାଳି ସ୍ଥାନ ପାଇଛନ୍ତି। ଗ୍ରେଡ୍-ଏ’+ କାଟେଗୋରିରେ ଭାରତର ୩ ଷ୍ଟାର ଖେଳାଳି ଅଧିନାୟକ ବିରାଟ କୋହଲି, ତାଙ୍କ ହ୍ବାଇଟ୍ ବଲ୍ ଡେପୁଟି ରୋହିତ ଶର୍ମା ଓ ଯଶପ୍ରୀତ ବୁମ୍ରା ସେମାନଙ୍କ ସ୍ଥାନ ବଜାୟ ରଖିଛନ୍ତି। ପ୍ରତ୍ୟେକ ବାର୍ଷିକ ୭କୋଟି ଲେଖାଏ ପାଇବେ। ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କ ପାଇଁ ଏହା ଇଞ୍ଜୁରିପ୍ରବଣ ସିଜନ ରହିଥିଲେ ମଧ୍ୟ ସେ ପଦୋନ୍ନତି ପାଇଛନ୍ତି। ସେ ଗ୍ରେଡ୍-ଏ’ କାଟେଗୋରିରେ ସ୍ଥାନ ପାଇଛନ୍ତି। ଏହାଦ୍ୱାରା ସେ ଏଣିକି ବାର୍ଷିକ ୫ କୋଟି ଟଙ୍କା ପାଇବେ। ଗତ ବର୍ଷ ସେ ଗ୍ରେଡ୍-ବି’ରେ ରହିଥିଲେ। ଯୁବ ଖେଳାଳି ଶୁବମନ ଗିଲ୍ ଓ ମହମ୍ମଦ ସିରାଜ ପ୍ରଥମ ଥର ସେଣ୍ଟ୍ରାଲ କଣ୍ଟ୍ରାକ୍ଟରେ ସ୍ଥାନ ପାଇଛନ୍ତି। ଉଭୟଙ୍କୁ ଗ୍ରେଡ୍ ସି’ରେ ସ୍ଥାନ ମିଳିଛି। ସେମାନେ ବାର୍ଷିକ ୧ କୋଟି ଟଙ୍କା ଲେଖାଏ ପାଇବେ। ଅନ୍ୟପକ୍ଷରେ ଶାର୍ଦ୍ଦୁଳ ଠାକୁର ଗ୍ରୁପ୍ ବି’କୁ ପଦୋନ୍ନତି ପାଇଛନ୍ତି। ଚଳିତ ବର୍ଷ ଅଷ୍ଟ୍ରେଲିଆରେ ଭାରତର ଐତିହାସିକ ଟେଷ୍ଟ ସଫଳତାରେ ପ୍ରଭାବୀ ପ୍ରଦର୍ଶନ ଯୋଗୁ ଏହି ୩ ଖେଳାଳିଙ୍କୁ ସେଣ୍ଟ୍ରାଲ କଣ୍ଟ୍ରାକ୍ଟ ତାଲିକାରେ ସ୍ଥାନ ମିଳିଛି। ଯେଉଁମାନେ ତଳକୁ ଖସିଛନ୍ତି ସେମାନଙ୍କ ମଧ୍ୟରେ ପେସ୍ ବୋଲର ଭୁବନେଶ୍ୱର କୁମାର ରହିଛନ୍ତି। ସେ ଗ୍ରେଡ୍-ବି’ ତାଲିକାରେ ସ୍ଥାନ ପାଇଛନ୍ତି। ତାଙ୍କ ମୂଲ୍ୟ ଏବେ ୩ କୋଟି ଟଙ୍କା। କେଦାର ଯାଦବ ମଧ୍ୟ ତଳ ପାହ୍ୟାକୁ ଖସିଛନ୍ତି। ବିଭିନ୍ନ ଇଞ୍ଜୁରି ଯୋଗୁ ସମସ୍ତ ଫର୍ମାଟରେ ସେ ନିୟମିତ ଖେଳିପାରୁ ନ ଥିଲେ। ଦୀର୍ଘ ଦିନ ଅନୁପସ୍ଥିତି ଯୋଗୁ ସେ ଏ’ ରୁ ବି’ କାଟେଗୋରିକୁ ଖସିଯାଇଛନ୍ତି। ସବୁଠାରୁ ଅଧିକ କ୍ଷତି ସହିବାକୁ ପଡ଼ିଛି ରିଷ୍ଟ ସ୍ପିନର କୁଲଦୀପ ଯାଦବଙ୍କୁ। ସେ ଏ’ରୁ ସି’ ଗ୍ରେଡ୍କୁ ଚାଲିଆସିଛନ୍ତି। ଅପରପକ୍ଷରେ ବର୍ତ୍ତମାନ କେବଳ ଗୋଟିଏ ଫର୍ମାଟ (ଅନ୍ତର୍ଜାତୀୟ ଦିନିକିଆ)ରେ ଖେଳୁଥିବା ଶିଖର ଧାଓ୍ବନ ଏ’ କାଟେଗୋରିରେ ତାଙ୍କ ସ୍ଥାନ ବଜାୟ ରଖିପାରିଛନ୍ତି। ତାଙ୍କ ସହିତ ଏହି କାଟେଗୋରିରେ ରହିଛନ୍ତି ଟେଷ୍ଟ ସ୍ପେଶାଲିଷ୍ଟ ରବିଚନ୍ଦ୍ରନ ଅଶ୍ୱିନ ଓ ଚେତେଶ୍ୱର ପୂଜାରା। ଇଂଲଣ୍ଡ ବିପକ୍ଷ ଘରୋଇ ସିରିଜରେ ୨୭ ଉଇକେଟ ସଫଳତା ହାସଲ କରିଥିବା ଅକ୍ଷର ପଟେଲ ସେଣ୍ଟ୍ରାଲ କଣ୍ଟ୍ରାକ୍ଟକୁ ଫେରିବାରେ ସମର୍ଥ ହୋଇଛନ୍ତି। ସର୍ବନିମ୍ନ କାଟେଗୋରିରେ ସ୍ଥାନ ପାଇବାକୁ ହେଲେ ଜଣକୁ ଅତିକମ୍ରେ ୩ଟି ଟେଷ୍ଟ ମ୍ୟାଚ ଖେଳିବା ଆବଶ୍ୟକତା ରହିଛି। ଭବିଷ୍ୟତର ଏ’+ ପ୍ରାର୍ଥୀ ରିଷଭ ପନ୍ତ ଗ୍ରେଡ୍ ଏ’ରେ ତାଙ୍କ ସ୍ଥାନ ବଜାୟ ରଖିଛନ୍ତି।
ବିସିସିଆଇର ବାର୍ଷିକ ଚୁକ୍ତି ତାଲିକା
ଗ୍ରେଡ୍-ଏ’+ (୭ କୋଟି ଟଙ୍କା) : ବିରାଟ କୋହଲି, ରୋହିତ ଶର୍ମା ଓ ଯଶପ୍ରୀତ ବୁମ୍ରା।
ଗ୍ରେଡ୍-ଏ’ (୫କୋଟି): ଆର. ଅଶ୍ୱିନ, ରବୀନ୍ଦ୍ର ଜାଡେଜା, ଚେତେଶ୍ୱର ପୂଜାରା, ଅଜିଙ୍କ୍ୟ ରାହାନେ, ଶିଖର ଧାଓ୍ବନ, କେ.ଏଲ୍. ରାହୁଲ, ମହମ୍ମଦ ଶାମି, ଈଶାନ୍ତ ଶର୍ମା, ରିଷଭ ପନ୍ତ, ହାର୍ଦ୍ଦିକ ପାଣ୍ଡ୍ୟା।
ଗ୍ରେଡ୍-ବି’ (୩ କୋଟି): ରିଦ୍ଧିମାନ ଶାହା, ଉମେଶ ଯାଦବ, ଭୁବନେଶ୍ୱର କୁମାର, ଶାର୍ଦ୍ଦୁଳ ଠାକୁର, ମୟଙ୍କ ଅଗ୍ରଓ୍ବାଲ।
