ମୁମ୍ବାଇ: ବଲିଉଡ୍ର ଭେଟେରାନ୍ ଆକ୍ଟର ନସିରୁଦ୍ଦିନ ଶାହ। ଆଜି ୭୦ ବର୍ଷ ବୟସରେ ପଦାର୍ପଣ କରିଛନ୍ତି। ଆଜିବି ତାଙ୍କ ଦମ୍ଦାର ଅଭିନୟ ଦର୍ଶକଙ୍କୁ ବାନ୍ଧି ରଖିବାରେ ସକ୍ଷମ ହୋଇଛି। ମାୟାନଗରୀରେ ନିଜର ଏକ ଭିନ୍ନ ପରିଚୟ ସୃଷ୍ଟି କରିଥିବା ଏହି ଅଭିନେତା ତାଙ୍କ ପର୍ସନାଲ ଲାଇଫକୁ ନେଇ ମଧ୍ୟ ବେଶ୍ ଚର୍ଚ୍ଚିତ। ନସିରୁଦ୍ଦିନଙ୍କ ପ୍ରେମ କାହାଣୀ କୌଣସି ଚଳଚ୍ଚିତ୍ର କାହାଣୀଠାରୁ କମ୍ ନୁହେଁ। ମାତ୍ର ୧୯ ବର୍ଷ ବୟସରେ ଏହି ଅଭିନେତା ବିବାହ କରିବାକୁ ପରିବାର ସଦସ୍ୟଙ୍କସହ ଝଗଡା କରିଥିଲେ। ଏମିତିକି ନିଜଠାରୁ ୧୬ ବର୍ଷ ବଡ଼ ବିବାହିତା ମନାରା ସିକ୍ରିଙ୍କୁ ସେ ପ୍ରେମ ବିବାହ କରିଥିଲେ। ସିକ୍ରି କେବଳ ବିବାହିତା ନ ଥିଲେ ତାଙ୍କର ଏକ ସନ୍ତାନ ମଧ୍ୟ ଥିଲା। ଏହା ଜାଣି ମଧ୍ୟ ପ୍ରେମରେ ପାଗଳ ଥିଲେ ନସିରୁଦ୍ଦିନ। ସିକ୍ରିଙ୍କ ସହ ବିବାହର କିଛିଦିନ ପରେ ତାଙ୍କର ଏକ କନ୍ୟା ସନ୍ତାନ ହୋଇଥିଲା ଯାହାର ନାଁ ରଖାଗଲା ହିବା ଶାହ। ହେଲେ ନସିରୁଦ୍ଦିନ ଓ ମନାରାଙ୍କ ବୈବାହିକ ଜୀବନ ବେଶିଦିନ ତିଷ୍ଠି ପାରି ନ ଥିଲା। କିଛିବର୍ଷ ପରେ ଏମାନେ ଅଲଗା ହୋଇଯାଇଥିଲେ। ଏହାପରେ ନସିରୁଦ୍ଦିନଙ୍କ ନଜର ପଡିଥିଲା ତାଙ୍କଠାରୁ ବୟସରେ ୧୩ବର୍ଷ ସାନ ରତ୍ନା ପାଠକଙ୍କ ଉପରେ। ଏହାପରେ ଉଭୟ ଧୁମ୍ଧାମରେ ବିବାହ କରିଥିଲେ। ଏହାର କିଛିଦିନ ପରେ ନସିରୁଦ୍ଦିନଙ୍କ ପ୍ରଥମ ପତ୍ନୀ ମନାରାଙ୍କର ମୃତ୍ୟୁ ହୋଇଥିଲା। ଆଉ ଝିଅ ହିବା ନସିରୁଦ୍ଦିନ ଓ ରତ୍ନାଙ୍କ ସହ ରହିବାକୁ ଆରମ୍ଭ କରିଥିଲା। ଏବେ ରତ୍ନାଙ୍କର ୨ ପୁଅ ଇମାଦ ଓ ବିବାନ ରହିଛନ୍ତି।
