ଲଣ୍ଡନ, ୨୨ା୧୨ (ଏପି)- ସାତ ଥର ଫର୍ମୁଲାଓ୍ବାନ ଚାମ୍ପିୟନ ଲୁଇସ୍ ହାମିଲଟନ ଚଳିତ ବର୍ଷ ଆଉ ଏକ ସଫଳତା ହାସଲ କରିଛନ୍ତି। ସେ ବିବିସିର ସ୍ପୋଟର୍ସ ପର୍ସନାଲିଟି ଅଫ୍ ଦି ଇୟର ପୁରସ୍କାର ଜିତିଛନ୍ତି। ମର୍ସିଡିଜ୍ ଟିମ୍ର ଏହି ୩୫ ବର୍ଷୀୟ ଡ୍ରାଇଭର ଗତମାସରେ ମାଇକେଲ ସୁମାକରଙ୍କ ୭ ଫର୍ମୁଲା ଓ୍ବାନ ଟାଇଟଲ ରେକର୍ଡ ସମକକ୍ଷ ହୋଇଥିଲେ। ଜୋର୍ଡାନ ହେଣ୍ଡରସନ ଏବଂ ହୋଲି ଡୋଏଲ୍ଙ୍କୁ ଅତିକ୍ରମ କରି ରବିବାର ବ୍ରିଟିଶ ବ୍ରଡକାଷ୍ଟର’ର ସମ୍ମାନଜନକ ପୁରସ୍କାର ଜିତିଛନ୍ତି। ଏଥିପାଇଁ ଜନସାଧାରଣ ଭୋଟ ହୋଇଥିଲା। ହାମିଲଟନ ପୂର୍ବରୁ ୨୦୧୪ରେ ମଧ୍ୟ ବିସିସି ପୁରସ୍କାର ଲାଭ କରିଥିଲେ। ଇଂଲଣ୍ଡ ମିଡ୍ଫିଲ୍ଡର ହେଣ୍ଡରସନଙ୍କ ନେତୃତ୍ୱରେ ଲିଭରପୁଲ୍ ୩୦ ବର୍ଷ ମଧ୍ୟରେ ପ୍ରଥମ ପ୍ରିମିୟର ଲିଗ୍ ଟାଇଟଲ ଜିତିଥିଲା। କରୋନାଭାଇରସ ମହାମାରୀ ସମୟରେ ନ୍ୟାଶନାଲ ହେଲ୍ଥ ସର୍ଭିସ ଚ୍ୟାରିଟି ପାଇଁ ପାଣ୍ଠି ସଂଗ୍ରହ କ୍ଷେତ୍ରରେ ହେଣ୍ଡରସନ ଯେଉଁ ଭୂମିକା ଗ୍ରହଣ କରିଥିଲେ, ସେଥିପାଇଁ ପ୍ରଶଂସାର ପାତ୍ର ହୋଇଥିଲେ। ଅନ୍ୟପକ୍ଷରେ ଜଣେ ମହିଳା ଜକି ହିସାବରେ ଗୋଟିଏ କ୍ୟାଲେଣ୍ଡର ବର୍ଷରେ ଡୋଏଲ୍ ସର୍ବାଧିକ ବିଜୟ ସହ ନିଜ ରେକର୍ଡକୁ ଭଙ୍ଗ କରିଥିଲେ। ପୁରସ୍କାର ପାଇଁ ହୋଇଥିବା ସଂକ୍ଷିପ୍ତ ତାଲିକାରେ ସ୍ଥାନ ପାଇଥିବା ଅନ୍ୟ ୩ଜଣ ହେଲେ ବକ୍ସର ଟାଇସନ ଫ୍ୟୁରୀ, ସ୍ନୁକର ଖେଳାଳି ରୋନି ଓ’ସୁଲିଭାନ୍ ଏବଂ କ୍ରିକେଟର ଷ୍ଟୁଆର୍ଟ ବ୍ରଡ୍। ଇଂଲଣ୍ଡ ପ୍ରଫେସନାଲ ଫୁଟ୍ବଲର ମାର୍କସ ରସଫୋର୍ଡ ସ୍ବତନ୍ତ୍ର ପୁରସ୍କାର ପାଇଁ ମନୋନୀତ ହୋଇଥିଲେ।
