ଷ୍ଟକ୍ହୋମ୍,୧ା୧୨: ଥିଙ୍କଟ୍ୟାଙ୍କ ଇଣ୍ଟରନ୍ୟାଶନାଲ ଆଇଡିଆ ପକ୍ଷରୁ ମୋଟ ୧୭୩ଟି ଦେଶକୁ ନେଇ ସମୀକ୍ଷା କରାଯାଇଥିଲା। ୧୦୪ ଗଣତାନ୍ତ୍ରିକ ରାଷ୍ଟ୍ର ମଧ୍ୟରୁ ୫୨ ଦେଶ ଗଣତାନ୍ତ୍ରିକ ମୂଲ୍ୟବୋଧ ହରାଇ ବସିଛନ୍ତି। କେବଳ ଏସିଆରେ ୫୪% ଲୋକ ଗଣତାନ୍ତ୍ରିକ ରାଷ୍ଟ୍ରରେ ବସବାସ କରୁଛନ୍ତି। ଉକ୍ତ ରାଷ୍ଟ୍ରଗୁଡ଼ିକରେ ଏକଚ୍ଛତ୍ରବାଦ ବୃଦ୍ଧି ପାଇଥିବା ଉକ୍ତ ରିପୋର୍ଟରେ ଦର୍ଶାଯାଇଛି।
ବିଶ୍ୱର ଅଧା ଗଣତନ୍ତ୍ରରେ ଗଣତାନ୍ତ୍ରିକ ମୂଲ୍ୟବୋଧର ଅବକ୍ଷୟ ପରିଲକ୍ଷିତ ହୋଇଛି। ୟୁକ୍ରେନ୍ ଯୁଦ୍ଧ ଓ ଆର୍ଥିକ ସଙ୍କଟ ଯୋଗୁ ଗଣତନ୍ତ୍ର ଦୁର୍ବଳ ହେବାରେ ଲାଗିଛି ବୋଲି ବୁଧବାର ଅନ୍ତର୍ଜାତୀୟ ବିଚାରମଞ୍ଚ ପକ୍ଷରୁ ପ୍ରକାଶିତ ଏକ ରିପୋର୍ଟରେ ଦର୍ଶାଯାଇଛି।
ଇନ୍ଷ୍ଟିଚ୍ୟୁଟ୍ ଅଫ୍ ଡେମୋକ୍ରାସି ଆଣ୍ଡ ଇଲେକ୍ସନ ଆସିଷ୍ଟାନ୍ସ (ଆଇଡିଆ) ମହାସଚିବ କେଭ୍ଲିନ୍ କାସାସ୍-ଜାମୋରା କହିଛନ୍ତି, ବିଶ୍ୱର ଗଣତାନ୍ତ୍ରିକ ରାଷ୍ଟ୍ରଗୁଡ଼ିକରେ ଅଭୂତପୂର୍ବ ଅବକ୍ଷୟ ଦେଖିବାକୁ ମିଳିଛି। କୋଭିଡ୍-୧୯ ମହାମାରୀ ଓ ୟୁକ୍ରେନ୍ ଯୁଦ୍ଧ ଯୋଗୁ ସୃଷ୍ଟ ଆର୍ଥିକ ସଙ୍କଟରୁ ରାଜନୈତିକ ଅଚଳାବସ୍ଥା ଘନେଇବାରେ ଲାଗିଛି। ସ୍ଥିତି ଏପରି ହୋଇଛି ଯେ, ନିର୍ବାଚନଗୁଡ଼ିକର ବିଶ୍ୱସନୀୟତାକୁ ଚ୍ୟାଲେଞ୍ଜ କରାଯାଇପାରେ। ଏପରି କି ବିଭିନ୍ନ ରାଷ୍ଟ୍ରର ଆଇନକୁ ଟାର୍ଗେଟ କରାଯାଇପାରେ।
ନାଗରିକଙ୍କ ସ୍ବାଧୀନତା କ୍ଷୁଣ୍ଣ ହୋଇପାରେ। ପୂର୍ବରୁ ଗଣତନ୍ତ୍ର ସର୍ବାଧିକ ଧରାଶାୟୀ ହୋଇଥିବା ୬ ‘ବ୍ୟାକ୍ସ୍ଲାଇଡିଂ’ ରାଷ୍ଟ୍ର ଥିବାବେଳେ ଗତବର୍ଷ ଏହି ସଂଖ୍ୟା ୭କୁ ବଢ଼ିଛି। ଏଭଳି ରାଷ୍ଟ୍ରଗୁଡ଼ିକ ମଧ୍ୟରେ ସର୍ବାଗ୍ରେ ଆମେରିକା ରହିଛି। ଅନ୍ୟ ରାଷ୍ଟ୍ରଗୁଡ଼ିକ ମଧ୍ୟରେ ବ୍ରାଜିଲ, ହଙ୍ଗେରି, ଭାରତ, ମରିସସ୍, ପୋଲାଣ୍ଡ ଓ ଏଲ୍ ସାଲ୍ଭାଡୋର ରହିଛି। ରାଜନୈତିକ ଧ୍ରୁବୀକରଣ, ନାଗରିକ ସ୍ବାଧୀନତା ପ୍ରତି ବିପଦ ଓ ସାମ୍ବିଧାନିକ ସଂସ୍ଥାଗୁଡ଼ିକ ଉପରେ ଟାର୍ଗେଟ କରାଯାଉଛି। ବିଶେଷକରି ଆମେରିକାରେ ଯାହା ସବୁ ଘଟୁଛି ତାକୁ ଦେଖି ଆମେ ମର୍ମାହତ ବୋଲି କେଭ୍ଲିନ୍ କହିଛନ୍ତି।
