ଫୁଲବାଣୀ ଅଫିସ,୧ା୧୨: କନ୍ଧମାଳ ଜିଲାରେ ପ୍ରତିବର୍ଷ ବନ ବିଭାଗ ପକ୍ଷରୁ ଚାରାରୋପଣ କରାଯାଉଛି। ଜଙ୍ଗଲ, ରାସ୍ତା ପାର୍ଶ୍ୱରେ ଏହି ଗଛ ଲଗାଯାଉଛି। ହେଲେ ଏହା ଧର୍ମକୁ ଆଖିଠାର। ଗଛ ଲଗାଇବା ପରେ ଏହାକୁ ବଞ୍ଚାଇବା ଲାଗି ସରକାର ବହୁ ଅର୍ଥ ଶ୍ରାଦ୍ଧ କରୁଥିଲେ ହେଁ ବିଭାଗ ଏହାକୁ ଅଣଦେଖା କରୁଛି। ଗଛ ବଞ୍ଚିବା ଲାଗି ଥିବା କୌଣସି ପ୍ରକ୍ରିୟା(ମେଣ୍ଟେନାନ୍ସ)କୁ ଅବଲମ୍ବନ କରାଯାଉନାହିଁ। ଏସବୁ ବାବଦ ଅର୍ଥକୁ ଲୁଟ୍ କରାଯାଉଛି। ପ୍ରାୟ ସମସ୍ତ ବ୍ଲକରେ ଏଭଳି ଘଟଣା ଦେଖିବାକୁ ମିଳୁଥିବା ବେଳେ ଫୁଲବାଣୀ ରେଞ୍ଜ ଅନ୍ତର୍ଗତ ବିଶିପଡା ବିଟ୍ ଗଞ୍ଜୁଗୁଡା ପଞ୍ଚାୟତ ବଇଡା ଗ୍ରାମ ଏହାର ଜ୍ୱଳନ୍ତ ଉଦାହରଣ।
୨୦୨୧-୨୨ ଆର୍ଥତ୍କ ବର୍ଷରେ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନାର ସହାୟକ ପୁନଃଜନନ କାର୍ଯ୍ୟକ୍ରମ ମାଧ୍ୟମରେ ବଇଡା ଗ୍ରାମ ପୋଖରୀ ନିକଟ ଫାଙ୍କା ସ୍ଥାନରେ ବନ ବିଭାଗ ପକ୍ଷରୁ ଚାରାରୋପଣ କରାଯାଇଥିଲା । ମୋଟ ୫୦ ହେକ୍ଟର ସ୍ଥାନରେ ୧୦ ହଜାର ଚାରାରୋପଣ ହୋଇଥିଲା। ଏଥିପାଇଁ ୮ଲକ୍ଷ ୫୯ ହଜାର ଅଟକଳ ମୂଲ୍ୟ ରହିଥିଲା । ସେଥିରୁ ସାମଗ୍ରୀ ବାବଦରେ ୮୭ ହଜାର ଓ ମଜୁରୀ ବାବଦରେ ୭ ଲକ୍ଷ ୭୨ ହଜାର ଟଙ୍କା ଖର୍ଚ୍ଚ ହୋଇଥିବା ସୂଚନା ଫଳକରେ ଉଲ୍ଲେଖ ରହିଛି। ବର୍ତ୍ତମାନ ଏହି ସ୍ଥାନରେ ମାତ୍ର ଅଳ୍ପ ଶୁଖିଲା ଗଛ ଛଡା ଆଉ କିଛି ଥିବା ଦେଖାଯାଉନାହିଁ। ଏଠାରେ ୫୦ ହେକ୍ଟର ଫାଙ୍କା ସ୍ଥାନ ଥିବା ନେଇ ସନ୍ଦେହ ସୃଷ୍ଟି ହେଉଥିବା ବେଳେ ପ୍ରକୃତ ପକ୍ଷେ ୧୦ ହଜାର ଚାରାରୋପଣ କରାଯାଇଛି କି ନାହିଁ ତାହା ମଧ୍ୟ ତଦନ୍ତ ସାପେକ୍ଷ। ଉକ୍ତ ସ୍ଥାନରେ ଖଉ, ପଣସ, ଶିଶୁ, ଜାମୁ ଓ ବରଡା ଶାଗଭଳି ଚାରାରୋପଣ କରାଯାଇଥିଲା। ଶାଳ ବଣ ଭିତରେ ଖୋଲା ସ୍ଥାନରେ ଏଭଳି ଚାରା ଲଗାଯିବା କେତେଦୂର ଯୁକ୍ତିଯୁକ୍ତ ବୋଲି ପ୍ରଶ୍ନବାଚୀ ସୃଷ୍ଟି ହେଉଛି। ଅନ୍ୟପକ୍ଷରେ ଚାରା ରକ୍ଷଣାବେକ୍ଷଣ ପାଇଁ ଲୋକ ନିୟୋଜିତ ହୋଇଥିଲେ ମଧ୍ୟ କେହି ଦାୟିତ୍ୱ ନେଉ ନ ଥିବା ଏହି ରେଞ୍ଜରେ ଅନେକ ସ୍ଥାନରେ ଏଭଳି ପରିଲକ୍ଷିତ ହେଉଛି । ଏ ନେଇ ଫରେଷ୍ଟର ମୋନାଲିସା ପଣ୍ଡାଙ୍କୁ ପଚାରିବାରୁ ସେ କହିଛନ୍ତି, ୨୦୨୧ ଡିସେମ୍ବର ପର୍ଯ୍ୟନ୍ତ ରକ୍ଷଣାବେକ୍ଷଣ ପାଇଁ ଟଙ୍କା ଆସିଥିଲା। ସେ ପର୍ଯ୍ୟନ୍ତ କୋଡା ଖୋସା, ବାଳୁଙ୍ଗା ଘାସ ବଛା, ମରିଥିବା ଗଛ ସ୍ଥାନରେ ନୂଆ ଗଛ ଲଗାଇବା ଓ ଜଳ ସଂଗ୍ରହ ପାଇଁ ଗାତ ଖୋଳିବା ଆଦି କାର୍ଯ୍ୟରେ ଟଙ୍କା ଖର୍ଚ୍ଚ କରାଯାଇଛି। କିନ୍ତୁ ୨୦୨୧ ଡିସେମ୍ବର ଠାରୁ ବର୍ତ୍ତମାନ ପର୍ଯ୍ୟନ୍ତ କୌଣସି ଟଙ୍କା ଆସିନାହିଁ। ଗ୍ରାମ୍ୟ ଉନ୍ନୟନ ସଂସ୍ଥାକୁ ରକ୍ଷଣାବେକ୍ଷଣ ପାଇଁ ପ୍ରସ୍ତାବ ଦିଆଯାଇଛି ବୋଲି ଫରେଷ୍ଟର କହିଛନ୍ତି। ସେହିପରି ଚାରାରୋପଣ ସ୍ଥଳର କାର୍ଯ୍ୟ ଅନୁଧ୍ୟାନ କରାଯିବ ବୋଲି ଫୁଲବାଣୀ ବନଖଣ୍ଡ ଅଧିକାରୀ ପ୍ରଶାନ୍ତ କୁମାର ପଟେଲ କହିଛନ୍ତି।
