କଟକ ଅଫିସ,୨।୧୦: ଦୁର୍ଦ୍ଦାନ୍ତ ଅପରାଧୀ ହାଡ଼ିଆ ଓରଫ ପ୍ରକାଶ ବେହେରା ହତ୍ୟା ଘଟଣାକୁ ଶୁକ୍ରବାର ଏକମାସ ପୂରଣ ହୋଇଛି। ଅଭିଯୁକ୍ତଙ୍କୁ ଚିହ୍ନଟ ସରିଛି ବୋଲି କଟକ ପୋଲିସ କହିଥିଲେ ସୁଦ୍ଧା ସେମାନଙ୍କୁ ଏପର୍ଯ୍ୟନ୍ତ ଗିରଫ କରାଯାଇନାହିଁ। ପୂର୍ବ ଶତ୍ରୁତାକୁ କେନ୍ଦ୍ର କରି ଏହି ହତ୍ୟା ହୋଇଥିବା ପୋଲିସ ସ୍ପଷ୍ଟ କରିଥିଲା। ଘଟଣାର ମୁଖ୍ୟ ଅଭିଯୁକ୍ତଙ୍କୁ ପୋଲିସ ଟ୍ରାକିଂରେ ରଖିଛି। ସେ ଲୁଚିଥିବା ଜଙ୍ଗଲରେ ୩ ଥର ଚଢ଼ାଉ ସରିଲାଣି। ତଥାପି ପୋଲିସକୁ ଚକ୍ମା ଦେଇ ଖସିଯିବାରେ ଅଭିଯୁକ୍ତ ସଫଳ ହେଉଥିବା ଜଣାପଡ଼ିଛି। ହତ୍ୟା ଘଟଣାରେ ଦୁଇଭାଇଙ୍କ ମୁଖ୍ୟ ଭୂମିକା ଥିବାବେଳେ ଏଥିରେ ଅନ୍ୟ କେତେଜଣ ସମ୍ପୃକ୍ତ ଥିବା କୁହାଯାଉଛି। ଏ ସମ୍ପର୍କରେ କଟକ ଡିସିପି ପ୍ରତୀକ ସିଂ କହିଛନ୍ତି, ହତ୍ୟାକାରୀଙ୍କୁ ଧରିବା ପାଇଁ ଚେଷ୍ଟା ଚାଲିଛି। ସେ ଖସିଯିବାକୁ ବାରମ୍ବାର ଉଦ୍ୟମ କରୁଥିଲେ ସୁଦ୍ଧା ତାଙ୍କ ଗତିବିଧି ଉପରେ ପୋଲିସ ନଜର ରଖିଛି। ଖୁବଶୀଘ୍ର ସେ ଧରାପଡ଼ିବେ।
ସୂଚନାଯୋଗ୍ୟ, ହତ୍ୟା, ଦାଦାବଟି ଆଦାୟ, ବୋମାମାଡ଼, ଗଣ୍ଡଗୋଳ, ଆକ୍ରମଣ ଆଦି ବହୁ ଘଟଣାରେ ହାଡ଼ିଆ ସମ୍ପୃକ୍ତ ଥିଲେ। ତାଙ୍କ ନିଜ ଘର ଅଲିଶାବଜାର ଭୂତିଆସାହି ଅଞ୍ଚଳରେ ହୋଇଥିବାବେଳେ ସେ ପରିବାର ସହିତ ବିଡ଼ାନାସୀ ଥାନା ଅନ୍ତର୍ଗତ ଶିବାଜୀନଗରରେ ଘରଭଡ଼ା ନେଇ ରହୁଥିଲେ। ହାଡ଼ିଆଙ୍କ ହତ୍ୟା ନେଇ ସ୍ତ୍ରୀ ପୁଷ୍ପଲତା କେତେଜଣ ସମ୍ପର୍କୀୟଙ୍କ ଉପରେ ଅଭିଯୋଗ ଆଣିଥିଲେ। ହେଲେ ସମ୍ପର୍କୀୟ ନୁହେଁ ବରଂ ଦେଶୀ ମଦ କାରବାରକୁ ନେଇ ଗଣ୍ଡଗୋଳ ଓ ଏଥିରୁ ହତ୍ୟା ହୋଇଛି ବୋଲି ଏବେ ସାମ୍ନାକୁ ଆସିଛି। ଗତ ସେପ୍ଟେମ୍ବର ୨ତାରିଖ ସନ୍ଧ୍ୟାରେ ହାଡ଼ିଆଙ୍କ ଉପରେ ଇପସାର କଲେଜଗଡ଼ା ନିକଟରେ ଆକ୍ରମଣ ହୋଇଥିଲା। ଯେଉଁଥିରେ ତାଙ୍କର ବାମହାତ ସମ୍ପୂର୍ଣ୍ଣ ଭାବେ କଟି ଯାଇଥିଲା।ଅତ୍ୟଧିକ ରକ୍ତସ୍ରାବ ଯୋଗୁ ହାଡ଼ିଆଙ୍କର ମୃତ୍ୟୁ ହୋଇଥିବା ବେଳେ ତାଙ୍କର ଜଣେ ସହଯୋଗୀ ମଧ୍ୟ ଆକ୍ରମଣର ଶିକାର ହୋଇଥିଲେ।
‘ଯେଉଁ ହାତରେ ମାରିଛି, ସେ ହାତକୁ ହାଣିଦିଅ’
ସତୀଚଉରା ଅଞ୍ଚଳରେ ଭଡ଼ା ରହୁଥିବା ଆଠଗଡ଼ର ଜଣେ ଯୁବକ ହିଁ ହାଡ଼ିଆଙ୍କୁ ହତ୍ୟା କରିଥିବା ଜଣେ ପୋଲିସ ଅଧିକାରୀ ନିଜ ନାମ ଗୋପନ ରଖି କହିଛନ୍ତି। କିଛି ଦିନ ହେବ ସେହି ଯୁବକ କଟକ ଆସି ଦେଶୀ ମଦ ବ୍ୟବସାୟ କରୁଥିଲେ। ଯେଉଁଦିନ ହତ୍ୟାକାଣ୍ଡ ଘଟିଲା, ସେଦିନ ସକାଳେ ହାଡ଼ିଆ ଓ ଉକ୍ତ ଯୁବକଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ତେବେ ଗୋଟିଏ ଚାପୁଡ଼ା ହିଁ ଘଟଣାକୁ ହତ୍ୟାର ରୂପ ଦେଲା। ଚା’ ଦୋକାନ ନିକଟରେ ଉଭୟଙ୍କ ଭେଟ ହୋଇଥିଲା। କିଛି ସମୟ ଯୁକ୍ତିତର୍କ ଭିତରେ ହାଡ଼ିଆ ଉକ୍ତ ଯୁବକଙ୍କୁ ବାମହାତରେ ଏକ ଚାପୁଡ଼ା ମାରିଥିଲେ। ଏହି ଦିନ ଦ୍ୱିପହରରେ ହାଡ଼ିଆ ଓ ତାଙ୍କର କେତେଜଣ ସହଯୋଗୀ ଉକ୍ତ ଯୁବକଙ୍କ ଘରେ ପଶି ତାଙ୍କ ବାପା ଓ ମା’ଙ୍କୁ ଗାଳିଗୁଲଜ ମଧ୍ୟ କରିଥିଲେ। ଏ ସଂକ୍ରାନ୍ତରେ ଯୁବକଜଣଙ୍କ କଟକ ବାହାରେ ରହୁଥିବା ନିଜ ବଡ଼ ଭାଇଙ୍କୁ କହିଥିଲେ। ଯେଉଁ ହାତରେ ମାରିଛି ସେ ହାତକୁ ହାଣିଦିଅ ବୋଲି କୁଆଡ଼େ ତାଙ୍କ ବଡ଼ଭାଇ ଫୋନ ଯୋଗେ କହିଥିଲେ। ପରେ ହତ୍ୟା ଯୋଜନା ଆରମ୍ଭ ହୋଇଥିଲା। ସ୍ଥାନୀୟ ଅଞ୍ଚଳର କେତେଜଣ ଯୁବକଙ୍କୁ ଏକଜୁଟ କରାଯାଇଥିଲା। ଏହି ଦିନ ସନ୍ଧ୍ୟାରେ ହିଁ ହାଡ଼ିଆଙ୍କ ଉପରେ ଆକ୍ରମଣ କରାଯାଇଥିଲା।
