ଗୋପାଳପୁର,୨୦।୧୧(ନବୀନ ରାଜ ଆଚାରୀ): ଗଞ୍ଜାମ ଜିଲା ଗୋଳନ୍ଥରା ଥାନା ପୋଲିସ ସୋମବାର ଅପରାହ୍ନରେ ଏକ କୂଅରୁ ଜଣେ ନିଖୋଜ ଯୁବକଙ୍କ ମୃତଦେହ ଠାବ କରିଛି l ଯୁବକ ଜଣକ ହେଲେ ଜେ ଗୋବିନ୍ଦପୁର ଗ୍ରାମର ଟୁଟୁ ନାଇକ (୩୭)। ଏନେଇ ପୋଲିସ ଏକ ହତ୍ୟା ମାମଲା ରୁଜୁ କରି ତଦନ୍ତ ଚଳାଇଛି।
ମିଳିଥିବା ସୂଚନା ମୁତାବକ, ଗୋବିନ୍ଦପୁର ଗ୍ରାମର ଟୁଟୁ ନାଇକଙ୍କ ସହ ଚାନ୍ଦପୁର ଗ୍ରାମର ଜଣେ ମହିଳାଙ୍କ ସହିତ ପ୍ରେମ ସମ୍ପର୍କ ଗଡି ଉଠିଥିଲା l ଏନେଇ ମହିଳାଙ୍କ ଭାଇ ଓ ବାପା ପୂର୍ବରୁ ଟୁଟୁକୁ ବିଭିନ୍ନ ସମୟ ଧମକ ଦେଇଆସୁଥିଲେ।
ଶନିବାର ସନ୍ଧ୍ୟାରେ ଟୁଟୁଙ୍କୁ ମହିଳା ଜଣକ ଫୋନ କରି ଘରକୁ ଆସିବାକୁ ଡାକିଥିଲେ। ପରେ ଟୁଟୁ ମହିଳାଙ୍କ ପାଖକୁ ଯାଇଥିଲେ। ହେଲେ ରାତିରେ ଟୁଟୁ ଆଉ ଘରକୁ ଫେରି ନ ଥିଲେ । ଏ ନେଇ ପରିବାର ଲୋକ ଖୋଜା ଖୋଜି କରିଥିଲେ। ହେଲେ ଟୁଟୁଙ୍କ କୌଣସି ପାଇ ନ ଥିଲେ। ଏ ନେଇ ଟୁଟୁଙ୍କ ପରିବାର ଲୋକ ଗୋଳନ୍ଥରା ଥାନାରେ ଲିଖିତ ଅଭିଯୋଗ କରିଥିଲେ l ପୋଲିସ ଏକ ନିଖୋଜ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା l ସୋମବାର ସକାଳେ ଚାନ୍ଦାପୁର ଗ୍ରାମ ସ୍କୁଲ ନିକଟରେ ଟୁଟୁଙ୍କ ଚପଲ ଓ ଗାମୁଛା ପୋଲିସ ଜବତ କରିଥିଲା।
କିଛି ସମୟ ପରେ ଗ୍ରାମର ଶେଷ ଭାଗର ରେଳ ଧାରଣା ନିକଟସ୍ଥ ଏକ ପରିତ୍ୟକ୍ତ କୂଅରୁ ଟୁଟୁଙ୍କ ମୃତଦେହ ପୋଲିସ ଠାବ କରିଥିଲା। ଖବର ପାଇ ବ୍ରହ୍ମପୁର ସଦର ଏସ୍ଡ଼ିପିଓ ଶିବ ଶଙ୍କର ମହାପାତ୍ର ଏବଂ ଥାନା ଅଧିକାରୀ ବିବେକାନନ୍ଦ ମହନ୍ତ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲେ। ତଦନ୍ତ ବେଳେ ଟୁଟୁଙ୍କ ମୁହଁ ଏବଂ ମୁଣ୍ଡରେ ଗଭୀର କ୍ଷତ ଚିହ୍ନ ଥିବା ଜଣାପଡିଛି। ଏନେଇ ପୋଲିସ ଟୁଟୁଙ୍କୁ ହତ୍ୟା କରି ପରବର୍ତ୍ତୀ ସମୟରେ କୂଅରେ ଫିଙ୍ଗି ଦେଇଥିବା ପୋଲିସ ଅନୁମାନ କରୁଛି। ହେଲେ ହତ୍ୟା କାଣ୍ଡରେ ୩ରୁ ୪ଜଣ ବ୍ୟକ୍ତି ସମ୍ପୃକ୍ତ ଥିବା ପୋଲିସ ସନ୍ଦେହ କରୁଛି l
ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ବ୍ରହ୍ମପୁର ବଡ଼ ମେଡିକାଲ ପଠାଇଛି। ଏନେଇ ମୃତ ଟୁଟୁଙ୍କ ସ୍ତ୍ରୀ ଗୋଳନ୍ଥରା ଥାନାରେ ଏକ ଲିଖିତ ଅଭିଯୋଗ କରିଛନ୍ତି। ପୋଲିସ ଅଭିଯୋଗକୁ ଭିତ୍ତି କରି ଏକ ମାମଲା(ନଂ.୫୯୫/୨୩) ରୁଜୁ କରିଛି। ଏନେଇ ଥାନା ଅଧିକାରୀ ବିବେକାନନ୍ଦ ମହନ୍ତଙ୍କୁ ପଚାରିବାରୁ ପୋଲିସ ମାମଲାର ତଦନ୍ତ ଚଳାଇଛି। ଖୁବ୍ ଶୀଘ୍ର ଅଭିଯୁକ୍ତମାନଙ୍କୁ ଚିହ୍ନଟ କରି ଗିରଫ କରାଯିବ ବୋଲି ସେ କହିଛନ୍ତି।
