ଅହମଦାବାଦ,୨୮ା୮: ଗୁଜରାଟ ଉର୍ଜା ବିକାଶ ନିଗମ ଲିମିଟେଡ୍ (ଜିୟୁଭିଏନ୍ଏଲ୍) ଆଦାନୀ ପାଓ୍ବାର ମୁନ୍ଦ୍ରା ଲିଃ (ଏପିଏମ୍ୟୁଏଲ୍)କୁ ଗତ ୫ ବର୍ଷ ମଧ୍ୟରେ ବିଦ୍ୟୁତ୍ ଦେୟ ବାବଦକୁ ପ୍ରାୟ ୩,୮୦୨ କୋଟି ଟଙ୍କା ଅଧିକ ପଇଠ କରିଥିବା ବିରୋଧୀ କଂଗ୍ରେସ ଅଭିଯୋଗ ଆଣିଛି। ଗୁଜରାଟ କଂଗ୍ରେସ ସଭାପତି ଶକ୍ତିସିଂ ଗୋହିଲ ଏହାକୁ ଶାସକ ଭାଜପା ଆଶୀର୍ବାଦରେ ଆଦାନୀ ପାଓ୍ବାର ଦ୍ୱାରା ଖୋଲା ଦୁର୍ନୀତି ଓ ମନି ଲଣ୍ଡରିଂ ମାମଲା ଭାବେ ଅଭିହିତ କରିଛନ୍ତି।
୨୦୨୩ ମେ’ ୧୫ରେ ଜିୟୁଭିଏନ୍ଏଲ୍ ପକ୍ଷରୁ ଆଦାନୀ ପାଓ୍ବାରକୁ ୩,୮୦୨ କୋଟି ଟଙ୍କାର ରିକଭରି ପାଇଁ ଦିଆଯାଇଥିବା ପତ୍ରକୁ ମଧ୍ୟ ସେ ଲୋକଲୋଚନକୁ ଆଣିଛନ୍ତି। ଜିୟୁଭିଏନ୍ଏଲ୍ ଏବଂ ଆଦାନୀ ପାଓ୍ବାର ମଧ୍ୟରେ ସ୍ବାକ୍ଷରିତ ୨ଟି ପାଓ୍ବାର ପର୍ଚେଜ୍ ଏଗ୍ରିମେଣ୍ଟ (ପିପିଏ) ବଳରେ ଆଦାନୀ ପାଓ୍ବାରକୁ ଅତ୍ୟଧିକ ୩,୮୦୨ କୋଟି ଟଙ୍କା ପଇଠ କରାଯାଇଥିଲା। ଜିୟୁଭିଏନ୍ଏଲ୍ ନିଜ ପତ୍ରରେ ଆଦାନୀ ପାଓ୍ବାରଠାରୁ କୋଇଲା କିଣାର ଇନ୍ଭଏସ୍/ଦସ୍ତାବିଜ ମାଗିଛି। ଶିଳ୍ପପତି ଗୌତମ ଆଦାନୀଙ୍କ କମ୍ପାନୀ ସବୁବେଳେ କେତେଜଣ ନିର୍ଦ୍ଦିଷ୍ଟ ଯୋଗାଣକାରୀଙ୍କଠାରୁ କମ୍ ମୂଲ୍ୟରେ କୋଇଲା କିଣିଥାଏ। ପତ୍ରରେ କରାଯାଇଥିବା ଦାବି ମୁତାବକ କୌଣସି ଦସ୍ତାବିଜ ଦାଖଲ କରାଯାଇ ନ ଥିଲେ ମଧ୍ୟ ୨୦୧୮ରୁ ୨୦୨୩ ମଧ୍ୟରେ ଜିୟୁଭିଏନ୍ଏଲ୍ ଆଦାନୀ ପାଓ୍ବାରକୁ ୩,୮୦୨ କୋଟି ଟଙ୍କା ଦେଇଛି। ବିନା ଇନ୍ଭଏସ୍ରେ ଦେୟ ପଇଠ କରିବାକୁ ଜିୟୁଭିଏନ୍ଏଲ୍ ଅଧିକାରୀମାନେ ଆଗ୍ରହ ପ୍ରକାଶ କରୁ ନ ଥିଲେ ବି ଟଙ୍କା ଦେବା ପାଇଁ ସେମାନଙ୍କ ଉପରେ ଚାପ ପଡ଼ିଥାଇପାରେ ବୋଲି ଗୋହିଲ କହିଛନ୍ତି। ଗୋହିଲଙ୍କ ମତରେ ଶକ୍ତି ବିଭାଗ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ (ସିଏମ୍ଓ) ଅଧୀନରେ ଆସୁଥିବାରୁ ସେଠାରୁ ନିର୍ଦ୍ଦେଶ ପାଇଁ ଅଧିକାରୀମାନେ ଦେୟ ପଇଠ କରିଥାଇପାରନ୍ତି। ସେ ଏହାକୁ ଆଦାନୀଙ୍କ ମନି ଲଣ୍ଡରିଂ ଭାବେ ଅଭିହିତ କରିବା ସହ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) କିମ୍ବା ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଦ୍ୱାରା ଏହାର ତଦନ୍ତ କାହିଁକି କରାଯାଉନାହିଁ ବୋଲି ପ୍ରଶ୍ନ କରିଛନ୍ତି। ସମ୍ଭବତଃ ସରକାର ହିଣ୍ଡେନ୍ବର୍ଗ ରିସର୍ଚ୍ଚର ପ୍ରଘଟ ପରେ ସରକାର ଚେଇଁ ଉଠିଥିବା ଗୋହିଲ ସମାଲୋଚନା କରିଛନ୍ତି।
