ଅହମଦାବାଦ,୯।୧୦ : ଚାଲୁକ୍ୟ ରାଜବଂଶ ଦ୍ୱାରା ନିର୍ମିତ ସୂର୍ଯ୍ୟ ମନ୍ଦିର ପାଇଁ ପ୍ରସିଦ୍ଧ ଗୁଜରାଟର ମେହସାଣାର ମୋଢେରା ଗାଁ ନାମରେ ରବିବାର ସନ୍ଧ୍ୟାରେ ଏକ ଐତିହାସିକ ସଫଳତା ଯୋଡି ହେବ। ରବିବାର ସନ୍ଧ୍ୟାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମୋଢେରାକୁ ଦେଶର ପ୍ରଥମ ସୌର ବିଦ୍ୟୁତ ଚାଳିତ ଗାଁ ବୋଲି ଘୋଷଣା କରିବେ। ମୋଢେରାର ପ୍ରତ୍ୟେକ ଘରକୁ ସୋଲାର ପ୍ୟାନେଲରୁ ୨୪ ଘଣ୍ଟା ସୌର ଶକ୍ତି ମିଳିବ। ଗାଁରେ ଏଥିପାଇଁ ପ୍ରାୟ ୧୩୦୦ ଟି ସୋଲାର ପ୍ୟାନେଲ ଲଗାଯାଇଛି। ବିଶ୍ୱ ପର୍ଯ୍ୟଟନ ମାନଚିତ୍ରରେ ସ୍ଥିତି ସୁଦୃଢ଼ ପାଇଁ ଏଠାରେ ୩,୯୦୦ କୋଟି ଟଙ୍କା ମୂଲ୍ୟ ଯୋଜନାର ମୂଳଦୁଆ ଏହା ସହିତ ପ୍ରଧାନମନ୍ତ୍ରୀ ମୋଦିଙ୍କ ଦ୍ୱାରା ପକାଯିବ।
ମୋଢେରା ଏକ ସଂରକ୍ଷିତ ପ୍ରତ୍ନତାତ୍ତ୍ୱିକ ସ୍ଥାନ, ଯାହାର ଐତିହାସିକ ସୂର୍ଯ୍ୟ ମନ୍ଦିରରେ ମଧ୍ୟ ରବିବାର ଠାରୁ ଥ୍ରୀ-ଡି ପ୍ରୋଜେକ୍ଟ ସୁବିଧା ଆରମ୍ଭ ହେବ। ପ୍ରଧାନମନ୍ତ୍ରୀଙ୍କ ଦ୍ୱାରା ସୌର ଚାଳିତ ଥ୍ରୀ- ଡି ପ୍ରୋଜେକ୍ଟ ଉତ୍ସର୍ଗ କରାଯିବ ଏବଂ ଏହା ପର୍ଯ୍ୟଟକ ଏବଂ ଭକ୍ତମାନଙ୍କୁ ପ୍ରତ୍ୟେକ ସନ୍ଧ୍ୟାରେ ମୋଢେରାର ସମ୍ମାନଜନକ ଇତିହାସ ସହିତ ପରିଚିତ କରାଇବ। ଗୁଜରାଟ ସରକାରଙ୍କ ଅନୁଯାୟୀ ଏହି ପ୍ରକଳ୍ପ ଅଧୀନରେ ମନ୍ଦିର ପରିସରରେ ଆଲୋକ ବ୍ୟବସ୍ଥା କରାଯାଇଛି। ଏହାକୁ ଦେଖିବା ପାଇଁ ସାଧାରଣ ଜନତା ସନ୍ଧ୍ୟା ୬ ଟାରୁ ରାତି ୧୦ ଟା ପର୍ଯ୍ୟନ୍ତ ମନ୍ଦିର ପରିଦର୍ଶନ କରିପାରିବେ। ସୂର୍ଯ୍ୟ ମନ୍ଦିର ପୁଷ୍ପାବତୀ ନଦୀ କୂଳରେ ମେହସାଣା ଜିଲାର ମୋଢେରା ଠାରେ ଅବସ୍ଥିତ। ଏହି ମନ୍ଦିର ୧୦୨୬-୨୭ ମଧ୍ୟରେ ଚାଲ୍ୟୁକ ରାଜବଂଶର ମହାରାଜା ଭୀମ ପ୍ରଥମଙ୍କ ଦ୍ୱାରା ନିର୍ମିତ ହୋଇଥିଲା।
