ଅହମଦାବାଦ,୧୩।୧୧ : ଗୁଜରାଟ ବିଧାନସଭା ନିର୍ବାଚନରେ ନଭସାରୀ ବିଧାନସଭାର ୧୮ ଟି ଗାଁର ଲୋକମାନେ ସମସ୍ତ ରାଜନୈତିକ ଦଳର ଚିନ୍ତା ବଢ଼ାଇଛନ୍ତି। ଏହି ଗ୍ରାମବାସୀ ନିର୍ବାଚନରେ ଭୋଟ ନଦେବାକୁ ଘୋଷଣା କରିଛନ୍ତି। କେବଳ ଏତିକି ନୁହେଁ, ଭାଜପା ଏବଂ ଅନ୍ୟ ଦଳର ନେତାଙ୍କ ଆଗମନ ଏବଂ ଗାଁରେ ପ୍ରଚାର ମଧ୍ୟ ନିଷେଧ କରାଯାଇଛି।
ସୂଚନାନୁସାରେ, ଏଠାରେ ଥିବା ଆଞ୍ଚେଲି ରେଳ ଷ୍ଟେଶନରେ ଲୋକାଲ ଟ୍ରେନ ରହଣୀ ପାଇଁ ଗ୍ରାମବାସୀ ଦୀର୍ଘ ସମୟ ଧରି ଦାବୀ କରିଆସୁଥିଲେ ମଧ୍ୟ ସେମାନଙ୍କର ଦାବୀକୁ ଗ୍ରହଣ କରାଯାଉନାହିଁ। ଏହି କାରଣରୁ ସେମାନେ ରାଗିଛନ୍ତି। ଆଞ୍ଚେଲି ରେଳ ଷ୍ଟେଶନ ଏବଂ ଅନ୍ୟାନ୍ୟ ଷ୍ଟେଶନରେ ଗ୍ରାମବାସୀଙ୍କ ପକ୍ଷରୁ ବ୍ୟାନର ମଧ୍ୟ ଲଗାଯାଇଛି। ଏହା ଉପରେ ଲେଖା ଅଛି, ‘ଟ୍ରେନ ନାହିଁ ତ ଭୋଟ ନାହିଁ’।
ରେଳ ଷ୍ଟେଶନରେ ଟ୍ରେନ ଅଟକୁ ନ ଥିବାରୁ ସେମାନେ ଅନେକ ସମସ୍ୟାର ସମ୍ମୁଖୀନ ହେଉଛନ୍ତି ବୋଲି ଗ୍ରାମବାସୀ କହିଛନ୍ତି। ଅନ୍ୟ ସ୍ଥାନକୁ ଯିବାକୁ ଜଣେ ବ୍ୟକ୍ତିଙ୍କୁ ଅତି କମରେ ୩୦୦ ଟଙ୍କା ଖର୍ଚ୍ଚ କରିବାକୁ ପଡୁଛି। ଏହାଯୋଗୁ ଗାଁରେ ରହୁଥିବା ଛାତ୍ରୀଛାତ୍ରମାନେ ମଧ୍ୟ ଅଧ୍ୟୟନରେ ଅସୁବିଧାର ସମ୍ମୁଖୀନ ହେଉଛନ୍ତି। ପ୍ରାୟତଃ ସେମାନଙ୍କର କଲେଜ ଯିବାକୁ ବିଳମ୍ବ ହେଉଛି।
ସ୍ଥାନୀୟ ବାସିନ୍ଦା କହିଛନ୍ତି ୧୯୬୬ ମସିହାରୁ ଆଞ୍ଚେଲି ରେଳ ଷ୍ଟେଶନରେ ଟ୍ରେନ ଅଟକୁ ଥିଲା। ତେବେ କରୋନା ମହାମାରୀ ସମୟରେ ଟ୍ରେନଗୁଡିକ ଏହି ଷ୍ଟେଶନରେ ଅଟକି ଯିବା ବନ୍ଦ କରି ଦେଇଥିଲେ। ବର୍ତ୍ତମାନ ସବୁକିଛି ସ୍ବାଭାବିକ ହୋଇଗଲେ ମଧ୍ୟ ଟ୍ରେନ ଏଠାରେ ଅଟକୁ ନାହିଁ। ଗ୍ରାମବାସୀ କହିଛନ୍ତି ଯେ ଯଦି ଟ୍ରେନ ଏଠାରେ ନ ଅଟକେ ତେବେ ମତଦାନ ଦିନ କେହି ଭୋଟ ଦେବାକୁ ଯିବେ ନାହିଁ।
