ପାରାଦୀପ,୧୮ା୫(ସ୍ବ.ପ୍ର.): ପାରାଦୀପ ତଥା ଆଖପାଖ ଅଞ୍ଚଳରେ ପ୍ରଦୂଷଣ ମାତ୍ରା କ୍ରମାଗତ ଭାବେ ବଢ଼ିବାରେ ଲାଗିଛି। ଜଳ,ବାୟୁ,ମୃତ୍ତିକା ଆଦି ପ୍ରଦୂଷିତ ବୋଲି ରାଜ୍ୟ ଓ କେନ୍ଦ୍ର ସରକାରଙ୍କ ପ୍ରଦୂଷଣ ନିୟନ୍ତ୍ରଣ ବୋର୍ଡ ପକ୍ଷରୁ ସାର୍ବଜନୀନ କରାଯାଇଛି। ଏହା ମଧ୍ୟରେ ଭୂତଳ ଜଳ ମଧ୍ୟ ପ୍ରଦୂଷିତ ହୋଇଗଲାଣି ବୋଲି ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ନିୟମିତ ପରୀକ୍ଷାରୁ ଜଣାପଡିଛି। ପ୍ରତିବର୍ଷ ବୋର୍ଡ ପକ୍ଷରୁ ସ୍ଥଳ ଉପରେ ଥିବା ନଦୀ, କେନାଲ ଜଳର ମାନ ଓ ଗୁଣବତ୍ତା ଉପରେ ପରୀକ୍ଷା କରାଯାଇଥାଏ। ଉକ୍ତ ରିପୋର୍ଟରେ ପାରାଦୀପ ଅନ୍ତେବାସୀ ବ୍ୟବହାର କରୁଥିବା ତାଳଦଣ୍ଡା କେନାଲ ପାଣି ପିଇବା ଗାଧୋଇବା ପାଇଁ ଅନୁପଯୁକ୍ତ ବୋଲି ଦର୍ଶାଯାଇଥିଲା। ସମାନ ଭାବେ ରାଜ୍ୟର ବିଭିନ୍ନ ପ୍ରାନ୍ତର ଭୂତଳ ଜଳ ମଧ୍ୟ ପରୀକ୍ଷା କରାଯାଇଥାଏ। ଏହିକ୍ରମରେ ବୋର୍ଡ ପାରାଦୀପର ମୂଷାଡ଼ିଆ ଓ ବଡ଼ପଡ଼ିଆ ଅଞ୍ଚଳରେ ୨୦୨୨ ଜାନୁୟାରୀରୁ ଡିସେମ୍ବର ମାସ ପର୍ଯ୍ୟନ୍ତ ଜଳ ପରୀକ୍ଷା କରାଯାଇଥିଲା। ସେହି ରିପୋର୍ଟ ଏବେ ବୋର୍ଡର ୱେବସାଇଟ୍ରେ ଉପଲବ୍ଧ ଅଛି। ସେଥିରେ ୧୬ ପ୍ରକାର ମାନକ ବ୍ୟବହାର ସମ୍ପର୍କରେ ରିପୋର୍ଟ ରହିଛି। ସେଥିରୁ ପ୍ରମୁଖ ୩ ପ୍ରକାର ମଣିଷ ଶରୀର ପାଇଁ ନୀରବ ଘାତକ ବୋଲି ଉଲ୍ଲେଖ ଅଛି। ସେଗୁଡ଼ିକ ହେଲା ହାର୍ଡନେସ, ଟିଡିଏସ୍ ଓ କ୍ଲୋରାଇଡ। ଯେଉଁ ନଳକୂପରୁ ପାଣି ଉତ୍ତୋଳନ ବେଳେ ଅଧିକ ଫେଣ ବାହାରେ ତାହା ହାର୍ଡନେସ ବୋଲି ଜନସ୍ବାସ୍ଥ୍ୟ ବିଭାଗର ସହକାରୀ ଯନ୍ତ୍ରୀ ମାନସ ମୁର୍ମୁ କୁହଛନ୍ତି। ସେହିପରି ଅଧିକ ହଳଦିଆ କିମ୍ବା ନାଲି ଭଳି ଦେଖାଗଲେ ସେଥିରେ ଟିଡିଏସ୍ ଅଧିକ। ଲୁହାଳିଆ ଲାଗିଲେ ତାହା ଅଧିକ କ୍ଲୋରାଇଡ। ଏହି ୩ ପ୍ରକାର ପାଣି ବ୍ୟବହାର ଦ୍ୱାରା ମଣିଷ ଶରୀର ଉପରେ କ’ଣ ପ୍ରଭାବ ପଡୁଛି ବୋଲି ପାରାଦୀପ ସରକାରୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର (ବିଜୁ ମେମୋରିଆଲ ହସ୍ପିଟାଲ)ର ଡା. ପ୍ରସନ୍ନ କୁମାର ସାମଲଙ୍କୁ ପଚାରିବାରେ ଉପରୋକ୍ତ ଲକ୍ଷଣ ଥିବା ପାଣି ବ୍ୟବହାର କରୁଥିବା ଲୋକଙ୍କ ଦାନ୍ତ ଓ ମାଢି କ୍ଷୟ ହେବାର ସମ୍ଭାବନା ରହିଛି। ଏଥିସହ ପେଟରୋଗ, କିଡନୀ ଖରାପ, ଲିଭର ସଂକ୍ରମଣ, ଷ୍ଟୋନ ହେବାର ସମ୍ଭାବନା ଅଧିକ ଅଛି। ଏଭଳି ରୋଗୀ ପାରାଦୀପରେ ସାଧାରଣ ଘଟଣା ଭଳି ହୋଇଗଲାଣି।
ଭୂତଳ ଜଳ ପ୍ରଦୂଷିତ ହେବା ସହ ହ୍ରାସ ମଧ୍ୟ ପାଉଛି ବୋଲି ଜନସ୍ବାସ୍ଥ୍ୟ ଯନ୍ତ୍ରୀ ମୁର୍ମୁ କୁହନ୍ତି, ୨୦୧୭-୧୮ରୁ ପାରାଦୀପର ଭୂତଳ ଜଳସ୍ତର ମପା ଯାଉଛି। ବିଜୟଚନ୍ଦ୍ରପୁର, ମୂଷାଡିଆ, ଷଣ୍ଢକୁଦ ଅଞ୍ଚଳରେ ୪ବର୍ଷ ତଳେ ୨୫୦ରୁ ୨୬୦ ମିଟର ତଳେ ସ୍ବଚ୍ଛ ପାଣି ପର୍ଯ୍ୟାପ୍ତ ପରିମାଣରେ ମିଳୁଥିଲା। ଏବେ ସେହି ନଳକୂପଗୁଡ଼ିକରେ ଆଉ ପାଣି ବାହାରୁନାହିଁ। ଯଦି କିଛି ପାଣି ଆସୁଛି ତାହା ଲୌହଯୁକ୍ତ ରହୁଛି। ସେଠାରେ ଏବେ ୩୦୦ ରୁ ୩୧୦ ମିଟର ତଳେ ଯାଇ ଭଲ ପାଣି ଆସୁଛି। ସେଥିପାଇଁ ସରକାରୀ ଭାବେ ଆଉ ଭୂତଳ ଜଳ ବ୍ୟବହାର ନ କରିବାକୁ ଲୋକଙ୍କୁ ପରାମର୍ଶ ଦିଆଯାଇଛି। ସରକାରୀ ଭାବେ ଏବେ ମହାନଦୀରୁ ପାଣି ଆଣି ଯୋଗାଣ ପାଇଁ ପ୍ରକ୍ରିୟା ଆରମ୍ଭ ହୋଇଛି ବୋଲି ସେ କହଛନ୍ତି।
