ମହାମାରୀ କରୋନା ସହ ଲଢ଼ୁଛି ସାରା ବିଶ୍ୱ। ଏଭଳି ସ୍ଥିତିରେ ପ୍ରତ୍ୟେହ ଲକ୍ଷ ଲକ୍ଷ ଲୋକ ଏଥିରେ ସଂକ୍ରମିତ ହେଉଛନ୍ତି। ତେବେ କରୋନାକୁ ହରାଇ ସୁସ୍ଥ ହୋଇଥିବା ରୋଗୀମାନଙ୍କ ମଧ୍ୟରୁ କିଛି ଅନ୍ୟମାନଙ୍କ ସହ ନିଜର ମନକଥା ବାଣ୍ଟୁଛନ୍ତି। ସେମାନେ କେଉଁ ପରିସ୍ଥିତିରୁ ମୁକୁଳିଛନ୍ତି, ରୋଗ ପ୍ରତି କେତେ ସତର୍କ ରହିବା ଜରୁରୀ ତାହା କହୁଛନ୍ତି। ଏହି କ୍ରମରେ ଆମେରିକାର ଲସ୍ ଆଞ୍ଜେଲସ୍ରେ ରହୁଥିବା ଜଣେ ବ୍ୟକ୍ତି କରୋନା ତାଙ୍କ ଉପରେ ବିତିଥିବା ଦୁଃଖଦାୟକ ସମୟ ନେଇ କହିଛନ୍ତି। ଯାହାକି ଏବେ ଚର୍ଚ୍ଚାର ବିଷୟ ପାଲଟିଛି। ସେ କରୋନାରେ ପୀଡ଼ିତ ହୋଇ ୨ ମାସରୁ ଅଧିକ ସମୟ ଧରି ହସ୍ପିଟାଲରେ ଭର୍ତ୍ତି ହୋଇଥିଲେ। କରୋନାକୁ ଲୋକମାନେ ଗମ୍ଭୀରତାର ସହ ନିଅନ୍ତୁ। ନଚେତ ତାଙ୍କ ଭଳି ଆଙ୍ଗୁଳି କାଟିବାକୁ ପଡ଼ିପାରେ ବୋଲି ସେ କହିଛନ୍ତି।
ବ୍ୟକ୍ତିଜଣଙ୍କ ହେଲେ ୫୪ ବର୍ଷୀୟ ଗ୍ରେଗ୍ ଗାରଫିଲ୍ଡ। କରୋନା ସଂକ୍ରମଣର ପ୍ରାରମ୍ଭିକ ଦିନରେ ସେ ଇଟାଲୀକୁ ବୁଲିବାକୁ ଯାଇଥିବା ବେଳେ ସଂକ୍ରମିତ ହୋଇଯାଇଥିଲେ। ତେବେ ଆମେରିକା ଫେରିବା ପରେ ସେ ଅସୁସ୍ଥ ହୋଇଥିଲେ। ପରେ ଆମେରିକାର ଏକ ହସ୍ପିଟାଲରେ ପ୍ରଥମ ରୋଗୀ ଭାବେ ଗ୍ରେଗ୍ ଭର୍ତ୍ତି ହୋଇଥିଲେ। ଏହାର ୪୮ ଘଣ୍ଟା ମଧ୍ୟରେ ତାଙ୍କ ଅବସ୍ଥା ଗୁରୁତର ହୋଇଥିଲା। ଫଳରେ ତାଙ୍କୁ ଭେଣ୍ଟିଲେଟରରେ ରଖିବାକୁ ପଡ଼ିଥିଲା। ତାଙ୍କର ବଞ୍ଚିବାର ଆଶଙ୍କା ୧ ପ୍ରତିଶତ ବୋଲି ଡାକ୍ତରମାନେ କହିଥିଲେ।
ନିଶ୍ୱାସ ପ୍ରଶ୍ୱାସ ନେବାରେ ଗ୍ରେଗ୍ କଷ୍ଟ ଅନୁଭବ କରିବା ସହ ବୃକକ୍(କିଡନୀ) ଏବଂ ଯକୃତ(ଲିଭର୍) ଫେଲ୍ ହୋଇଥିଲା। ଫଳରେ ୬୪ ଦିନ ଧରି ତାଙ୍କୁ ଡାକ୍ତରଖାନାରେ ରହିବାକୁ ପଡ଼ିଥିଲା। ସେଥିରୁର ୩୧ ଦିନ ସେ ଭେଣ୍ଟିଲେଟରରେ ଥିଲେ। ମେ’ ୮ରେ ତାଙ୍କୁ ହସ୍ପିଟାଲ୍ରୁ ଡିସ୍ଚାର୍ଜ ମିଳିଥିଲା। ହେଲେ ଗ୍ରେଗ୍ଙ୍କୁ ଏବେ କରୋନା ପାଇଁ ସାରା ଜୀବନ କଷ୍ଟ ସହିବାକୁ ପଡ଼ିବ। କାରଣ ତାଙ୍କୁ ତାଙ୍କୁ ନିଜର ଦୁଇହାତର ଆଙ୍ଗୁଠି କାଟିବାକୁ ପଡ଼ିଛି। ରକ୍ତ ପ୍ରବାହ ହେବାରେ ଅସୁବିଧା ହେବାରୁ ଏପରି କରାଯାଇଥିବା ଡାକ୍ତରମାନେ ତାଙ୍କୁ କହିଛନ୍ତି।
