ଦେବଗଡ଼,୨୩ା୬(ଶଶାଙ୍କ ଶେଖର ଝାଙ୍କର)- ଦେବଗଡ଼ ଜିଲାରେ ସରକାରୀ ନିୟମ ପାଳନ ହେଉନି। ସରକାର ଭିଏଲ୍ଏଲ୍ ମାଧ୍ୟମରେ ନିର୍ମାଣ କାର୍ଯ୍ୟ କରିବାର ଡିଣ୍ଡିମ ପିଟିଥିଲେ ହେଁ ଅଧିକରୁ ଅଧିକ ଡିପାର୍ଟମେଣ୍ଟାଲ କାମ ହେଉଛି। ତେବେ ଡିପାର୍ଟମେଣ୍ଟାଲ କାମଗୁଡିକ ବିକ୍ରି ହେଉଥିବା ନଜରକୁ ଆସୁଛି। ସରକାରୀ ଦଳର କେତେଜଣ ର୍ନିଦ୍ଦିଷ୍ଟ ନେତା ଏବଂ ପ୍ରଭାବଶାଳୀ ବ୍ୟକ୍ତି ମୋଟା ଅଙ୍କର ଟଙ୍କା ନେଇ ଉକ୍ତ ନିର୍ମାଣ କାର୍ଯ୍ୟ ବାବଦୀୟ ଠିକା ବିକ୍ରି କରୁଛନ୍ତି। ସରକାରଙ୍କ ନୂତନ ମାର୍ଗଦର୍ଶିକା ଅନୁଯାୟୀ ‘ବିକଶିତ ଗଁା, ବିକଶିତ ଓଡିଶା’ ଯୋଜନାରେ ଆସିଥିବା କାମଗୁଡିକ ମଧ୍ୟରୁ ପଞ୍ଚାୟତସ୍ତରରେ ୪୦ ପ୍ରତିଶତ କାମ ବିଧାୟକଙ୍କ ସୁପାରିଶରେ କରାଯାଇପାରିବ। ମାତ୍ର ଶତ ପ୍ରତିଶତ ନିର୍ମାଣ କାର୍ଯ୍ୟର ଠିକାରେ ବିକ୍ରି ପାଇଁ ସରକାରୀ ଦଳ ତତ୍ପର ରହିଛି। ଏହାକୁ ନେଇ ଗଣ୍ଡଗୋଳ ହେଉଛି। ଯଦ୍ୱାରା ଆଗାମୀ ଦିନରେ ଦେବଗଡ଼ ଜିଲାରେ ହେବାକୁ ଥିବା ପ୍ରଗତୀରେ ବାଧା ସୃଷ୍ଟି କରିବ। ତେଣୁ ଠିକା କାମ ବିକ୍ରି ନ ହୋଇ ଠିକ୍ ମାର୍ଗଦର୍ଶିକା ଅନୁଯାୟୀ ଉନ୍ନୟନ କାର୍ଯ୍ୟ କରାଯାଉ ବୋଲି ରବିବାର ଜିଲା ବିଜେଡି କାର୍ଯ୍ୟାଳୟରେ ଆୟୋଜିତ ଖବରଦାତା ସମ୍ମିଳନୀରେ ବିଧାୟକ ରୋମାଞ୍ଚ ରଞ୍ଜନ ବିଶ୍ୱାଳ କହିଛନ୍ତି। ସେ ଆହୁରି କହିଛନ୍ତି, ଜିଲାରେ ବେକାରୀ ସମସ୍ୟା ବୃଦ୍ଧି ପାଇଥିବାବେଳେ ଘରୋଇ ଏଜେନ୍ସି ତଥା ସର୍ଭିସ ପ୍ରୋଭାଇଡର ଜରିଆରେ ଛୋଟମୋଟ ନିଯୁକ୍ତି ପ୍ରଦାନ କରାଯାଉଛି। ତଥାପି ଠିକ୍ ପ୍ରକ୍ରିୟାରେ ନିଯୁକ୍ତି ଦିଆଯାଉ ନାହିଁ। ଜିଲାରେ ହଜାର ହଜାର ବେକାର ଯୁବତୀଯୁବକ ରହିଥିବାବେଳେ ଅସାଧୁ ଅଧିକାରୀ ଓ କର୍ମଚାରୀଙ୍କ ହସ୍ତକ୍ଷେପ ଯୋଗୁ ଜିଲା ବାହାରର ଯୁବତୀଯୁବକଙ୍କୁ ନିଯୁକ୍ତି ଦିଆଯାଉଛି। ଏଥିପାଇଁ ମୋଟା ଅଙ୍କର ଅର୍ଥ ଆଦାୟ କରାଯାଉଛି। ଆଗାମୀ ଦିନରେ ଖବରକାଗଜରେ ବିଜ୍ଞାପନ ପ୍ରକାଶ କରାଯାଇ ଜିଲା ନିୟୋଜନ କେନ୍ଦ୍ରରେ ପଞ୍ଜୀକୃତ ହୋଇଥିବା ସ୍ଥାନୀୟ ଯୁବତୀଯୁବକଙ୍କୁ ନିଯୁକ୍ତି ପ୍ରଦାନ ପାଇଁ ସେ ସରକାରଙ୍କ ନିକଟରେ ଦାବି କରିଛନ୍ତି।
ଅନ୍ୟପକ୍ଷରେ ଜିଲାରେ ଥିବା ପଥର ଏବଂ ବାଲି ଲଘୁ ଖଣିଜର ସୈରାତ ଉତ୍ସରେ ବ୍ୟାପକ ଅନିୟମିତତା ଦେଖାଦେଇଛି। ବେଆଇନ ଭାବେ ଏକାଧିକ ସୈରାତ ଉତ୍ସ ଚାଲିଛି। ଜିଲାରେ ୬ଟି ବାଲିଘାଟ ଏବଂ ୩ଟି ପଥର କ୍ୱାରୀ ରହିଛି। ହେଲେ ଏହାଠାରୁ ଅଧିକ ସୋରାତ ଉତ୍ସରୁ ବେଆଇନ ଭାବେ ଖଣିଜ ପଦାର୍ଥ ଉତ୍ତୋଳନ କରାଯାଇ ଚୋରାଚାଲାଣ ହେଉଛି। ରିଆମାଳ ବ୍ଲକ ଅଧୀନ ବୁଢାପାଳ ଅଞ୍ଚଳରେ ଥିବା ଏକ ଘାଟରୁ ଚଢା ଦରରେ ବେଆଇନ ଭାବେ ଅନୁଗୋଳ ଜିଲାର ଏକ କାରଖାନାକୁ ବାଲି ଯୋଗାଣ ହେଉଛି। ଏଭଳି ଅନିୟମିତତା ସମ୍ପର୍କରେ ବିଧାୟକ ବିଶ୍ୱାଳ ଖଣି ବିଭାଗ ନିର୍ଦ୍ଦେଶକଙ୍କ ନିକଟରେ ଲିଖିତ ଅଭିଯୋଗ କରିଥିଲେ ମଧ୍ୟ ଏପର୍ଯ୍ୟନ୍ତ କୌଣସି ପଦକ୍ଷେପ ନିଆଯାଇ ନାହିଁ। ଫଳରେ ବିଧାୟକ ଗତ ୧୬ ତାରିଖରେ ମୁଖ୍ୟ ଶାସନ ସଚିବଙ୍କ ନିକଟରେ ଏନେଇ ଲିଖିତ ଅଭିଯୋଗ କରିଛନ୍ତି। ଏହାସତ୍ତ୍ୱେ ଅନିୟମିତତା ରୋକିବା ପାଇଁ କୌଣସି ପଦକ୍ଷେପ ଗ୍ରହଣ କରା ନ ଗଲେ ଆଗାମୀ ଦିନରେ ବଡ ଧରଣର ଆନ୍ଦୋଳନ କରାଯିବ ବୋଲି ଖବରଦାତା ସମ୍ମିଳନୀରେ ବିଧାୟକ ଚେତାବନୀ ଦେଇଛନ୍ତି। ଏହି ଖବରଦାତା ସମ୍ମିଳନୀରେ ଜିଲା ଯୁବ ବିଜେଡି ସଭାପତି ପ୍ରତାପ କୁମାର ଦେବ, ଜିଲା ଛାତ୍ର ବିଜେଡି ସଭାପତି ଭବାନୀ ଶଙ୍କର ସାହୁ ,ବାରକୋଟ ବ୍ଲକ ବିଜେଡି ସଭାପତି ହୀରାଲାଲ ସାହୁ, ବରିଷ୍ଠ ନେତା ମନୋଜ କୁମାର ପ୍ରଧାନ, ଚନ୍ଦ୍ରଶେଖର ଭୁକ୍ତା, ମାନସ କୁମାର ପ୍ରଧାନ ଓ ରୂପକ କୁମାର ମାଝୀଙ୍କ ସମେତ ଦଳୀୟ ନେତା ଓ କର୍ମୀ ଉପସ୍ଥିତ ଥିଲେ।
