ନୂଆଦିଲ୍ଲୀ,୪।୧: ଅନ୍ତଃରାଷ୍ଟ୍ରୀୟ ତୈଳ ବଜାରରେ ଅଶୋଧିତ ତୈଳର ମୂଲ୍ୟ କ୍ରମାଗତ ଭାବେ ହ୍ରାସ ପାଉଥିବା ବେଳେ ଭାରତରେ ତା’ର ପ୍ରଭାବ ଦେଖିବାକୁ ମିଳୁନାହିଁ। ଫଳରେ ସବୁ ବର୍ଗର ଗ୍ରାହକ ଉଭୟ ସରକାର ଓ ତୈଳ କମ୍ପାନୀଗୁଡ଼ିକ ଉପରେ ଅସନ୍ତୋଷ ପ୍ରକାଶ କରୁଛନ୍ତି। ଇତିମଧ୍ୟରେ କେନ୍ଦ୍ର ସରକାର ଅତିରିକ୍ତ ଟିକସ ବୃଦ୍ଧି ଲାଗି ନିକଟରେ ୱିଣ୍ଡଫଲ୍ ଟିକସ ହାର ବଢ଼ାଇ ମଙ୍ଗଳବାରଠାରୁ ନୂଆ ଟିକସ ହାର ତୈଳ କମ୍ପାନୀଗୁଡ଼ିକ ଉପରେ ଲାଗୁ କରାଯାଇଥିବା ବିଶେଷ ସୂତ୍ରରୁ ସୂଚନା ମିଳିଛି। ଏପରିକି ଦେଶ ଭିତରେ ଉତ୍ପାଦନ ହେଉଥିବା ଅଶୋଧିତ ତୈଳ, ଡିଜେଲ ଏବଂ ଆଭିଏଶନ ଟର୍ବାଇନ ଫୁଏଲ୍ (ଏଟିଏଫ୍) ଉପରେ ଏହି ବର୍ଦ୍ଧିତ ଟିକସ ଲାଗୁ କରାଯାଇଛି। ସେହିଭଳି ମଙ୍ଗଳବାରଠାରୁ ଅଶୋଧିତ ତୈଳ ଉପରେ ଟନ୍ ପିଛା ୧,୭୦୦ (୨୦.୫୫ ଡଲାର )ରୁ ୨,୧୦୦ (୨୫.୩୮ଡଲାର)କୁ ବୃଦ୍ଧି କରାଯାଇଥିତ୍ବା ବେଳେ ଡିଜେଲ ଉପରେ ରପ୍ତାନି ଟିକସ ଲିଟର ପିଛା ୫ ଟଙ୍କରୁ ୭.୫ଟଙ୍କାକୁ ବୃଦ୍ଧି କରାଯାଇଛି। ସେହିପରି ଏଟିଏଫ୍ ଉପରେ ୱିଣ୍ଡଫଲ୍ ଟ୍ୟାକ୍ସକୁ ଲିଟର ପିଛା ୧.୫ ଟଙ୍କାରୁ ୪.୫ଟଙ୍କାକୁ ବୃଦ୍ଧି କରାଯାଇଥିବା ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି। ଉଲ୍ଲେଖଯୋଗ୍ୟ, ଦେଶ ଭିତରେ ତୈଳ ଉତ୍ପାଦନ କରୁଥିବା ଘରୋଇ କମ୍ପାନୀଗୁଡ଼ିକ ବିଦେଶରୁ ଚଢ଼ା ଦାମ୍ରେ ଲାଭ ହାସଲ କରିବା ପାଇଁ ଅଧିକ ତୈଳ ବାହାରକୁ ରପ୍ତାନି କରିବା ପରେ ଗତ ବର୍ଷ ଜୁଲାଇରେ ସରକାର ତୈଳ ସାମଗ୍ରୀ ରପ୍ତାନି ଉପରେ ୱିଣ୍ଡଫଲ୍ ଟିକସ ଲଗାଇବାକୁ ନିଷ୍ପତ୍ତି ନେଇଥିଲେ। ବର୍ତ୍ତମାନ ସମୟରେ ଭାରତୀୟ ତୈଳ କମ୍ପାନୀଗୁଡ଼ିକ ବ୍ୟାରେଲ ପିଛା ୬୦ ଡଲାରରୁ କମ୍ ଦାମରେ ଅଶୋଧିତ ତେଲ କିଣୁଛନ୍ତି।
