ଭୁବନେଶ୍ୱର,୧୮ା୭ (ସ୍ପୋଟର୍ସ ବ୍ୟୁରୋ): ଭୋପାଳସ୍ଥିତ ତାନ୍ତିଆ ଟୋପେ ଷ୍ଟାଡିୟମରେ ୧୭ତମ ନ୍ୟାଶନାଲ ୟୁଥ୍ ଚାମ୍ପିୟନଶିପ୍ (୧୮ ବର୍ଷରୁ କମ୍) ଶନିବାରଠାରୁ ଆରମ୍ଭ ହୋଇଛି। ଏହି ୩ ଦିନିଆ ଚାମ୍ପିୟନଶିପ୍ରେ ଓଡ଼ିଶାରୁ ୧୦ ଆଥଲେଟ (୩ ବାଳିକା ଓ ୭ ବାଳକ) ଭାଗ ନେଇଛନ୍ତି। ପ୍ରଥମ ଦିବସରେ ଓଡ଼ିଶାର ସବିତା ଟପ୍ପୋ ୧୪.୧୫ ସେକେଣ୍ଡ ଟାଇମିଂରେ ୧୦୦ମିଟର ହର୍ଡଲ୍ସରେ ସ୍ବର୍ଣ୍ଣ ପଦକ ହାସଲ କରିଛନ୍ତି। ଏଥିସହିତ ସେ ୪ର୍ଥ ଏସିଆନ ୟୁଥ୍ ଆଥଲେଟିକ୍ସ ଚାମ୍ପିୟନଶିପ୍ ପାଇଁ ଧାର୍ଯ୍ୟ ଯୋଗ୍ୟତା ଅଙ୍କ (୧୪.୪୪ସେକେଣ୍ଡ) ହାସଲ କରିପାରିଛନ୍ତି। ଏହି ଇଭେଣ୍ଟରେ ତାମିଲନାଡୁର ସାଇନି ଗ୍ଲାଡସିଆ ଓ ତେଲେଙ୍ଗାନାର ଏରୋଲା ପ୍ରଣତି ଯଥାକ୍ରମେ ୧୪.୬୭ ଓ ୧୪.୭୨ ସେକେଣ୍ଡ ଟାଇମିଂରେ ରୌପ୍ୟ ଓ ବ୍ରୋଞ୍ଜ ପଦକ ଜିତିଛନ୍ତି। ୧୧୦ ମିଟର ହର୍ଡଲ୍ସରେ ରାଜେନ୍ଦ୍ର ସିଦ୍ଧୁ ୫ମ ସ୍ଥାନ ଅଧିକାର କରିଛନ୍ତି। ଏହି ଇଭେଣ୍ଟରେ ମହାରାଷ୍ଟ୍ରର ସନ୍ଦୀପ ବିନୋଦ ଗୋଣ୍ଡ ଓ ନୟନ ପ୍ରଦୀପ ସା ସାର୍ଦ୍ଦେ ସ୍ବର୍ଣ୍ଣ ଓ ରୌପ୍ୟ ଜିତିଥିବା ବେଳେ ହରିୟାଣାର ଅନୁଜ କୁମାର ବ୍ରୋଞ୍ଜ ପାଇଛନ୍ତି। ବାଳକ ଟ୍ରିପଲ ଜମ୍ପରେ ଓଡ଼ିଶାର ସ୍ବାଗତ ବେହେରା ୭ମ ସ୍ଥାନ ଅଧିକାର କରିଛନ୍ତି। ସବିତା ଟପ୍ପୋ ଓ ଜାନୁନା ଟୁଡୁ ଲଙ୍ଗଜମ୍ପ ଫାଇନାଲକୁ ଉନ୍ନୀତ ହୋଇଛନ୍ତି। ସେହିପରି ବାଳିକା ୧୦୦ ମିଟରରେ ଡି.ଏମ୍. ଜୟରାମ ପ୍ରଥମ ସେମିଫାଇନାଲରେ ପ୍ରଥମ ସ୍ଥାନ ସହ ଫାଇନାଲ ରାଉଣ୍ଡରେ ପ୍ରବେଶ କରିଛନ୍ତି। ରବିବାର ଲକ୍ଷ୍ମୀପ୍ରିୟା କିଷାନ, ବାପି ହଁାସଦା ଓ ପଙ୍କଜ ମଣ୍ଡଳ ୮୦୦ ମିଟର ଦୌଡ଼ରେ ଭାଗ ନେବେ। ସୂଚନାଯୋଗ୍ୟ, ଆସନ୍ତା ଅକ୍ଟୋବର ୧୩ରୁ ୧୬ ପର୍ଯ୍ୟନ୍ତ କାଠମାଣ୍ଡୁଠାରେ ହେବାକୁଥିବା ୪ର୍ଥ ଏସିଆନ ୟୁଥ୍ ଆଥଲେଟିକ୍ସ ପାଇଁ ଏହି ଚାମ୍ପିୟନଶିପ୍କୁ ଏକ ସିଲେକ୍ସନ ଟ୍ରାଏଲ୍ ଭାବେ ବିବେଚନା କରାଯାଉଛି।
