ସୁନାର ବିରିଆନୀ, ସୁନାର ବଡ଼ା ପାଓ, ସୁନାର ପିଜା ପରେ ଏବେ ସୁନାର ମୋମୋ ଚର୍ଚ୍ଚାକୁ ଆସିଛି। ଭାରତରେ ଷ୍ଟ୍ରିଟ୍ ଫୁଡ୍ ଭାବେ ମୋମୋର ବେଶ୍ ଚାହିଦା ରହିଛି। ସେହି ଚାହିଦାକୁ ଦୃଷ୍ଟିରେ ରଖି ମୁମ୍ବାଇର ଏକ ରେଷ୍ଟୁରାଣ୍ଟ ଗ୍ରାହକଙ୍କ ପାଇଁ ପ୍ରସ୍ତୁତ କରିଛି ୨୪ କ୍ୟାରେଟ ଗୋଲ୍ଡ ପ୍ଲେଟେଡ୍ ବାହୁବଳୀ ମୋମୋ । ଏହାକୁ ଦେଖିବା ପାଇଁ ବି ଲୋକଙ୍କ ଭିଡ଼ ଲାଗୁଛି।
ବାହୁବଳୀ ଗୋଲ୍ଡ ମୋମୋର ଓଜନ ୨ କି.ଗ୍ରା. ରହିଥିଲାବେଳେ ଏହାକୁ ୭ରୁ ୮ ଜଣ ଲୋକ ମିଶି ଖାଇପାରିବେ। ଏହି ମୋମୋରେ ପୂର ଭାବେ ପନିର ଏବଂ ବିଭିନ୍ନ ପନିପରିବା ଦିଆଯାଇଛି। ଏହା ଉପରେ ୨୪ କ୍ୟାରେଟ୍ ସୁନାର ଫଏଲ ରହିଛି। ଯାହା ଖାଇବା ଯୋଗ୍ୟ।
ଏହି ମୋମୋକୁ ଖାଇବା ପାଇଁ ଏଥିରେ ରହିଛି ମିଣ୍ଟ୍ ମୋଜିତୋ, ଚକୋଲେଟ ମୋମୋ ଏବଂ ଭଳିକି ଭଳି ଚଟଣି। ଭାରତରେ ପ୍ରଥମ ଥର ପାଇଁ ଏଭଳି ସ୍ବତନ୍ତ୍ର ମୋମୋକୁ ପ୍ରସ୍ତୁତ କରି ଚର୍ଚ୍ଚାକୁ ଆସିଛି ମୁମ୍ବାଇର ‘ମେସି ଆଡ୍ଡା’ କାଫେ। ତମ୍ବା ପାତ୍ରରେ ଏହି ମୋମୋକୁ ପରଷା ଯାଉଥିବାେଳେ ଏହାର ଦାମ୍ ରହିଛି ୧୨୯୯ ଟଙ୍କା । ଆପଣ ଚାହିଁଲେ ମଧ୍ୟ ଏହାକୁ କିଣି ଖାଇପାରିବେ।
ସୋସିଆଲ ମିଡିଆରେ ଶେୟାର କରାଯିବା ପରେ ଏହି ମୋମୋକୁ ଦେଖି ଲୋକେ ଭିନ୍ନ ଭିନ୍ନ ପ୍ରତିକ୍ରିୟା ଦେଇଛନ୍ତି। ବର୍ତ୍ତମାନ ସୁଦ୍ଧା ଏହି ଭିଡିଓକୁ ୬୦୦୦୦ରୁ ଅଧିକ ଲୋକ ଦେଖିସାରିଲେଣି। ଜଣେ ୟୁଜର କହିଛନ୍ତି, ଏହି ମୋମୋକୁ ଦେଖି ପାଟିରୁ ଲାଳ ବାହାରୁଛି। ସେହିପରି ଆଉ ଜଣେ ୟୁଜର କହିଛନ୍ତି, ସ୍ବାଦିଷ୍ଟ ଦେଖାଯାଉଛି। ଖାଇଲେ ଜାଣିହେବ।
