ଭୁବନେଶ୍ୱର,୭।୫(ବ୍ୟୁରୋ): ଝାରସୁଗୁଡ଼ା ଉପନିର୍ବାଚନ ପାଇଁ ରବିବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରଚାର କରିଛନ୍ତି। ଦଳୀୟ ପ୍ରାର୍ଥତ୍ନୀ ଦୀପାଳି ଦାସଙ୍କୁ ଆଶୀର୍ବାଦ କରିବାକୁ ମୁଖ୍ୟମନ୍ତ୍ରୀ ଜନସାଧାରଣଙ୍କୁ ଅନୁରୋଧ କରିଛନ୍ତି। ପଦ୍ମପୁରରେ ବାପାଙ୍କୁ ହରାଇଥିବା ଜଣେ ଝିଅଙ୍କୁ ବିରୋଧୀ ଦଳ ଯେମିତି ବ୍ୟବହାର କରିଛନ୍ତି, ତାହା ଆପଣମାନେ ଜାଣିଛନ୍ତି। ନବକିଶୋର ଦାସଙ୍କ ଝିଅ ଦୀପାଳିଙ୍କୁ ମଧ୍ୟ ବିରୋଧୀ ସେହିଭଳି ଗାଳି ଦେଉଛନ୍ତି। ଦୀପାଳି ଝାରସୁଗୁଡ଼ା ମାଟିର ଝିଅ, ତାଙ୍କୁ ସେବା କରିବାର ସୁଯୋଗ ଦେବେ। ଝାରସୁଗୁଡ଼ାବାସୀ ଦୀପାଳିଙ୍କୁ ଆଶୀର୍ବାଦ କରନ୍ତୁ ବୋଲି ଅମିଲିପାଲିଠାରେ ଅନୁଷ୍ଠିତ ନିର୍ବାଚନୀ ସଭାରେ ମୁଖ୍ୟମନ୍ତ୍ରୀ ଅନୁରୋଧ କରି କହିଥିଲେ।
ସ୍ବର୍ଗତ ନବକିଶୋର ଜଣେ ଦକ୍ଷ ଓ ଲୋକପ୍ରିୟ ନେତା ଥିଲେ। ସେ ଆଜି ଆମ ଗହଣରେ ନାହାନ୍ତି, କିନ୍ତୁ ତାଙ୍କର ବିକାଶମୂଳକ କାମ ପାଇଁ ଝାରସୁଗୁଡ଼ାବାସୀ ତାଙ୍କୁ ମନେରଖିବେ। ତାଙ୍କ ଦାୟିତ୍ୱ ନେବା ପାଇଁ ତଥା ଲୋକଙ୍କ ସେବା କରିବା ଲାଗି ତାଙ୍କ ସୁଯୋଗ୍ୟ କନ୍ୟା ଦୀପାଳି ଆଗେଇ ଆସିଛନ୍ତି। ସେ ଜଣେ ଉଚ୍ଚଶିକ୍ଷିତା ଏବଂ ସମାଜସେବାରେ ତାଙ୍କର ରୁଚି ରହିଛି। ବିଶ୍ବାସ, ତାଙ୍କୁ ସେବା କରିବାର ସୁଯୋଗ ମିଳିଲେ ଏହାକୁ ସେ ସାକାର କରିପାରିବେ ବୋଲି ମୁଖ୍ୟମନ୍ତ୍ରୀ କହିଥିଲେ। ଝାରସୁଗୁଡ଼ାର ବିକାଶ ହେଉଛି। ଜନସାଧାରଣ ଚାହିଁଲେ ଝାରସୁଗୁଡ଼ା ୧ ନମ୍ବର ଶିଳ୍ପସମୃଦ୍ଧ ସହର ହୋଇପାରିବ। ଏପରି କି ନିର୍ବାଚନରେ ଶାନ୍ତିଶୃଙ୍ଖଳା ରକ୍ଷା କରିବା ଜରୁରୀ ବୋଲି ମୁଖ୍ୟମନ୍ତ୍ରୀ କହିଥିଲେ।
