ନୂଆଦିଲ୍ଲୀ,୧।୮: ଦିଲ୍ଲୀର ଜନ୍ତର-ମନ୍ତରରେ CJP ପ୍ରଦର୍ଶନ ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିରୋଧରେ ଆପତ୍ତିଜନକ ଭାଷା ପ୍ରୟୋଗ କରିଥିବା ଯୁବତୀଜଣକ ସୋସିଆଲ ମିଡିଆରେ ଭିଡିଓ ଜାରି କରି ସମଗ୍ର ଦେଶବାସୀଙ୍କଠାରୁ କ୍ଷମା ମାଗିଛନ୍ତି। ଭାଇରାଲ ହେଉଥିବା ଏହି ଭିଡିଓରେ ଯୁବତୀଜଣକ ବେଶ ଭାବୁକ ନଜର ଆସୁଛନ୍ତି ଏବଂ ନିଜ କାମ ପାଇଁ ଅନୁତାପ କରୁଛନ୍ତି। ଭିଡିଓରେ ଯୁବତୀଜଣକ ଦାବି କରିଛନ୍ତି ଯେ ତାଙ୍କର ବୟସ ମାତ୍ର ୧୫ ବର୍ଷ ଅଟେ। ସେ କହିଛନ୍ତି, ‘ପ୍ରଦର୍ଶନ ସମୟରେ ମୁଁ କିଛି ଲୋକଙ୍କ ପ୍ରରୋଚନାରେ ପଡ଼ିଯାଇଥିଲି ଏବଂ ପ୍ରଧାନମନ୍ତ୍ରୀଜୀଙ୍କ ବିରୋଧରେ ବହୁତ ଭୁଲ କଥା କହିଦେଲି। ମୁଁ ଯାହା କିଛି ବି କଲି, ତାହା କ୍ଷମାଯୋଗ୍ୟ ନୁହେଁ। ମୋ ଦ୍ୱାରା ଏକ ବଡ଼ ଭୁଲ ହୋଇଯାଇଛି, ମୁଁ ଲଜ୍ଜିତ ଏବଂ ନିଜକୁ ଆଇନାରେ ମଧ୍ୟ ଦେଖିପାରୁ ନାହିଁ। ଏହା ମୋର ପ୍ରଥମ ଏବଂ ଶେଷ ଭୁଲ ଅଟେ, ଦୟାକରି ମତେ କ୍ଷମା କରିଦିଅନ୍ତୁ।’
ପ୍ରଧାନମନ୍ତ୍ରୀଙ୍କ ବିରୋଧରେ ଅଶ୍ଳୀଳ ଭାଷା ବ୍ୟବହାର କରିବା ଅଭିଯୋଗରେ ନୋଏଡା ପୋଲିସ ଷ୍ଟେଶନରେ ଏକ ଅଭିଯୋଗ କରାଯାଇଥିଲା। ନୋଏଡା ପୋଲିସ ଏକ ଜିରୋ ଏଫଆଇଆର୍ (Zero FIR) ରୁଜୁ କରି ମାମଲାଟି ନୂଆଦିଲ୍ଲୀର ପାର୍ଲାମେଣ୍ଟ ଷ୍ଟ୍ରିଟ ପୋଲିସ ଷ୍ଟେଶନକୁ ସ୍ଥାନାନ୍ତର କରିଥିଲା। ଅଭିଯୋଗରେ ଦର୍ଶାଯାଇଥିଲା ଯେ ଏଭଳି ମନ୍ତବ୍ୟ ଦ୍ୱାରା ସାମ୍ବିଧାନିକ ପଦବୀର ଗରିମା କ୍ଷୁର୍ଣ୍ଣ ହୋଇଛି ଏବଂ ଏହା ଦ୍ୱାରା ଜନଶାନ୍ତି ଭଙ୍ଗ ହୋଇପାରେ।
