ଥୁଆମୂଳ ରାମପୁର,୯।୮(ଦୁର୍ଗା କୀର୍ତ୍ତି): ନିଖୋଜ ଦାଦନ ଶ୍ରମିକ ଘାସିରାମ ମାଝୀଙ୍କୁ ନେଇ ସୃଷ୍ଟି ହୋଇଥିବା ଆଶଙ୍କା ଶେଷ ହୋଇଛି। କେରଳରେ ଭୟ, ଭାଷାଗତ ସମସ୍ୟା ଓ ମାନସିକ ଚାପ ଯୋଗୁ ଦିଗହରା ହୋଇ ବୁଲୁଥିବା କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ ଅଡ଼ିଗୁନା ଗ୍ରାମର ଘାସିରାମ(୩୦) ଶେଷରେ ପୂର୍ବରୁ କାମ କରୁଥିବା କମ୍ପାନୀରେ ସୁରକ୍ଷିତ ଭାବେ ପହଞ୍ଚିଛନ୍ତି। ନିଖୋଜ ହେବାର ପ୍ରକୃତ କାରଣ ଓ ସେ ଦିନର ଘଟଣା ସମ୍ପର୍କରେ ଧରିତ୍ରୀ ପ୍ରତିନିଧିଙ୍କ ସହ ଫୋନ ଯୋଗେ କଥା ହୋଇ ସବୁ ସତ କଥା ବଖାଣିଛନ୍ତି ଘାସିରାମ।
ଘାସିରାମଙ୍କ କହିବା ଅନୁଯାୟୀ, ଗତ ମାସ ୩୦ ତାରିଖରେ ସେ ଗାଁର ବୀରେନ୍ଦ୍ର ମାଝୀ ଓ ସୁରେନ୍ଦ୍ର ମାଝୀଙ୍କ ସହ କେସିଙ୍ଗା ରେଳ ଷ୍ଟେଶନରୁ କେରଳର ଏର୍ଣ୍ଣାକୁଲମ ଜିଲା କୋଚି ସ୍ଥିତ ଏକ କମ୍ପାନୀରେ କାମ କରିବା ପାଇଁ ଯାଇଥିଲେ।
ଘାସିରାମ ଟ୍ରେନ୍ ଯୋଗେ ଏର୍ଣ୍ଣାକୁଲମ ଷ୍ଟେଶନ ଯାଉଥିଲେ। ହେଲେ ସେ ଶୋଇପଡ଼ିବାରୁ ଏର୍ଣ୍ଣାକୁଲମ ଷ୍ଟେଶନରେ ନ ଓହ୍ଲାଇ ଆଲପୁଝା (ଆଲେପ୍ପି) ଷ୍ଟେଶନରେ ଓହ୍ଲାଇ ଥିଲେ। ହେଲେ ଟିକେଟ ନ ଥିବାରୁ ସେଠାରେ ରେଲୱେ ପୋଲିସ ତାଙ୍କୁ ଅଟକାଇ ପଚରାଉଚୁରା କରିବା ପରେ ଛାଡ଼ି ଦେଇଥିଲା। କିନ୍ତୁ ଭାଷା ନ ବୁଝିପାରିବା ଏବଂ ପ୍ରଥମ ଥର ପୋଲିସର ସାମ୍ନା କରିଥିବାରୁ ସେ ଭୟ ଓ ମାନସିକ ଚାପରେ ସେଠାରୁ ପ୍ରାୟ ୧୩ କିଲୋ ମିଟର ଦୂର ସେଲୱାଇ ଅଞ୍ଚଳକୁ ଚାଲି ଯାଇଥିଲେ।
ରାତି ପ୍ରାୟ ୧ଟା ସମୟରେ କାଞ୍ଜିକୋଡେ(କାଞ୍ଜିକୁଡି) ନାମକ ଗାଁରେ ତାଙ୍କୁ ଏକୁଟିଆ ବୁଲୁଥିବା ଦେଖି ଗାଁ ଲୋକେ ତାଙ୍କୁ ଘେରି ଯାଇଥିଲେ। ପ୍ରଥମ ଥର କେରଳ ଯାଇଥିବା ସୁରେନ୍ଦ୍ର ଓ ଘାସିରାମଙ୍କୁ ଗାଁ ଲୋକେ ମାଲାୟାଲମ ଭାଷାରେ ପରିଚୟ ଓ ଆଧାରକାର୍ଡ ମାଗିବାରୁ, ଭୟଭୀତ ହୋଇ ଦୁହେଁ ସେଠାରୁ ଦୌଡ଼ି ପଳାଇଥିଲେ। ମାନସିକ ସ୍ତରରେ ଅସୁସ୍ଥ ହୋଇପଡ଼ିଥିବା ଘାସିରାମ ୨ରୁ ୩ ଦିନ ଧରି ଏଣେତେଣେ ବୁଲିବା ପରେ ବହୁ କଷ୍ଟରେ ସୁରେନ୍ଦ୍ର ଗାଁ ଲୋକଙ୍କ ସହ ଯୋଗାଯୋଗ କରି ନିଜ କାମ ଜାଗାକୁ ଯାଇଥିଲେ। ଘାସିରାମ କିଛି ଦିନ ମାନସିକ ଅସନ୍ତୁଳନ ସ୍ଥିତିରେ ବୁଲିବା ପରେ ଧୀରେ ଧୀରେ ସ୍ବାଭାବିକ ହୋଇଥିଲେ। ସେ ପ୍ରଥମେ ଆଲେପ୍ପି ରେଳ ଷ୍ଟେଶନରୁ ଏର୍ଣ୍ଣାକୁଲମ ଆସିଥିଲେ ଏବଂ ସେଠାରୁ ଅଟୋ ଯୋଗେ ପୁଦୁକାଲାଭାଟସ୍ଥିତ କମ୍ପାନୀକୁ ୮ ତାରିଖ ସକାଳ ୮:୩୦ରେ ପହଞ୍ଚି ଥିଲେ।ସେଠାରେ ଥିବା ଅନ୍ୟ ଓଡ଼ିଆ ଭାଇମାନେ ତୁରନ୍ତ ଗାଁ ଓ ପରିବାର ଲୋକଙ୍କୁ ଏହି ଖବର ଦେଇଥିଲେ।
ସୂଚନା ପାଇ ପରିବାର ଲୋକେ ଥୁଆମୂଳ ରାମପୁର ଥାନା ଅଧିକାରୀଙ୍କୁ ଅବଗତ କରାଇଥିଲେ। ପୂର୍ବରୁ ଥାନାରେ ରୁଜୁ ହୋଇଥିବା ନିଖୋଜ ମାମଲା (କେସ ନଂ: ୧୯/୨୬) ଅନୁଯାୟୀ ଯୁବକ ଜଣକ ସୁରକ୍ଷିତ ଥିବା ନେଇ ଥାନା ଅଧିକାରୀ ଗଣମାଧ୍ୟମକୁ ସ୍ପଷ୍ଟ କରିଛନ୍ତି। ଘାସିରାମ ସୁରକ୍ଷିତ ଥିବା ଖବର ପାଇବା ପରେ ସ୍ତ୍ରୀ ସୁମିତ୍ରା ମାଝୀ, ପରିବାର ଲୋକେ ଏବଂ ଆଡ଼ିଗୁଡ଼ା ଗ୍ରାମରେ ଖୁସିର ଲହରୀ ଖେଳିଯାଇଛି।
