ଦୁବାଇ, ୧୫ା୯ (ପି.ଟି.)-ସଂଯୁକ୍ତ ଆରବ ଏମିରେଟ୍ସ (ୟୁଏଇ)ର ଆର୍ଦ୍ର ଓ ଉତ୍ତାପ କଣ୍ଡିଶନ ସହ ଅଭ୍ୟସ୍ତ ହେବା ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ସମସ୍ତ ଦଳ ପାଇଁ ଏକ ବଡ଼ ଚ୍ୟାଲେଞ୍ଜ ହେବ। ଏକଥା କହିଛନ୍ତି ମୁମ୍ବାଇ ଇଣ୍ଡିଆନ୍ସର ବାମହାତି ପେସ୍ ବୋଲର ଟ୍ରେଣ୍ଟ ବୋଲ୍ଟ। ନ୍ୟୁଜିଲାଣ୍ଡର ଏହି କ୍ରିକେଟର ଗତବର୍ଷ ଦିଲ୍ଲୀ କ୍ୟାପିଟାଲ୍ସ ତରଫରୁ ଖେଳୁଥିଲେ। ମୁମ୍ବାଇ ଇଣ୍ଡିଆନ୍ସ ତରଫରୁ ସେ ପ୍ରଥମଥର ଖେଳିବାକୁ ଯାଉଛନ୍ତି। ବ୍ୟକ୍ତିଗତ କାରଣ ଦର୍ଶାଇ ଶ୍ରୀଲଙ୍କା ପେସ୍ ବୋଲର ଲସିଥ୍ ମାଲିଙ୍ଗା ଏଥର ଆଇପିଏଲ୍ରୁ ଓହରିଯାଇଛନ୍ତି। ଫଳରେ ବୋଲ୍ଟଙ୍କୁ ୪ଥର ଚାମ୍ପିୟନ ମୁମ୍ବାଇ ଇଣ୍ଡିଆନ୍ସର ବୋଲିଂ ନେତୃତ୍ୱ ନେବାକୁ ପଡ଼ିବ। ତେବେ ଏହି ଦଳରେ ବହୁ ବ୍ୟାଟିଂ ହେଭିଓ୍ବେଟ୍ ରହିଥିବାରୁ ସେ ଅନେକ ପରିମାଣରେ ଆଶ୍ୱସ୍ତ ବୋଲି କହିଛନ୍ତି। ବୋଲ୍ଟ କହିଛନ୍ତି, ନ୍ୟୁଜିଲାଣ୍ଡ ଭଳି ଏକ କ୍ଷୁଦ୍ର ଦେଶରୁ ସେ ଆସିଛନ୍ତି। ବର୍ତ୍ତମାନ ସେଠାରେ ଶୀତଋତୁ ଚାଲିଛି। ସେଠାରେ ତାପମାତ୍ରା ୭ରୁ ୮ ଡିଗ୍ରୀ ରହିଛି। ମାତ୍ର ଏଠାରେ ମରୁଭୂମିର ମଧ୍ୟଭାଗରେ ରହିଥିବା ଷ୍ଟାଡିୟମରେ ୪୫ଡିଗ୍ରୀ ସେଲସିଅସ୍ ତାପମାତ୍ରାରେ ଅଭ୍ୟାସ କରିବା ଏକ ବଡ଼ ଚ୍ୟାଲେଞ୍ଜ। ସ୍ବଳ୍ପ ହେଲେ ମଧ୍ୟ ପୂର୍ବରୁ ୟୁଏଇରେ କ୍ରିକେଟ ଖେଳିଛନ୍ତି। ବର୍ଷର ବିଭିନ୍ନ ସମୟରେ ସ୍ଥାନୀୟ ପରିବେଶ ଖେଳ ଉପରେ ପ୍ରଭାବ ପକାଇଥାଏ ବୋଲି ୩୧ ବର୍ଷୀୟ ନ୍ୟୁଜିଲାଣ୍ଡ ବୋଲର କହିଛନ୍ତି। ମୁମ୍ବାଇ ଇଣ୍ଡିଆନ୍ସର ବୋଲିଂ ୟୁନିଟ୍ରେ ପ୍ରଚୁର ବିଭିନ୍ନତା ରହିଛି। ଦଳ ପାଇଁ ଏହା ଏକ ଭଲ ଲକ୍ଷଣ। ଆଇପିଏଲ୍ ୨୦୨୦ର ଉଦ୍ଘାଟନୀ ମ୍ୟାଚ୍ ସେପ୍ଟେମ୍ବର ୧୯ରେ ଆବୁଧାବିରେ ଖେଳାଯିବ। ଏଥିରେ ଗତଥରର ଚାମ୍ପିୟନ ମୁମ୍ବାଇ ଇଣ୍ଡିଆନ୍ସ ରନର୍ସଅପ୍ ଚେନ୍ନାଇ ସୁପର କିଙ୍ଗ୍ସକୁ ଭେଟିବ।
