ଭୁବନେଶ୍ୱର,୩।୬(ବ୍ୟୁରୋ): ରାଜଧାନୀରେ ପୁଣି ଜମି ଦଖଲକାରୀ ଗ୍ୟାଙ୍ଗ ଆତଙ୍କ ଖେଳାଇଛନ୍ତି। ଏକ ବିବାଦୀୟ ଜମିରେ ହସ୍ତକ୍ଷେପ କରି ଫାଇଦା ନେବାକୁ ଉଦ୍ୟମ କରିବାକୁ ଯାଇ ସିକ୍ୟୁରିଟି ଗାର୍ଡଙ୍କୁ ମରଣାନ୍ତକ ଆକ୍ରମଣ କରିବା ସହ କ୍ରେନରେ ପାଚେରି ଭାଙ୍ଗି ମୂଲ୍ୟବାନ ସମ୍ପତ୍ତି ନଷ୍ଟ କରିଛନ୍ତି। ଏ ନେଇ ଏତଲା ପରେ ଚନ୍ଦ୍ରଶେଖରପୁର ଥାନା ପୋଲିସ ଏହି ଗ୍ୟାଙ୍ଗର ୪ଜଣଙ୍କୁ ଶୁକ୍ରବାର ଗିରଫ କରିଛି। ସେମାନେ ହେଲେ ଭୁବନେଶ୍ୱର ବିଭିନ୍ନ ଅଞ୍ଚଳରେ ରହୁଥିବା ଗଞ୍ଜାମର ସିଦ୍ଧାନ୍ତ ଦାସ ଓ ବାବୁ ନାୟକ ଏବଂ ଉତ୍ତରପ୍ରଦେଶର ଅଂଶୁ ମୋହରିଆ ଓ ମନୋଜ ଯାଦବ ଦାସ। ପୋଲିସ ଏକ ମାମଲା ରୁଜୁ କରି ସମସ୍ତ ଅଭିଯୁକ୍ତଙ୍କୁ କୋର୍ଟ ଚାଲାଣ କରିଥିଲା। ଜାମିନ ନ ମିଳିବାରୁ ସେମାନଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ତେବେ କାହାଠାରୁ ଟଙ୍କା ନେଇ ଏଭଳି କାଣ୍ଡ ଘଟାଇଛନ୍ତି ତାହାକୁ ନେଇ ପୋଲିସ ଖୋଳତାଡ଼ କରୁଛି ।
ପୋଲିସ ସୂଚନାନୁସାରେ, ସ୍ଥାନୀୟ ଥାନା ଅଞ୍ଚଳରେ ଏକ ପ୍ଲଟ୍ ରହିଛି। ଡକ୍ଟର ତୁଷାର ମିଶ୍ର ଓ କିରୁଥିକା ପ୍ରଭାକରନ ଉକ୍ତ ପ୍ଲଟ୍ଟିକୁ ପରସ୍ପର ନିଜର ଦାବି କରିବା ସହ କୋର୍ଟଙ୍କ ଦ୍ୱାରସ୍ଥ ହୋଇଥିଲେ। କୋର୍ଟ ଏହା ଉପରେ ୧୧୪ ଧାରା ପାଇଁ ନିର୍ଦ୍ଦେଶ ଦେଇଥିଲେ। ଏହାପରେ ଉଭୟ ପକ୍ଷ ଥାନାରେ ହାଜର ହୋଇ ମକଦ୍ଦମା ଜମି ବଣ୍ଟନ ପାଇଁ ଅନୁରୋଧ କରିଥିଲେ। କିରୁଥିକା ପ୍ରଭାକରନ ଉକ୍ତ ପ୍ଲଟ୍ ଉପରେ ଗୋଟିଏ ଆଉଟ୍ ହାଉସ ନିର୍ମାଣ କରିଥିଲେ ଓ ପ୍ଲଟ ଭିତରେ ୪ଟି ସୋଲାର୍ ପ୍ୟାନେଲ ବ୍ୟବହାର କରି ସିସିଟିଭି କ୍ୟାମେରା ଲଗାଇଥିଲେ। ପରେ ଉଭୟ ପକ୍ଷଙ୍କ ମଧ୍ୟରେ ସମାଧାନ ହୋଇଥିଲା। ହେଲେ ଗୁରୁବାର ରାତିରେ ହଠାତ୍ ଅଭିଯୁକ୍ତମାନେ କେତେଜଣ ସହଯୋଗୀଙ୍କୁ ଧରି ଗୋଟିଏ କ୍ରେନ ସହିତ ଉକ୍ତ ପ୍ଲଟ୍ ପାଖକୁ ଆସି ସୁରକ୍ଷା ଦାୟିତ୍ୱରେ ଥିବା ଗୋବିନ୍ଦ ଓବାସୁଦେବଙ୍କୁ ମରଣାସ୍ତ୍ର ଦେଖାଇ ଆକ୍ରମଣ କରିବା ସହ ମୋବାଇଲ ଫୋନ ଛଡାଇ ନେଇଥିଲେ। ଏହାପରେ କ୍ରେନ ଦ୍ୱାରା ପାଚେରି ଭାଙ୍ଗିବା ସହିତ ଘର, ସୋଲାର ପ୍ୟାନେଲ, ସିସିଟିଭି କ୍ୟାମେରା ଆଦିକୁ ନଷ୍ଟ କରିଦେଇଥିଲେ। ଏନେଇ ଥାନାରେ ଏତଲା ପରେ ପୋଲିସ ଆଇପିସିର ବିଭିନ୍ନ ଦଫାରେ ମାମଲା ଏକ ମାମଲା (ନଂ.୨୬୬/୨୦୨୩) ରୁଜୁ କରି ତଦନ୍ତ ଆରମ୍ଭ କରି କାର୍ଯ୍ୟାନୁଷ୍ଠାନ ଗ୍ରହଣ କରିଛି।
