ଭୁବନେଶ୍ୱର,୧୯।୯(ଅନୁରାଧା ମହାରଣା):ରାଜଧାନୀ ସମେତ ସାରା ରାଜ୍ୟରେ ଆଜି ପବିତ୍ର ଗଣେଶ ପୂଜା ମହା ଆଡ଼ମ୍ବରରେ ପାଳିତ ହେବ। ଭୁବନେଶ୍ୱରର ବିଭିନ୍ନ ମଣ୍ଡପ, ଶିକ୍ଷାନୁଷ୍ଠାନ ସମେତ ଶତାଧିକ ସ୍ଥାନରେ ବିରାଜିବେ ବିଘ୍ନରାଜ। ଏଥିପାଇଁ ପ୍ରସ୍ତୁତି ସରିଥିବାବେଳେ ପୂଜା କମିଟି ସଦସ୍ୟ, ଛାତ୍ରୀଛାତ୍ରଙ୍କ ମଧ୍ୟରେ ବେଶ୍ ଉତ୍ସହ ଦେଖିବାକୁ ମିଳିଛି। ଅଗ୍ରପୂଜ୍ୟଙ୍କ ଆବାହନ ପାଇଁ ସହର ଚଳଚଞ୍ଚଳ ହୋଇପଡ଼ିଛି। ପୂଜା ସାମଗ୍ରୀ ଦୋକାନଠାରୁ ଆରମ୍ଭ କରି ମୂର୍ତ୍ତି ଦୋକାନ, ସପିଂ ମଲ୍, ହାଟ ବଜାରରେ ଲୋକଙ୍କର ଖୁବ୍ ଭିଡ଼ ଦେଖିବାକୁ ମିଳିଛି। ଆଲୋକମାଳାରେ ରାଜଧାନୀ ଝଲସି ଉଠିଥିବାବେଳେ ଗଣେଶଙ୍କ ଆବାହନ ସହ ବିଭିନ୍ନ ସ୍ଥାନରେ ରଙ୍ଗାରଙ୍ଗ କାର୍ଯ୍ୟକ୍ରମର ବ୍ୟବସ୍ଥା କରାଯାଇଛି। କେତେକ ସ୍ଥାନରେ ମୀନାବଜାରର ମଧ୍ୟ ବନ୍ଦୋବସ୍ତ କରାଯାଇଛି। ବିଭିନ୍ନ ସାମାଜିକ ଅନୁଷ୍ଠାନ ପକ୍ଷରୁ ମଧ୍ୟ ଭିନ୍ନ ଭିନ୍ନ ଶୈଳୀରେ ଗଣେଶ ପୂଜା ଆୟୋଜନ କରାଯାଇଛି। ବକୁଳ ଫାଉଣ୍ଡେଶନ ପକ୍ଷରୁ ପୂର୍ବବର୍ଷ ପରି ଫରେଷ୍ଟ ପାର୍କରେ ଗଛରେ ଗଣେଶ ପୂଜା କରାଯିବ। ସେହିପରି ରାଜଧାନୀର ରାମମନ୍ଦିରସ୍ଥିତ ଗଣେଶ ମନ୍ଦିର, କୋଚିଲେଇ ହାଟସ୍ଥିତ ଗଣେଶ ମନ୍ଦିର, ଆଇଗିଣିଆ ଲକ୍ଷ୍ମୀନାରାୟଣ ମନ୍ଦିରରେ ପୂଜା ନେଇ ସ୍ବତନ୍ତ୍ର ବ୍ୟବସ୍ଥା କରାଯାଇଛି। ତେବେ ଝାରପଡ଼ା, ଶହୀଦନଗର ଓ୍ବିନର୍ସ ଆସୋସିଏଶନ, ସିଜୁଆ, ଖଣ୍ଡଗିରିସ୍ଥିତ ଜୟଦେବ ୟୁଥ୍ କ୍ଲବ୍, ନୟାପଲ୍ଲୀ ଆଖଣ୍ଡଳମଣି ଯୁବକ ସଂଘର ପୂଜା ଆୟୋଜନ ବେଶ୍ ଆକର୍ଷଣୀୟ ହୋଇଥିବା ଦେଖିବାକୁ ମିଳିଛି।
