ଭୁବନେଶ୍ୱର,୧।୯(ବନ୍ଦନା ସେଠୀ): ଶିଖରଚଣ୍ଡୀ ପାହାଡ଼ ଜୈବ ବିବିଧତା ନଷ୍ଟ ମାମଲାରେ ଗୁରୁବାର ନ୍ୟାଶନାଲ ଗ୍ରୀନ୍ ଟ୍ରିବ୍ୟୁନାଲ (ଏନ୍ଜିଟି) ରେ ଶୁଣାଣି ହୋଇଥିଲା। ଏଥିସହ ପରବର୍ତ୍ତୀ ଶୁଣାଣି ସେପ୍ଟେମ୍ବର ୧୧କୁ ଧାର୍ଯ୍ୟ କରାଯାଇଥିବାବେଳେ ସେ ପର୍ଯ୍ୟନ୍ତ ପାହାଡ଼ ଉପରେ ଓ୍ବାଟ୍କୋର କୌଣସି କାର୍ଯ୍ୟ କରା ନ ଯିବା ନିର୍ଦ୍ଦେଶକୁ କାଏମ ରଖାଯାଇଛି। ତେବେ ଏହାକୁ ନେଇ ମା’ ଶିଖରଚଣ୍ଡୀ ଆଞ୍ଚଳିକ ସମିତି ଅସନ୍ତୋଷ ପ୍ରକାଶ କରିଛି। ରାଜ୍ୟ ସରକାର ପାହାଡ଼ ଉପରେ ଗଛ ଲଗାଇବା ସହ ବିକାଶ ନାମରେ ପୁରୁଣା ଗଛକୁ କାଟୁଥିବା ଅଭିଯୋଗ କରାଯାଇଛି। ଏନ୍ଜିଟିର ନିର୍ଦ୍ଦେଶକ୍ରମେ ଗଛକଟା ହୋଇଥିବା ସ୍ଥାନରେ ଗଛ ନ ଲଗାଇ ରାତି ଅଧରେ ମେଶିନ ଲଗାଇ ପାହାଡ଼ ପାଦଦେଶରେ ଥିବା ବଡ଼ ଗଛକୁ ସଫା କରାଯାଉଛି ଓ ସକାଳୁ ଛୋଟ ଛୋଟ ଗଛ ଆଣି ଲଗାଯାଉଛି। ଏନେଇ ଆଗାମୀ ଶୁଣାଣିରେ ଏନ୍ଜିଟିରେ ଲିଖିତ ଅଭିଯୋଗ କରାଯିବ ବୋଲି ସମିତି ପକ୍ଷରୁ ସଚିନ୍ ମହାପାତ୍ର କହିଛନ୍ତି। ଗଛ ଲାଗାଇବା ପାଇଁ ସମିତି କୌଣସି ବିରୋଧ କରୁନାହିଁ। ଜଙ୍ଗଲ ବିଭାଗ ସହ ମିଶି ଗଛ ଲଗାଇବାରେ ସହଯୋଗ କରାଯାଉଛି। ମାତ୍ର ଗଛ କାଟି ସେହି ସ୍ଥାନରେ ପୁଣି ଗଛ ଲଗାଇବା କାମକୁ ବିରୋଧ କରାଯାଉଛି। ଏଥିସହ ପାନୀୟ ଜଳ ପ୍ରକଳ୍ପ ପାଇଁ ଯେଉଁ ସ୍ଥାନରେ ଗଛକଟା ଯାଇଛି ସମ୍ପୃକ୍ତ ସ୍ଥାନରେ ବିଡିଏ ଏବଂ ଓ୍ବାଟ୍କୋ ପକ୍ଷରୁ ଗଛ ଲଗାଇବାକୁ ଦାବି କରାଯାଇଛି। ତେବେ ଏପରି ବେଆଇନ କାର୍ଯ୍ୟରୁ ବିରତ ନ ହେଲେ ଆସନ୍ତା ଦିନରେ ଏହା ବିରୋଧରେ ଆନ୍ଦୋଳନ କରାଯିବ ବୋଲି ସମିତି ପକ୍ଷରୁ ଚେତାବନୀ ଦିଆଯାଇଛି।
ସୂଚନାଯୋଗ୍ୟ, ଜଙ୍ଗଲ (ସଂରକ୍ଷଣ) ଆଇନ୍ ୧୯୮୦କୁ ଉଲ୍ଲଂଘନ କରି ଶିଖରଚଣ୍ଡୀ ପାହାଡ଼ରେ ମେଗା ପାନୀୟ ଜଳ ସଂରକ୍ଷଣ ପ୍ରକଳ୍ପ ନିର୍ମାଣ କରାଯାଉଥିବା ଅଭିଯୋଗ କରି ମା’ ଶିଖରଚଣ୍ଡୀ ଆଞ୍ଚଳିକ ସୁରକ୍ଷା ସମିତି ଏନ୍ଜିଟିଙ୍କ ଦ୍ୱାରସ୍ଥ ହୋଇଥିଲା। ଘଟଣାର ଗୁରୁତ୍ୱକୁ ଅନୁଭବ କରି ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ସେଠାରେ ପ୍ରକଳ୍ପ କାମ ବନ୍ଦ ରଖିବାକୁ ନିର୍ଦ୍ଦେଶ ଦିଆଯାଇଥିଲା। ଏନେଇ ଜୁଲାଇ ୫ରେ ପ୍ରଥମ ଶୁଣାଣି ହୋଇଥିବାବେଳେ ଦ୍ୱିତୀୟ ଶୁଣାଣି ଜୁଲାଇ ୨୭ରେ ହୋଇଥିଲା।
