ଝିଅ ଏବଂ ପୁଅ ଉଭୟ ସମାନ। ଦୁହିଙ୍କ ମଧ୍ୟରେ ପାର୍ଥକ୍ୟ ଆଣିବା ଭାରତୀୟ ସମ୍ବିଧାନର ଉଲ୍ଲଂଘନ। ଏହାକୁ ଦୃଷ୍ଟିରେ ରଖି ସରକାରଙ୍କ ପକ୍ଷରୁ ବାଳିକା ଶିଶୁଙ୍କ ବିିକାଶରେ ଦେଶର ବିକାଶ ସ୍ଲୋଗାନ୍ ଦିଆଯାଉଛି। ତେଣୁ ପ୍ରତିବର୍ଷ ଜାନୁୟାରୀ ୨୪ରେ ଭାରତରେ ଜାତୀୟ ବାଳିକା ଶିଶୁ ଦିବସ ପାଳନ କରାଯାଏ।
ଭାରତୀୟ ସମାଜରେ ଝିଅମାନେ ସମ୍ମୁଖୀନ ହେଉଥିବା ଅସମାନତା ବିଷୟରେ ଜନସଚେତନ ସୃଷ୍ଟି କରିବା ପାଇଁ ମହିଳା ଓ ଶିଶୁ ବିକାଶ ମନ୍ତ୍ରଣାଳୟ ଏବଂ ଭାରତ ସରକାରଙ୍କ ଦ୍ୱାରା ୨୦୦୮ ରେ ଏହା ଆରମ୍ଭ କରାଯାଇଥିଲା। ବାଳିକାମାନଙ୍କ ପାଇଁ ଏକ ସୁସ୍ଥ ଏବଂ ନିରାପଦ ପରିବେଶ ସୃଷ୍ଟି ବିଷୟରେ ସଚେତନତା ଅଭିଯାନ ଅନ୍ତର୍ଗତ ଏହି ଦିନ ପାଳନ ଅବସରରେ ବିଭିନ୍ନ କାର୍ଯ୍ୟକ୍ରମର ଆୟୋଜନ କରାଯାଇଥାଏ। ଶିକ୍ଷା, ପୁଷ୍ଟିକର ଖାଦ୍ୟ, ବାଲ୍ୟବିବାହ, ଆଇନଗତ ଅଧିକାର ଏବଂ ଚିକିତ୍ସା ସେବା, ସୁରକ୍ଷା, ସମ୍ମାନ ଭଳି ଭାରତରେ ବାଳିକା ଶିଶୁ ସମ୍ମୁଖୀନ ହେଉଥିବା ନାନା ସମସ୍ୟା ନେଇ ଏହି ଅବସରରେ ସଚେତନତା ସୃଷ୍ଟି କରାଯାଇଥାଏ।
ବାଳିକା ଶିଶୁଙ୍କୁ ଶିକ୍ଷା ସୁଯୋଗ ଯୋଗାଇଦେବା ସହିତ ବିଭିନ୍ନ କ୍ଷେତ୍ରରେ ସମାନ ସୁଯୋଗ ଉପଲବ୍ଧ କରାଇବା ଏହି ଦିବସ ପାଳନର ମୁଖ୍ୟ ଉଦ୍ଦେଶ୍ୟ।
ଏବେ ସରକାରଙ୍କ ନୂତନ ଯୋଜନା ଅନ୍ତର୍ଗତ ବାଳିକା ବଡ଼ ହୋଇ ଦେଶ ସୁରକ୍ଷା କ୍ଷେତ୍ରରେ ଯୋଗ ଦେଇପାରୁଛନ୍ତି। ଫଳରେ ଏବେ ଘର କାମଠାରୁ ଆରମ୍ଭ କରି ମହାକାଶ ପର୍ଯ୍ୟନ୍ତ ସବୁଠି ବାଳିକାଙ୍କ ଯୋଗଦାନ ଦେଶକୁ ସମୃଦ୍ଧି ପଥରେ ଅଗ୍ରସର କରାଇପାରୁଛି।
