ପ୍ୟାରିସ, ୭।୧୦- ଆର୍ଜେଣ୍ଟିନାର ନାଡିଆ ପୋଡୋରୋସ୍କା ଚଳିତ ଫ୍ରେଞ୍ଚ୍ ଓପନ ଗ୍ରାଣ୍ଡସ୍ଲାମ ଟେନିସ ମହିଳା ସିଙ୍ଗଲ୍ସ ସେମିଫାଇନାଲରେ ପ୍ରବେଶ କରିଛନ୍ତି। ଫ୍ରେଞ୍ଚ୍ ଓପନ ଇତିହାସରେ ଆଧୁନିକ ଯୁଗର ପ୍ରଥମ କ୍ୱାଲିଫାୟରଭାବେ ସେ ଏହି ସୌଭାଗ୍ୟ ଅର୍ଜନ କରିଛନ୍ତି। ଏହାପୂର୍ବରୁ ପୋଡୋରୋସ୍କାର କେବେହେଲେ କ୍ୱାଲିଫାଇଂ ରାଉଣ୍ଡ ଅତିକ୍ରମ କରି ରୋଲାଣ୍ଡ ଗାରୋସରେ ମୁଖ୍ୟ ଡ୍ରରେ ସ୍ଥାନ ପାଇପାରି ନ ଥିଲେ। ପ୍ରଥମଥରପାଇଁ କୌଣସି ଏକ ବଡ଼ ଟୁର୍ନାମେଣ୍ଟର ସେମିଫାଇନାଲରେ ପ୍ରବେଶ କରିଥିବା ପୋଡୋରୋସ୍କା ମଙ୍ଗଳବାର ଅନୁଷ୍ଠିତ କ୍ୱାର୍ଟର ଫାଇନାଲରେ ତୃତୀୟ ସିଡ୍ ୟୁକ୍ରେନର ଏଲିନା ସ୍ବିତଲିନାଙ୍କୁ ସିଧାସଳଖ ୬-୨, ୬-୪ ସେଟ୍ରେ ହରାଇ ବିପର୍ଯ୍ୟୟ ସୃଷ୍ଟି କରିଛନ୍ତି। ସେମିଫାଇନାଲରେ ପାଡୋରୋସ୍କା ଅନ୍ୟଜଣେ କ୍ୱାଲିଫାୟର ଇଟାଲିର ମାର୍ଟିନା ଟ୍ରେଭିସାନଙ୍କୁ ଭେଟିବା ସମ୍ଭାବନା ରହିଛି। ପୂର୍ବରୁ ଅନୁଷ୍ଠିତ ଏକ ୪ର୍ଥ ରାଉଣ୍ଡ ମ୍ୟାଚରେ ଡାନିଏଲ ରୋଜ୍ କଲିନ୍ସ ୬-୪, ୪-୬, ୬-୪ ସେଟ୍ରେ ଓନସ ଜାବେଉରଙ୍କୁ ହରାଇ କ୍ୱାର୍ଟର ଫାଇନାଲରେ ପହଞ୍ଚତ୍ଛନ୍ତି। ମହିଳା ଡବଲ୍ସରେ କ୍ରିଷ୍ଟିନା ମାଲଡେନୋଭିକ୍-ଟିମିଆ ବାବୋସ ଯୋଡ଼ି ସେମିଫାଇନାଲରେ ପ୍ରବେଶ କରିଛନ୍ତି। ଏହି ଯୋଡ଼ି କ୍ୱାର୍ଟର ଫାଇନାଲରେ ମାର୍ଟା କୋଷ୍ଟ୍ୟୁକ-ଆଲେକଜାଣ୍ଡ୍ରା ସାସ୍ନୋଭିଚ୍ଙ୍କୁ ୬-୨, ୭-୫ ସେଟ୍ରେ ହରାଇ ଦେଇଛନ୍ତି।
ବୁଷ୍ଟା କ୍ୱାର୍ଟରରେ
ପୁରୁଷ ସିଙ୍ଗଲ୍ସର ଏକ ୪ର୍ଥ ରାଉଣ୍ଡ ମ୍ୟାଚରେ ବିଜୟୀ ହୋଇ ସ୍ପେନର ପାବ୍ଲୋ କାରେନୋ ବୁଷ୍ଟା କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। ମଙ୍ଗଳବାର ସେ ୬-୨, ୭-୫, ୬-୨ ସେଟ୍ରେ ଜର୍ମାନୀର ଡାନିଏଲ ଅଲ୍ଟମେରଙ୍କୁ ହରାଇ ଦେଇଛନ୍ତି। ପୁରୁଷ ଡବଲ୍ସରେ ଆନ୍ଦ୍ରେସ ମାଇଲ୍ସ-କେଭିନ କ୍ରାଓ୍ବିଜ ଯୋଡ଼ି ସେମିଫାଇନାଲରେ ପହଞ୍ଚତ୍ଛନ୍ତି। କ୍ୱାର୍ଟର ଫାଇନାଲରେ ଏହି ଯୋଡ଼ି ଜେମି ମୁରେ-ନିଅଲ ସ୍କୁପସ୍କି ଯୋଡ଼ିଙ୍କୁ ୬-୪, ୬-୪ ସେଟ୍ରେ ହରାଇ ଦେଇଛନ୍ତି।
