ଭୁବନେଶ୍ୱର,୧୯ା୭(ବ୍ୟୁରୋ): ରେଲ୍ଓ୍ବେ ଚାକିରି ଆଳରେ ୫ଜଣ ଯୁବକଙ୍କଠାରୁ ୨୧ଲକ୍ଷ ଟଙ୍କା ଠକେଇ ଅଭିଯୋଗରେ ଶାଳକ କଳିଙ୍ଗବିହାରର ସୌମ୍ୟ ରଞ୍ଜନ ରାଉତ ଓ ଭିଣୋଇ ସମରଜିତଙ୍କୁ ଚନ୍ଦ୍ରଶେଖରପୁର ଥାନା ପୋଲିସ ଶନିବାର ଗିରଫ କରିଥିଲା। ଏବେ ସେମାନଙ୍କ ଠକେଇ ଗୁମର ଖୋଲିବାରେ ଲାଗିଛି। ସେମାନେ ଗିରଫ ହୋଇଥିବା ଜାଣିବା ପରେ ଠକେଇର ଶିକାର ବହୁ ଯୁବକ ରବିବାର ଥାନାର ଦ୍ୱାରସ୍ଥ ହୋଇଛନ୍ତି। ତମାଣ୍ଡୋ ଥାନାରେ ୫ରୁ ଊର୍ଦ୍ଧ୍ୱ ଅଭିଯୋଗ ହୋଇଥିବାବେଳେ ଅଭିଯୁକ୍ତ ଦ୍ୱୟ ସେମାନଙ୍କୁ ବ୍ୟାଙ୍କ ପିଓ ଓ କ୍ଲର୍କ ଚାକିରି କରାଇଦେବାକୁ କହି ଲକ୍ଷାଧିକ ଟଙ୍କା ଠକି ନେଇଥିବା ଏତଲାରେ ଉଲ୍ଲେଖ କରିଛନ୍ତି। ଅଭିଯୋଗ ବଢ଼ିବା ପରେ ପୋଲିସ ଶାଳକ ଓ ଭିଣୋଇଙ୍କ ଠକେଇ ର଼୍ୟାକେଟକୁ ନେଇ ଅଧିକ ତଦନ୍ତ ଚଳାଇଛି। ଆବଶ୍ୟକ ପଡ଼ିଲେ ଭିଣୋଇ ସମରଜିତଙ୍କୁ ତମାଣ୍ଡୋ ପୋଲିସ ରିମାଣ୍ଡରେ ଆଣିବ ବୋଲି ସୂଚନା ମିଳିଛି। ଅନ୍ୟପକ୍ଷରେ ସୌମ୍ୟରଞ୍ଜନଙ୍କୁ କରୋନା ହୋଇଥିବା ଜଣାପଡିଛି। ତେଣୁ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିବାବେଳେ ସମରଜିତ୍ଙ୍କୁ କୋର୍ଟ ଚାଲାଣ କରାଯାଇଛି।
ସୂଚନା ଅନୁଯାୟୀ, ଶୁକ୍ରବାର ସନ୍ଧ୍ୟାରେ ସମରଜିତଙ୍କୁ ୫ଜଣ ଯୁବକ ଅପହରଣ କରିଥିବା ନେଇ ତାଙ୍କ ଭଉଣୀ ତମାଣ୍ଡୋ ଥାନାରେ ଅଭିଯୋଗ କରିଥିଲେ। ପୋଲିସ ମାମଲା ରୁଜୁ କରି ଅପହରଣକାରୀଙ୍କୁ ଗିରଫ କରିବା ପାଇଁ ସେମାନଙ୍କୁ ଟ୍ରାକ୍ କରିଥିଲା। ଏପଟେ ସମ୍ପୃକ୍ତ ଯୁବକମାନେ ସମରଜିତଙ୍କୁ ଚନ୍ଦ୍ରଶେଖରପୁର ଥାନା ପୋଲିସ ଜିମା ଦେଇ ଠକେଇ ଅଭିଯୋଗ କରିଥିଲେ। ସମରଜିତ ଓ ତାଙ୍କ ଶାଳକ ସୌମ୍ୟରଞ୍ଜନ ରେଲ୍ଓ୍ବେ ଚାକିରି ଦେବାକୁ କହି ୨୧ଲକ୍ଷ ଟଙ୍କା ଠକି ନେଇଥିବା ଏତଲାରେ ଉଲ୍ଲେଖ କରିଥିଲେ। ଉଭୟ ଥାନା ପକ୍ଷରୁ ଦୁଇଟି ପୃଥକ ମାମଲା ରୁଜୁ କରାଯାଇଥିଲା। ଚନ୍ଦ୍ରଶେଖରପୁର ଥାନା ପୋଲିସ ଠକେଇ ମାମଲାରେ ସୌମ୍ୟରଞ୍ଜନ ଓ ସମରଜିତଙ୍କୁ ଗିରଫ କରିଥିବାବେଳେ ତମାଣ୍ଡୋ ଥାନା ପୋଲିସ ସମ୍ପୃକ୍ତ ୫ଜଣଙ୍କ ବିରୋଧରେ ଅପହରଣ ମାମଲା ରୁଜୁ କରିଥିଲା। ତେବେ ପୋଲିସ ସମ୍ପୃକ୍ତ ୫ଜଣଙ୍କୁ ଗିରଫ କରିବା ପରେ ନୋଟିସ ଦେଇ ଛାଡ଼ିଥିଲା।
