ମହାକାଳପଡ଼ା,୧୯ା୭(ଡି.ଏନ.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅଧୀନ ଗହୀରମଥା ସାମୁଦ୍ରିକ ଅଭୟାରଣ୍ୟରେ ମାଢ଼ୁଆ କଙ୍କଡା ଧରାଳିଙ୍କ ଭିଡ଼ ଜମୁଛି। ସେମାନେ ଅଭୟାରଣ୍ୟ ଭିତରକୁ ବେଆଇନ ଭାବେ ପ୍ରବେଶ କରି ଅବାଧରେ କଙ୍କଡା ଧରିବା ସହ ମାଛ ମାରୁଛନ୍ତି। ଏହି ସୁଯୋଗରେ ସେମାନେ ଜଙ୍ଗଲରୁ କଞ୍ଚା କାଠ କାଟି ଡଙ୍ଗାରେ ଚାଲାଣ କରୁଥିବା ଅଭିଯୋଗ ହେଉଛି।
ମିଳିଥିବା ସୂଚନା ଅନୁଯାୟୀ, ସାମୁଦ୍ରିକ ଅଭୟାରଣ୍ୟ ଅଞ୍ଚଳର କେତେଜଣ ଅସାଧୁ କଙ୍କଡା ବ୍ୟବସାୟୀ ସ୍ଥାନୀୟ ଗରିବ ଜନଜାତି ଲୋକଙ୍କୁ କମ୍ ମୂଲ୍ୟ ଦେଇ ଶ୍ରମିକ ଭାବେ କାମରେ ଲଗାଉଛନ୍ତି। ସେହି ଶ୍ରମିକମାନେ ହୁକିଟୋଲା, ମାଦଳି, ଲଞ୍ଚ ଘୋଲା, ଷୋଳ ମୁହାଣ, ହେଟାମୁଣ୍ଡିଆ ସଂରକ୍ଷିତ, ବତିଘର ଜଙ୍ଗଲ, କଂସାରଡିଆ, ତଣ୍ଡା ଆଦି ଜଙ୍ଗଲ ଭିତରେ ବହି ଯାଉଥିବା ନଦୀରୁ ମାଛ ମାରିବା, କଙ୍କଡା ଧରିବା, ହରିଣ ଶିକାର ଆଦି କରୁଛନ୍ତି ା ସେହିପରି ବନ ବିଭାଗ ବନ ମହୋତ୍ସବ ପାଳନ କରୁଥିବା ବେଳେ ଏହି କଙ୍କଡା ଧରାଳିମାନେ ଡଙ୍ଗାରେ କାଠ ବୋଝେଇ କରି କୂଳକୁ ଫେରୁଛନ୍ତି। ସେମାନେ ଧରିଥିବା ମାଛ ଓ କଙ୍କଡ଼ାକୁ ସ୍ଥାନୀୟ ବ୍ୟବସାୟୀଙ୍କୁ ବିକ୍ରି କରୁଛନ୍ତି। ଏହି ଅଞ୍ଚଳରେ ମାଢ଼ୁଆ କଙ୍କଡା ମୂଲ୍ୟ କେଜି ପ୍ରତି ୧ ହଜାରରୁ ୩ ହଜାର ଟଙ୍କାରେ ବିକ୍ରି ହେଉଛି। ବ୍ୟବସାୟୀମାନେ ସେହି କଙ୍କଡ଼ାକୁ ବଡ଼ ବାଉଁଶ ଝୁଡ଼ିରେ ପ୍ୟାକିଂ କରି ଟ୍ରକ୍ରେ କୋଲକାତା, ରାୟପୁର, ହାଇଦ୍ରାବାଦ ସମେତ ଦେଶର ପ୍ରମୁଖ ସହରର ନାମୀଦାମୀ ହୋଟେଲକୁ ଚାଲାଣ କରୁଛନ୍ତି। ମାଢ଼ୁଆ ପ୍ରଜାତି କଙ୍କଡାର ଜାତୀୟ ଓ ଅନ୍ତର୍ଜାତୀୟ ବଜାରରେ ବେଶ୍ ଚାହିଦା ରହିଛି। ପଞ୍ଚତାରକା ହୋଟେଲରେ ବିଦେଶୀମାନଙ୍କୁ ଏହି କଙ୍କଡ଼ାରେ ତିଆରି ବିଭିନ୍ନ ଖାଦ୍ୟ ପରଷା ଯାଉଛି। ତେବେ ମାଢ଼ୁଆ କଙ୍କଡ଼ା ବଉଳା କୁମ୍ଭାରଙ୍କ ମୁଖ୍ୟ ଖାଦ୍ୟ, ଏହି କଙ୍କଡ଼ାକୁ ରାଜନଗର ଅଞ୍ଚଳରେ ଧରିବା ନିଷେଧ କରାଯାଇଛି। ହେଲେ ମହାକାଳପଡ଼ା ଗହୀରମଥା ସାମୁଦ୍ରିକ ଅଭୟାରଣ୍ୟ ଅଞ୍ଚଳରେ ଚାଲିଥିବା ଏପରି ବ୍ୟବସାୟକୁ ରୋକିବାକୁ ବନବିଭାଗ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁ ନ ଥିବା ଅଭିଯୋଗ ହୋଇଛି। ଏହାକୁ ନେଇ ସ୍ଥାନୀୟ ବୁଦ୍ଧିଜୀବୀ, ପରିବେଶବିତ୍ମାନଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ପ୍ରତିଦିନ ମାଢ଼ୁଆ କଙ୍କଡାଧରା ଚାଲିଥିବାରୁ ତାହା ପର୍ଯ୍ୟାୟକ୍ରମେ ବିଲୁପ୍ତ ହେବ ବୋଲି ଆଶଙ୍କା ପ୍ରକାଶ ପାଇଛି। ଏପରି କଙ୍କଡ଼ା ନ ମିଳିଲେ ବଉଳା କୁମ୍ଭୀରମାନେ ଖାଇବେ କ’ଣ ବୋଲି ସ୍ଥାନୀୟ ଲୋକେ କହିଛନ୍ତି। ଏ ନେଇ ଏକ ପ୍ରତିନିଧି ଦଳ ରାଜନଗର ଡିଏଫ୍ଓଙ୍କୁ ଭେଟି ଆଲୋଚନା କରିବେ ବୋଲି ପରିବେଶବିତ୍ମାନେ କହିଛନ୍ତି।
