ଗୋପାଳପୁର,୨୫ା୬(ନବୀନ ରାଜ ଆଚାରୀ)-ଗୋଳନ୍ଥରା ଥାନା ଅନ୍ତର୍ଗତ ଟାମଣା ନିକଟସ୍ଥ ମହୁରୀଗଡ଼ରେ ଥିବା ଏକ ଫାର୍ମ ହାଉସରେ ବଟି ପାଇଁ ଖଣ୍ଡା ପିସ୍ତଲ ଦେଖାଇ ଭୟଭୀତ କରିବା ଓ ହତ୍ୟା ଧମକ ଦେବା ଘଟଣାରେ ପୋଲିସ ବୁଧବାର ୪ ଯୁବକଙ୍କୁ ଗିରଫ ପରେ କୋର୍ଟ ଚାଲାଣ କରିଛି। ସେମାନେ ହେଲେ ଦିଗପହଣ୍ଡି ଥାନା ଅଧୀନ ଚାଞ୍ଚଡ଼ାପଲ୍ଲୀ ଅଞ୍ଚଳରେ ପାଣ୍ଡା ଗୌଡ଼, ଚେରୁ ଗୌଡ଼ ଓରଫ ଦେବେନ୍ଦ୍ର, ନୀଳମାଧବ ଗୌଡ଼, ନୀତିକେସନ ବିଷୋୟୀ ଓରଫ ନିତିନ। ଅଭିଯୁକ୍ତ ଠାରୁ ୪ ଟି ମୋବାଇଲ ଫୋନ୍, ୨ଟି ଖଣ୍ଡା ଓ ଗୋଟିଏ ମୋଟର ସାଇକେଲକୁ ପୋଲିସ ଜବତ କରିଥିବା ଥାନାଧିକାରୀ ବିବେକାନନ୍ଦ ସ୍ବାଇଁ କହିଛନ୍ତି।
ବ୍ରହ୍ମପୁର ଶରଧାବାଲି ତୃତୀୟ ଗଳିର ରମେଶ ଚନ୍ଦ୍ର ଦାଶ ୩ ବର୍ଷ ପୂର୍ବେ ରମେଶ ଓ ତାଙ୍କ ସ୍ତ୍ରୀ ମହୁରୀଗଡ଼ ଅଞ୍ଚଳରେ ଏକ ଜମି କିଣି ସେଠାରେ ଫାର୍ମ ହାଉସ କରିଥିଲେ। ସେଠାରେ ଆମ୍ବ ଓ ଲେମ୍ଭୁ ଆଦି ଚାଷ ହେଉଥିବାରୁ ଏକ ପରିବାରକୁ ଯତ୍ନ ନେବା ପାଇଁ ନିୟୋଜିତ କରିଥିଲେ। ଜୁନ ୧୦ ତାରିଖ ସନ୍ଧ୍ୟାରେ କେତେଜଣ ଯୁବକ ଫାର୍ମ ହାଉସରେ ପଶି ତାଙ୍କୁ ପିସ୍ତଲ ଓ ଖଣ୍ଡା ଦେଖାଇ ମାଲିକକୁ କହିବ ୬ ଲକ୍ଷ ଟଙ୍କା ବଟି ଦେବ ନଚେତ ଜୀବନରେ ମାରିଦେବୁ ବୋଲି ଧମକ ଦେଇ ଚାଲି ଯାଇଥିଲେ। ଏ ନେଇ ଫାର୍ମ ହାଉସରେ କାମ କରୁଥିବା ଦମ୍ପତି ମାଲିକ ରମେଶଙ୍କୁ ଜଣେଇଥିଲେ। ଗତ ମଙ୍ଗଳବାର ରମେଶ ଗୋଳନ୍ଥରା ଥାନାରେ ଲିଖିତ ଅଭିଯୋଗ କରିଥିଲେ। ପୋଲିସ ନଂ ୨୭୧/୨୫ରେ ପ୍ରକାରେ ମାମଲା ରୁଜୁ କରିବା ସହ ଘଟଣା ସ୍ଥଳକୁ ଯାଇ ତଦନ୍ତ ଆରମ୍ଭ କରିଥିଲା। ବୁଧବାର ପୋଲିସ ବିଭିନ୍ନ ଅଞ୍ଚଳରେ ଚଢ଼ାଉ କରି ସମ୍ପୃକ୍ତ ୪ ଜଣଙ୍କୁ ଉଠେଇ ନେଇ ଥିଲା। ଅଭିଯୁକ୍ତ ଦେବେନ୍ଦ୍ରଙ୍କ ନାଁରେ ଗୋଟିଏ, ନୀଳମାଧବ ନାଁରେ ୨ଟି, ନୀତିକେସନ ନାଁରେ ୨ଟି ଓ ପାଣ୍ଡା ନାଁରେ ଗୋଟିଏ ମାମଲା ବ୍ରହ୍ମପୁର ପୋଲିସ ଜିଲା ଓ ବିଭିନ୍ନ ଥାନାରେ ରହିଥିବା ଥାନାଧିକାରୀ ସୂଚନା ଦେଇଛନ୍ତି।
