ନୂଆଦିଲ୍ଲୀ,୩୦ା୭: ୨୦୨୪ ଲୋକ ସଭା ନିର୍ବାଚନକୁ ନଜରରେ ରଖି ଭାଜପା ଅଧ୍ୟକ୍ଷ ଜେ.ପି. ନଡ୍ଡା ଦଳର କେନ୍ଦ୍ରୀୟ ଟିମ୍ରେ ବଡ଼ ଧରଣର ଅଦଳବଦଳ କରିଛନ୍ତି। ଉତ୍ତରପ୍ରଦେଶର ଜଣେ ପସମାନ୍ଦା ମୁସଲମାନଙ୍କୁ ଦଳର ଉପାଧ୍ୟକ୍ଷ କରାଯାଇଥିବାବେଳେ ତେଲଙ୍ଗାନା ପୂର୍ବତନ ଭାଜପା ରାଜ୍ୟ ସଭାପତି ବନ୍ଦି ସଞ୍ଜୟ କୁମାରଙ୍କୁ ରାଷ୍ଟ୍ରୀୟ ସାଧାରଣ ସମ୍ପାଦକ କରାଯାଇଛି। ସାଧାରଣ ସମ୍ପାଦକ ଥିବା କର୍ନାଟକ ନେତା ସି.ଟି. ରବି, ଆସାମର ଲୋକ ସଭା ସଦସ୍ୟ ଦିଲୀପ ସାଇକିଆଙ୍କୁ ବାଦ୍ ଦିଆଯାଇଛି। ସେହିପରି ଉତ୍ତରପ୍ରଦେଶର ଦୁଇ ନେତା ବିନୋଦ ସୋଙ୍କର, ହରିଶ ଦ୍ୱିବେଦୀ ଏବଂ ସୁନୀଲ ଦେଓଧରଙ୍କୁ ସମ୍ପାଦକ ପଦରୁ ବିଦା କରାଯାଇଛି। ୯ ଜଣ ସାଧାରଣ ସମ୍ପାଦକଙ୍କ ମଧ୍ୟରୁ ୭ ଜଣଙ୍କ ପଦବୀ ସୁରକ୍ଷିତ ଥିବାବେଳେ ୨ ନୂଆ ମୁହଁ ସାମିଲ ହୋଇଛନ୍ତି। ସେମାନଙ୍କ ମଧ୍ୟରେ ଉତ୍ତରପ୍ରଦେଶର ରାଜ୍ୟ ସଭା ସଦସ୍ୟ ରାଧାମୋହନ ଅଗ୍ରଓ୍ବାଲ ଅଛନ୍ତି। ପାସମାନ୍ଦା ମୁସଲମାନ ସମ୍ପ୍ରଦାୟର ଭୋଟ୍କୁ ନଜରରେ ରଖି ଆଲିଗଡ଼ ମୁସ୍ଲିମ ୟୁନିଭର୍ସିଟି (ଏଏମ୍ୟୁ)ର ପୂର୍ବତନ କୁଳପତି (ଭିସି) ତାରିକ୍ ମନସୁରଙ୍କୁ ଭାଜପା ଏହାର ଉପାଧ୍ୟକ୍ଷ ନିଯୁକ୍ତ କରିଛି। ଏଏମ୍ୟୁରେ ଏନ୍ଆର୍ସି ବିରୋଧୀ ଏବଂ ସିଏଏ ବିରୋଧୀ ଆନ୍ଦୋଳନକୁ ନିୟନ୍ତ୍ରଣ କରିବାରେ ମନସୁର ଗୁରୁତ୍ୱପୂର୍ଣ୍ଣ ଭୂମିକା ନିଭାଇଥିଲେ। ପରେ ସେ ଆର୍ଏସ୍ଏସ୍ ପାଇଁ କାମ କରିଥିଲେ।
ନବନିଯୁକ୍ତ ସମ୍ପାଦକଙ୍କ ମଧ୍ୟରେ ଅଛନ୍ତି ବର୍ଷିୟାନ କଂଗ୍ରେସ ନେତା ଏ.କେ. ଆଣ୍ଟୋନିଙ୍କ ପୁଅ ଅନିଲ ଆଣ୍ଟୋନି, ସୁରେନ୍ଦ୍ର ସିଂ ନାଗର ଏବଂ କାମାକ୍ଷା ପ୍ରସାଦ ତାସା। ଏମାନେ ୟୁପି ଏବଂ ଆସାମରୁ ରାଜ୍ୟ ସଭା ସଦସ୍ୟ ଅଛନ୍ତି। ନାଗର ପଶ୍ଚିମ ଉତ୍ତରପ୍ରଦେଶର ଜଣେ ପ୍ରଭାବୀ ଗୁର୍ଜାର ନେତା ହୋଇଥିବାବେଳେ ତାସାଙ୍କର ଉତ୍ତରପୂର୍ବାଞ୍ଚଳ ରାଜ୍ୟର ଆଦିବାସୀଙ୍କ ଉପରେ ଭଲ ପ୍ରଭାବ ରହିଛି। ଭାଜପାର ନୂଆ କାର୍ଯ୍ୟକର୍ତ୍ତା ତାଲିକାରେ ୧୩ ଉପାଧ୍ୟକ୍ଷ, ୯ ସାଧାରଣ ସମ୍ପାଦକ ଏବଂ ୧୩ ସମ୍ପାଦକ ରହିଛନ୍ତି। ସାଧାରଣ ସମ୍ପାଦକ ବି.ଏଲ୍ ସନ୍ତୋଷଙ୍କୁ ସାଂଗଠନିକ ଦାୟିତ୍ୱ ଦିଆଯାଇଛି। ବିହାରର ଲୋକ ସଭା ସଦସ୍ୟ ତଥା ପୂର୍ବତନ କେନ୍ଦ୍ରମନ୍ତ୍ରୀ ରାଧାମୋହନ ସିଂଙ୍କୁ ଉପାଧ୍ୟକ୍ଷ ପଦରୁ ବାଦ୍ ଦିଆଯାଇଛି। ନୂଆ ଉପାଧ୍ୟକ୍ଷଙ୍କ ମଧ୍ୟରେ ଉତ୍ତରପ୍ରଦେଶର ପୂର୍ବତନ ଭାଜପା ସଭାପତି ତଥା ରାଜ୍ୟ ସଭା ସଦସ୍ୟ ଏମ୍.ପି. ଲକ୍ଷ୍ମୀକାନ୍ତ ବାଜପାୟୀ ରହିଛନ୍ତି।
