ପ୍ୟାରିସ୍, ୧ା୬(ପି.ଟି.): କ୍ଲେ କୋର୍ଟ ଗ୍ରାଣ୍ଡସ୍ଲାମ ଟୁର୍ନାମେଣ୍ଟ ଫ୍ରେଞ୍ଚ ଓପନରୁ ବିଦାୟ ନେଇଛନ୍ତି ପୂର୍ବତନ ଚାମ୍ପିୟନ ଜେଲେନା ଓଷ୍ଟାପେଙ୍କୋ। ଏକାଧିକ ସିଡେଡ୍ ଖେଳାଳି ସହଜ ବିଜୟ ହାସଲ କରିଥିବା ବେଳେ ଓଷ୍ଟାପେଙ୍କୋ ଓ ବିଶ୍ୱ ମାନ୍ୟତାର ୫ ନମ୍ବର ସ୍ଥାନରେ ଥିବା କାରୋଲିନା ଗାର୍ସିଆ ବିଜୟୀ ହୋଇଛନ୍ତି। ସେହିପରି ପୁରୁଷ ବର୍ଗରେ ଷ୍ଟିଫାନୋସ୍ ସିତ୍ସିପାସ, ସେବାଷ୍ଟିଆନ ଅଫ୍ନର ଓ ଫାବିଓ ଫଗନିନି ବିଜୟୀ ହୋଇଛନ୍ତି। ୨୦୧୭ରେ ଫ୍ରେଞ୍ଚ ଓପନ ଚାମ୍ପିୟନ୍ ରହିଥିବା ଓଷ୍ଟାପେଙ୍କୋ ବୁଧବାର ଦ୍ୱିତୀୟ ରାଉଣ୍ଡ ମ୍ୟାଚରେ ପଦାର୍ପଣକାରୀ ଆମେରିକାର ପେଟନ୍ ଷ୍ଟିଅର୍ନସଙ୍କ ନିକଟରୁ ପରାଜିତ ହୋଇଛନ୍ତି। ୟୁନିଭର୍ସିଟି ଅଫ ଟେକ୍ସାସ ପକ୍ଷରୁ ଖେଳୁଥିବା ଷ୍ଟିଅର୍ନସ ଜୁନ୍ ୨୦୨୨ରେ ହିଁ ପ୍ରଫେସନାଲ ଟେନିସ ଖେଳିବା ଆରମ୍ଭ କରିଥିଲେ। ବିଶ୍ୱ ମାନ୍ୟତାର ୧୭ ନମ୍ବର ସ୍ଥାନରେ ରହିଥିବା ଲାଟଭିଆର ଓଷ୍ଟାପେଙ୍କୋ ୨୮ଟି ଅନଫୋର୍ସଡ ଏରର୍ କରିଥିଲେ। ଏହା ସହିତ ସେ ୬-୩, ୧-୬ ଓ ୬-୨ ସେଟରେ ପରାଜିତ ହୋଇଥିଲେ। ପ୍ରଥମ ରାଉଣ୍ଡରେ ୨୧ ବର୍ଷୀୟ ଷ୍ଟିଅର୍ନସ ବିଜୟୀ ହୋଇଥିବା ବେଳେ ପରବର୍ତ୍ତୀ ରାଉଣ୍ଡକୁ ଜିତିଥିଲେ। ଅନ୍ତିମ ରାଉଣ୍ଡରେ ଚମତ୍କାର ଖେଳ ପ୍ରଦର୍ଶନ କରିବା ସହିତ ତୃତୀୟ ରାଉଣ୍ଡରେ ପ୍ରବେଶ କରିଥିଲେ ଷ୍ଟିଅର୍ନସ୍। ଅନ୍ୟପକ୍ଷରେ ୫ ନମ୍ବର ମାନ୍ୟତାପ୍ରାପ୍ତ ଗାର୍ସିଆ ୬-୪, ୩-୬ ଓ ୫-୭ ସେଟରେ ଆନ୍ନା ବ୍ଲିଙ୍କୋଭାଙ୍କ ନିକଟରୁ ପରାଜିତ ହୋଇଛନ୍ତି। ୩ ନମ୍ବର ମାନ୍ୟତା ପ୍ରାପ୍ତ ଜେସିକା ପେଗୁଲା ମଧ୍ୟ ବିଜୟୀ ହୋଇଛନ୍ତି। ଜେସିକା ଇଟାଲୀର କାମିଲା ଗିଓର୍ଗିଙ୍କ ବିପକ୍ଷରେ ୬-୨ରେ ଆଗୁଆ ରହିଥିଲେ। କାମିଲା ଓହରିଯିବା କାରଣରୁ ଜେସିକା ତୃତୀୟ ରାଉଣ୍ଡରେ ପ୍ରବେଶ କରିଥିଲେ। ଅନ୍ୟ ଏକ ମ୍ୟାଚରେ ଦାରିଆ କାସାଟ୍କିନା ୬-୩ ଓ ୬-୪ ସେଟରେ ମାର୍କେଟା ଭୋଣ୍ଡ୍ରୋସୋଭାଙ୍କୁ ପରାସ୍ତ କରିଥିଲେ। ସ୍ବାମୀ ଗେଲ୍ ମନଫିଲ୍ସ ମଙ୍ଗଳବାର ବିଜୟୀ ହୋଇଥିବା ବେଳେ ଏଲିନା ସ୍ବିତୋଲିନା ୨-୬, ୬-୩ ଓ ୬-୧ ରେ ଆମେରିକାର ଷ୍ଟର୍ମ ସାଣ୍ଡର୍ସଙ୍କୁ ପରାସ୍ତ କରିଛନ୍ତି। ଦୁଇ ନମ୍ବର ମାନ୍ୟତାପ୍ରାପ୍ତ ଆରିନା ସାବାଲେଙ୍କା ୭-୫, ୬-୨ ସେଟ୍ରେ ଇରିନା ଶାମନୋଭିଚ୍ଙ୍କୁ ପରାସ୍ତ କରିଥିଲେ।
ପୁରୁଷ ସିଙ୍ଗଲ୍ସରେ ଗ୍ରୀସ୍ର ଷ୍ଟିଫାନୋସ୍ ସିତ୍ସିପାସ ୬-୩, ୭-୬(୭-୪) ଓ ୬-୨ ସେଟରେ ସ୍ପେନ୍ର ରବର୍ଟୋ କାରବାଲେସ୍ ବାଏନାଙ୍କୁ ପରାସ୍ତ କରିଥିଲେ। ୨୪ ନମ୍ବର ମାନ୍ୟତାପ୍ରାପ୍ତ ଆମେରିକାର ସେବାଷ୍ଟିଆନ କୋର୍ଡାଙ୍କୁ ପରାସ୍ତ କରିଛନ୍ତି ଅଷ୍ଟ୍ରିଆର ଅଣସିଡେଡ୍ ଖେଳାଳି ସେବାଷ୍ଟିଆନ ଅଫ୍ନର। ୬-୩, ୭-୬(୭-୧) ଓ ୬-୪ ସେଟରେ ଅଫ୍ନର ଏହି ମ୍ୟାଚ୍କୁ ଜିତି ନେଇଥିଲେ। ଅନ୍ୟ ଏକ ମ୍ୟାଚ୍ରେ ଇଟାଲୀର ଫାବିଓ ଫଗନିନି ୬-୪, ୭-୬(୭-୫) ଓ ୬-୨ ସେଟ୍ରେ ଅଷ୍ଟ୍ରେଲିଆର ଜାସନ କବଲେରଙ୍କୁ ପରାସ୍ତ କରିଥିଲେ।
