ଦାରିଙ୍ଗବାଡି, ୨୪।୯ (ଅରୁଣ ସାହୁ):କନ୍ଧମାଳ ଜିଲା ଦାରିଙ୍ଗବାଡି ବ୍ଲକ ଅଞ୍ଚଳରେ ଦିନକୁ ଦିନ ମକା ଚାଷୀଙ୍କ ସଂଖ୍ୟା ବୃଦ୍ଧି ପାଇଛି। ଭଲ ରୋଜଗାର ମଧ୍ୟ ମକା ଦେଇଛି। କମ ସମୟ ମଧ୍ୟରେ ମକା ଅମଳ ହେଉଛି। ଆଉ ଚାଷୀ ଲାଭବାନ ମଧ୍ୟ ହେଉଛନ୍ତି। ଉକ୍ତ ବ୍ଲକର ପ୍ରଥମେ କାଟିଙ୍ଗିଆ, ଝିଞ୍ଜିରୀଗୁଡା ଓ କୁମ୍ଭାରୀଗାଁ ପଞ୍ଚାୟତରୁ ଏହି ଚାଷ ଏକ ଦଶନ୍ଧି ପୂର୍ବରୁ ଏହି ଚାଷ ଆରମ୍ଭ ହୋଇଥିବାବେଳେ ଏବେ ବ୍ଲକର ଅଧାରୁ ଉର୍ଦ୍ଧ ପଞ୍ଚାୟତରେ ଏହି ଚାଷ କରାଯାଉଛି। ତେବେ ଏହି ଚାଷ ପାଇଁ ପନିପରିବା ଚାଷ ସମେତ ଜୈବିକ ପଦ୍ଧତିରେ ହେଉଥିବା ବିଶ୍ୱ ବିଖ୍ୟାତ ହଳଦୀ ଚାଷକୁ ମଧ୍ୟ ଚାଷୀ ଚାଷ କରିବାକୁ ମଙ୍ଗୁ ନ ଥିବା ଚିନ୍ତାର କାରଣ ହୋଇଛି। ଏବେ ମକା ଚାଷକୁ ଚାଷୀ ନିଜ ଧାନ ହଳଦୀ, ପନିପରିବା ଚାଷ କରୁଥିବା କ୍ଷେତରେ କରୁଥିବା ସହ ପାହାଡ଼ରେ ପୋଡୁ ଚାଷ କରି ଜଙ୍ଗଲ ନଷ୍ଟ କରି ମକା ଚାଷକୁ ଚାଷୀ ପ୍ରାଧାନ୍ୟ ଦେଉଥିବା ଯୋଗୁ ଏବେ ଜଙ୍ଗଲ ଉଜୁଡିବା ଆଶଙ୍କା ବୃଦ୍ଧି ହୋଇଛି। ଦାରିଙ୍ଗବାଡି ବନାଞ୍ଚଳର ପ୍ଳିହେରୀ, ଦାସିଙ୍ଗବାଡି ପଞ୍ଚାୟତ ଅଞ୍ଚଳର ଦାରିଙ୍ଗବାଡିଠାରୁ ବ୍ରାହ୍ମଣୀଗାଁକୁ ସଂଯୋଗ କରୁଥିବା ପୂର୍ତ୍ତ ବିଭାଗ ରାସ୍ତାକଡ଼ରେ ଥିବା ପାହାଡ଼ ଗୁଡିକରେ ଲଣ୍ଡା ଅବସ୍ଥା କେବଳ ମକାମୟ ହୋଇଛି ବନ ବିଭାଗର କର୍ମଚାରୀ ଓ ଅଧିକାରୀ ଚେଇଁ ଶୋଇଥିବା ଦେଖିବାକୁ ମିଳିଛି। ବନ ବିଭାଗ ସବୁ ଜାଣି ଚୁପ ରହିଥିବାରୁ ବର୍ତ୍ତମାନ ଜଙ୍ଗଲ ସଂକଟରେ ରହିଥିବା ଜଣାପଡିଛି। ଦାରିଙ୍ଗବାଡି ବନାଞ୍ଚଳ ଅଧିକାରୀ ମାଧଚନ୍ଦ୍ର ବେହେରାଙ୍କୁ ଏନେଇ ପଚାରିବାରୁ ସେ କୌଣସି ଉତ୍ତର ଦେଇ ନ ଥିଲେ।
