ରାୟଗଡ଼ା,୪।୮(ଆଶିଷ ରଞ୍ଜନ ପଣ୍ଡା): ଜିଲା ସଦର ମହକୁମାର ମୁଖ୍ୟ ସଂଯୋଗପଥ ପାଲଟିଥିବା ଫ୍ଲାଏଓଭର ଏବେ ବିପଦସଙ୍କୁଳ ଅବସ୍ଥାରେ ରହିଛି। ଏହାର ମରାମତି ପାଇଁ ବାରମ୍ବାର ଦାବି ହେଉଥିଲେ ମଧ୍ୟ ଜାତୀୟ ରାଜପଥ ବିଭାଗ ପକ୍ଷରୁ ଏହାର ମରାମତି କରାଯାଉ ନାହିଁ କି ନୂତନ ପୋଲ ନିର୍ମାଣ ହେଉନାହିଁ। ବିପଦସଙ୍କୁଳ ଅବସ୍ଥାରେ ଥିବା ଏହି ଫ୍ଲାଏଓଭର କେତେବେଳେ ଯେ ଭୁଶୁଡିପଡ଼ିବ ତାହା କହିହେବ ନାହିଁ। ଅନ୍ୟପକ୍ଷରେ ବାଇପାସ୍ର ଯେଉଁ ରାସ୍ତା ଦେଇ ତୃତୀୟ ରେଳଧାରଣା ଯିବ ସେଠାରେ ଜାତୀୟ ରାଜପଥ ବିଭାଗ ପକ୍ଷରୁ ୫୫ କୋଟି ଟଙ୍କା ବ୍ୟୟରେ ନୂତନ ଫ୍ଲାଏଓଭର ନିର୍ମାଣ ପାଇଁ ପ୍ରସ୍ତାବ ରହିଛି। ହେଲେ ତାହା ପ୍ରସ୍ତାବରେ ସୀମିତ ରହିଯାଇଛି। ପୁରୁଣା ଫ୍ଲାଏଓଭର ଯେକୌଣସି ସମୟରେ ଭୁଶୁଡ଼ିବା ସ୍ଥିତିରେ ଥିବାବେଳେ ନୂତନ ଫ୍ଲାଏଓଭର ନିର୍ମାଣ ହେଉ ନ ଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଉଛି। ପୂର୍ବରୁ ରେଳଧାରଣା ଦେଇ ଯାତାୟାତ କରିବାକୁ ପଡ଼ୁଥିବାରୁ ବହୁ ଦୁର୍ଘଟଣା ଘଟୁଥିଲା। ଏହାକୁ ଦୃଷ୍ଟିରେ ରଖି ୧୯୯୯ ମସିହାରେ ଏହି ଫ୍ଲାଏଓଭର ନିର୍ମାଣ ହୋଇଥିଲା। ହେଲେ ଏଥିରେ ଏବେ ବିଭିନ୍ନ ସ୍ଥାନରେ ଫାଟ ଦେଖିବାକୁ ମିଳିଛି। ଏହାର କିଛି ପାର୍ଶ୍ୱ ଲୁହା ଏଙ୍ଗଲ ଭରସାରେ ଛିଡ଼ା ହୋଇରହିଛି।
ସୂଚନାଯୋଗ୍ୟ, ୨୦୧୪ ମସିହାରେ ଏହି ଫ୍ଲାଏଓଭର ତଳେ ରହିଥିବା ଏକ ବେଆଇନ ସ୍କ୍ରାପ୍ ଗୋଦାମରେ ନିଆଁ ଲାଗି ଯାଇଥିଲା। ଫଳରେ ଅତ୍ୟଧିକ ଉତ୍ତାପ ଯୋଗୁ ଫ୍ଲାଏଓଭରର ଲୁହାରଡ୍ଗୁଡ଼ିକ ବଙ୍କା ହୋଇ ଫାଟ ସୃଷ୍ଟି ହୋଇଥିଲା। ପରେ ଫ୍ଲାଏ ଓଭରରେ ଅନେକ ଛୋଡବଡ଼ ଗର୍ତ୍ତ ସୃଷ୍ଟି ହୋଇଛି। ଏହା ସହରର ମୁଖ୍ୟ ସଡ଼କପଥ ତଥା ୩୨୬ ନଂ. ଜାତୀୟ ରାଜପଥରେ ରହିଥିବାରୁ ପ୍ରତିଦିନ ହଜାର ସଂଖ୍ୟାରେ ଭାରିଯାନ ଯାତାୟାତ କରୁଛି। ଫ୍ଲାଏଓଭର ବିଭିନ୍ନ କୋଣରେ ଗଛଲତା ବଢ଼ୁଥିଲେ ମଧ୍ୟ ଏହାକୁ କଟାଯାଉ ନାହିଁ, କି ଫ୍ଲାଏଓଭରର ରକ୍ଷଣାବେକ୍ଷଣ କରାଯାଉନାହିଁ। ଏହା ନିର୍ମାଣ ହେବା ପରଠାରୁ ପୂର୍ତ୍ତ ବିଭାଗ ଅଧୀନରେ ରହିଥିଲା। ସେତେବେଳେ ମଧ୍ୟ ରକ୍ଷଣାବେକ୍ଷଣ ହେଉ ନ ଥିଲା। ଏବେ ଏହା ଜାତୀୟ ରାଜପଥ ବିଭାଗ ଅଧୀନରେ ରହିଥିଲେ ମଧ୍ୟ ଏହାର ରକ୍ଷଣାବେକ୍ଷଣ ହେଉନାହିଁ। ଏଭଳିକି ଜନସାଧାରଣ, ରାଜନେତା, ଜିଲା ପ୍ରଶାସନ ଓ ଖୋଦ୍ ଏମ୍ପି ସପ୍ତଗିରି ଉଲାକା ଏହାର ରକ୍ଷଣାବେକ୍ଷଣ ପାଇଁ ଜାତୀୟ ରାଜପଥ ବିଭାଗକୁ କହିଥିଲେ ମଧ୍ୟ କେହି ଖାତିର କରୁ ନ ଥିବା ଅଭିଯୋଗ ହେଉଛି। ତେବେ ଯେକୌଣସି ମୁହୂର୍ତ୍ତରେ ଏହି ଫ୍ଲାଏଓଭର ଭୁଶୁଡି ପଡ଼ି ବାର ସମ୍ଭାବନା ରହିଛି। ଏହା ହେଲେ ନିଶ୍ଚୟ ବହୁ ପରିମାଣରେ ଧନଜୀବନ ନଷ୍ଟ ହେବାର ଆଶଙ୍କା ରହିଛି। ତେଣୁ ଜାତୀୟ ରାଜପଥ ବିଭାଗ ଏଥିପ୍ରତି ବିଶେଷ ଧ୍ୟାନ ଦେଇ ଏହାର ସ୍ଥାୟୀ ସମାଧାନ କରିବା ଆବଶ୍ୟକ ବୋଲି ସାଧାରଣରେ ଦାବି ହୋଇଛି। ଏ ନେଇ ଜାତୀୟ ରାଜପଥ ବିଭାଗ ସହକାରୀ ଯନ୍ତ୍ରୀ ବିକ୍ରମ ପାଣିଗ୍ରାହୀଙ୍କୁ ଫୋନ ନ ଲାଗିବାରୁ ଯୋଗାଯୋଗ ହୋଇପାରି ନାହିଁ।
