ନୂଆଦିଲ୍ଲୀ,୧୧ା୬:ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନୂଆ କ୍ୟାବିନେଟ୍ରେ ଜଣେ ହେଲେ ମୁସଲମାନଙ୍କୁ ସ୍ଥାନ ମିଳିନାହିଁ। ଭାରତ ଇତିହାସରେ ଏହା ପ୍ରଥମ ଘଟଣା। ୭୨ ଜଣିଆ ମନ୍ତ୍ରିମଣ୍ଡଳରେ ବିଭିନ୍ନ ରାଜ୍ୟ, ବର୍ଗ ଓ ଜାତିରୁ ପ୍ରତିନିଧିତ୍ୱ ମିଳିଥିବାବେଳେ ୨୦ କୋଟି ଜନସଂଖ୍ୟା ଥିବା ମୁସଲମାନ ସମ୍ପ୍ରଦାୟରୁ ଜଣକୁ ସୁଯୋଗ ନ ମିଳିବା ଅନେକଙ୍କୁ ଆଶ୍ଚର୍ଯ୍ୟ କରିଛି। ମୋଦିଙ୍କ ଦ୍ୱିତୀୟ ପାଳି ସରକାରରେ ମୁଖ୍ତାର ଆବାସ ନକ୍ଭି ସଂଖ୍ୟାଲଘୁ ବ୍ୟାପାର ମନ୍ତ୍ରୀ ଥିଲେ। ୩ ବର୍ଷ ପରେ ସେ ରାଜ୍ୟ ସଭାକୁ ପୁନଃ ନିର୍ବାଚିତ ହୋଇ ନ ପାରିବାରୁ ମନ୍ତ୍ରିମଣ୍ଡଳ ମୁସଲମାନ ଶୂନ୍ୟ ହୋଇଯାଇଥିଲା। ୨୦୧୪ରେ ମୋଦିଙ୍କ ପ୍ରଥମ ପାଳି ସରକାରରେ ରାଜ୍ୟ ସଭା ସଦସ୍ୟ ନଜମା ହେପତୁଲ୍ଲା ଏକମାତ୍ର ମୁସଲମାନ ମନ୍ତ୍ରୀ ଥିଲେ। ତାଙ୍କୁ ସଂଖ୍ୟାଲଘୁ ବ୍ୟାପାର ଦାୟିତ୍ୱ ମିଳିଥିଲା। ୧୯୯୯ରେ ଅଟଳ ବିହାରୀ ବାଜପେୟୀଙ୍କ ନେତୃତ୍ୱାଧୀନ ଏନ୍ଡିଏ ସରକାରରେ ୨ ମୁସଲମାନ ମନ୍ତ୍ରୀ ଥିଲେ ଶାହନଓ୍ବାଜ ହୁସେନ୍ ଏବଂ ଓମାର ଅବଦୁଲ୍ଲା। ୧୯୯୮ରେ ବାଜପେୟୀ ସରକାରରେ ନକ୍ଭିଙ୍କୁ ରାଷ୍ଟ୍ରମନ୍ତ୍ରୀ କରାଯାଇଥିଲା। ୨୦୦୪ ଏବଂ ୨୦୦୯ରେ କଂଗ୍ରେସ ନେତୃତ୍ୱାଧୀନ ଉପା ସରକାରରେ ଯଥାକ୍ରମେ ୪ ଓ ୫ ଜଣ ମୁସଲମାନ ମନ୍ତ୍ରୀ ହୋଇଥିଲେ। ଏହା ପୂର୍ବରୁ ସବୁ ସରକାରରେ ଅନୂ୍ୟନ ଜଣେ ମୁସଲମାନ ମନ୍ତ୍ରୀ ରହୁଥିଲେ। ଅଷ୍ଟାଦଶ ଲୋକ ସଭାକୁ ୨୪ ଜଣ ମୁସଲମାନ ଏମ୍ପି ନିର୍ବାଚିତ ହୋଇଛନ୍ତି। ଇଣ୍ଡିଆ ମେଣ୍ଟରୁ ୨୧ ଜଣ ମୁସଲମାନ ଏମ୍ପି ଜିତିଥିବାବେଳେ ଏଆଇଏମ୍ଆଇଏମ୍ରୁ ଜଣେ, ଜମ୍ମୁ-କଶ୍ମୀର ଏବଂ ଲଦାଖରୁ ଜଣେ ଲେଖାଏ ମୁସଲମାନ ଏମ୍ପି ଅଛନ୍ତି।
