ନୂଆଦିଲ୍ଲୀ,୧୮।୮: କୋରମ ଅଭାବରୁ ଟାଟା ସନ୍ସର ବାର୍ଷିକ ସାଧାରଣ ବୈଠକ (AGM) ସ୍ଥଗିତ ରଖାଯାଇଛି। ବୈଠକ ପାଇଁ ଆବଶ୍ୟକ ସଂଖ୍ୟକ ସଦସ୍ୟ ଉପସ୍ଥିତ ନଥିଲେ, ଯାହା ଫଳରେ ଏହାକୁ ସ୍ଥଗିତ ରଖିବା ଜରୁରୀ ହୋଇପଡ଼ିଥିଲା। ଉଲ୍ଲେଖଯୋଗ୍ୟ, ଗତ ୧୦୦ ବର୍ଷ ମଧ୍ୟରେ ଏହା ପ୍ରଥମ ଥର ପାଇଁ ଟାଟା ସନ୍ସ ଏହାର AGM ସ୍ଥଗିତ ରଖିବାକୁ ନିଷ୍ପତ୍ତି ନେଇଛି।
ଭିଡିଓ କନଫରେନ୍ସିଂ ଏବଂ ଅଡିଓ-ଭିଜୁଆଲ ମାଧ୍ୟମରେ AGM ଅପରାହ୍ନ ୨.୩୦ରେ ସ୍ଥିର କରାଯାଇଥିଲା। କିନ୍ତୁ ଆବଶ୍ୟକୀୟ କୋରମ ପୂରଣ ନ ହେବାରୁ ଏହାକୁ ସ୍ଥଗିତ ରଖାଯାଇଥିଲା। ସୂତ୍ର ଅନୁଯାୟୀ, ସାର୍ ରତନ ଟାଟା ଟ୍ରଷ୍ଟ (SRTT) ଏବଂ ସାର୍ ଦୋରାବଜୀ ଟାଟା ଟ୍ରଷ୍ଟ ଦ୍ୱାରା ମିଳିତ ଭାବରେ ମନୋନୀତ ହେବାକୁ ଥିବା ପ୍ରତିନିଧିଙ୍କ ସମ୍ପର୍କରେ ବିଦ୍ୟମାନ ନିୟାମକ ପ୍ରତିବନ୍ଧକ ଯୋଗୁ ଏହି ସମସ୍ୟା ଉପୁଜିଥିଲା।
ମହାରାଷ୍ଟ୍ର ଦାତବ୍ୟ କମିଶନରଙ୍କ ଦ୍ୱାରା ଲାଗୁ କରାଯାଇଥିବା ନିୟାମକ ପ୍ରତିବନ୍ଧକ ଯୋଗୁ SRTT ବର୍ତ୍ତମାନ ଜଣେ ଯୁଗ୍ମ ପ୍ରତିନିଧିଙ୍କୁ ମନୋନୀତ କରିପାରିବ ନାହିଁ। ଟାଟା ସନ୍ସର ଆକ୍ଟଲ୍ସ ଅଫ ଆସୋସିଏସନ ଅନୁଯାୟୀ, ଏକ ବୈଧ କୋରମ ପାଇଁ ଉପରୋକ୍ତ ଯୁଗ୍ମ ମନୋନୀତ ସମେତ ଅତି କମରେ ପାଞ୍ଚ ଜଣ ସଦସ୍ୟଙ୍କ ଉପସ୍ଥିତି ଆବଶ୍ୟକ। ଫଳସୱରୂପ, ଏହି ପ୍ରତିନିଧିଙ୍କ ଅନୁପସ୍ଥିତି କୋରମକୁ ପ୍ରଭାବିତ କରିଥିଲା।
ଏନ. ଚନ୍ଦ୍ରଶେଖରନ ଅଗଷ୍ଟ ୧୨ରେ ଟାଟା ସନ୍ସର ଅଧ୍ୟକ୍ଷ ପଦରୁ ଇସ୍ତଫା ଦେଇଥିଲେ।ଯଦିଓ ସେ ଆସନ୍ତା ବର୍ଷ ଫେବୃଆରୀ ପର୍ଯ୍ୟନ୍ତ ଏହି ପଦବୀରେ ରହିବେ। ଏହି ବର୍ଷ ଆରମ୍ଭରେ, ଫେବୃଆରୀରେ, ବୋର୍ଡ ଚନ୍ଦ୍ରଶେଖରନଙ୍କୁ ପୁନଃନିଯୁକ୍ତି ନିଷ୍ପତ୍ତିକୁ ସ୍ଥଗିତ ରଖିଥିଲା। ଏନ. ଚନ୍ଦ୍ରଶେଖରନ ୨୦୧୭ରୁ ଅଧ୍ୟକ୍ଷ ଭାବରେ କାର୍ଯ୍ୟ କରିଛନ୍ତି।
ଏହା ଉଲ୍ଲେଖନୀୟ ଯେ, ଟାଟା ସନ୍ସର ଏକ ଶତାବ୍ଦୀରୁ ଅଧିକ ସମୟ ଧରି ଚାଲିଥିବା କର୍ପୋରେଟ ଇତିହାସରେ ଏଜିଏମ ସ୍ଥଗିତ ରଖିବା ଏକ ବିରଳ ଘଟଣା। ସମ୍ଭବତଃ ଏହା ପ୍ରଥମ। କମ୍ପାନୀ ଆଇନ ଅନୁଯାୟୀ, ପ୍ରତ୍ୟେକ ଆର୍ଥିକ ବର୍ଷ ସମାପ୍ତ ହେବା ପରେ ଏକ ନିର୍ଦିଷ୍ଟ ସମୟସୀମା ମଧ୍ୟରେ ଏକ ଏଜିଏମ କରିବା ବାଧ୍ୟତାମୂଳକ। ସାଧାରଣତଃ, ଏହାକୁ ସମ୍ପୂର୍ଣ୍ଣ ବାତିଲ କରିବାର କୌଣସି ବ୍ୟବସ୍ଥା ନାହିଁ। ଅସାଧାରଣ ପରିସ୍ଥିତିରେ, ଏହାକୁ କେବଳ NCLT ଭଳି ଆଇନଗତ ଟ୍ରିବ୍ୟୁନାଲର ଆଦେଶ ଦ୍ୱାରା ସ୍ଥଗିତ କିମ୍ବା ବନ୍ଦ କରାଯାଇପାରିବ।
ଏହା ଉଲ୍ଲେଖନୀୟ ଯେ, ୧୯୧୭ ମସିହାରେ ପ୍ରତିଷ୍ଠିତ ଟାଟା ସନ୍ସ, କର୍ପୋରେଟ ପ୍ରଶାସନ ମାନଦଣ୍ଡକୁ କଡ଼ାକଡ଼ି ପାଳନ କରିଆସିଛି ଏବଂ ଏହାର ଇତିହାସରେ ନିୟମିତ ବାର୍ଷିକ ବୈଠକ ଆୟୋଜନ କରିଛି। ସାଇରସ ମିସ୍ତ୍ରୀ ବିବାଦ ଭଳି ପ୍ରମୁଖ ବିବାଦ ସମୟରେ ମଧ୍ୟ ବୈଠକ ଅନୁଷ୍ଠିତ ହେଉଥିଲା କିନ୍ତୁ କେବେବି ବାତିଲ ହୋଇ ନ ଥିଲା।
Dharitri – Odisha’s No.1 Odia Daily
