ଥୁଆମୂଳ ରାମପୁର, ୧୬।୬(ଦୁର୍ଗା କୀର୍ତ୍ତି): ଓଡ଼ିଶାର ଗଣପର୍ବ ‘ରଜ’ ଏବେ ଆଦିବାସୀ ଅଧ୍ୟୁଷିତ ଦୁର୍ଗମ ଅଞ୍ଚଳରେ ମଧ୍ୟ ବେଶ୍ ଲୋକପ୍ରିୟତା ହାସଲ କରିଛି। କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକର ଗୋପାଳପୁର ପଞ୍ଚାୟତ ଅନ୍ତର୍ଗତ ଲୋହରାଯୋର ଗ୍ରାମରେ ଚଳିତ ବର୍ଷ ଅପୂର୍ବ ଉତ୍ସାହର ସହ ରଜ ପର୍ବ ପାଳନ କରାଯାଇଛି। କଳାକ୍ଷେତ୍ର ଓଡ଼ିଶା ଓ କଳାକ୍ଷେତ୍ର ଗ୍ରାମ ପକ୍ଷରୁ ପ୍ରଥମ ଥର ପାଇଁ ଏହି ଦୁର୍ଗମ ଅଞ୍ଚଳରେ ‘ରାଜ୍ୟସ୍ତରୀୟ ଲୋକକଳା ଦିବସ’ ଓ ‘ରଜ ମହୋତ୍ସବ’ର ସଫଳ ଆୟୋଜନ କରାଯାଇଛି। ଏହି ଭବ୍ୟ ମହୋତ୍ସବରେ ଲାଞ୍ଜିଗଡ଼ ବିଧାୟକ ଶ୍ରୀଯୁକ୍ତ ପ୍ରଦୀପ କୁମାର ଦିସାରି ମୁଖ୍ୟ ଅତିଥି ଭାବେ ଯୋଗଦେଇଥିଲେ। ସେ ସ୍ଥାନୀୟ ମହିଳା ଓ ଯୁବତୀମାନଙ୍କ ସହ ରଜଦୋଳି ଝୁଲିବା ସହ ପର୍ବର ଭରପୂର ଆନନ୍ଦ ନେଇଥିଲେ।
ଗ୍ରାମର ମହିଳା ଓ ଯୁବତୀମାନେ ନୂତନ ବସ୍ତ୍ର ପରିଧାନ କରିବା ସହ ପାରମ୍ପରିକ ଖାଦ୍ୟ ପ୍ରସ୍ତୁତ କରିଥିଲେ। ସମସ୍ତେ ମିଶି ଦୋଳି ଖେଳିବା ଏବଂ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମରେ ସାମିଲ ହୋଇଥିଲେ। ଏହି ପରିପ୍ରେକ୍ଷୀରେ ସମସ୍ତ ରଜ ପାଳନ କମିଟି ଏବଂ କୃତି ପ୍ରତିଯୋଗୀ ଝିଅମାନଙ୍କୁ ସମ୍ବର୍ଦ୍ଧନା ପତ୍ର ପ୍ରଦାନ କରି ଉତ୍ସାହିତ କରାଯାଇଥିଲା।
ଏହି ମହୋତ୍ସବର ଏକ ନିଆରା ଦିଗ ଥିଲା ବିଭିନ୍ନ ରାଜନୈତିକ ଦଳର ଏକତ୍ରୀକରଣ। ଦଳୀୟ ଆଭିମୁଖ୍ୟ ଭୁଲି ବିଜେଡି, BJP ଏବଂ କଂଗ୍ରେସର ଅନେକ ବରିଷ୍ଠ କର୍ମକର୍ତ୍ତା ଓ ନେତୃବୃନ୍ଦ ଏକାଠି ଏହି ଲୋକପର୍ବରେ ସାମିଲ ହୋଇଥିଲେ। ଜନପ୍ରତିନିଧି ଏବଂ ରାଜନେତାମାନେ ଏଭଳି ପର୍ବରେ ଯୋଗଦେବା ଦ୍ୱାରା ସାଧାରଣ ଜନତାଙ୍କ ସହ ସେମାନଙ୍କ ସାଂସ୍କୃତିକ ସମ୍ପର୍କ ଅଧିକ ସୁଦୃଢ଼ ହୋଇପାରିଛି। ଏହି କାର୍ଯ୍ୟକ୍ରମରେ ବିଶିଷ୍ଟ ଅତିଥି ଭାବେ କଳାକ୍ଷେତ୍ର ଜିଲା ଶାଖାର ମୁଖ୍ୟ ଉପଦେଷ୍ଟା ଡ଼ଃ. ଅଜୟ କୁମାର ମିଶ୍ର, ଜିଲା ସଂଯୋଜକ କରୁଣାକର ଦାସ, ସହ-ସଂଯୋଜକ ଅଜିତ କୁମାର ଦୁର୍ଗା, ବିଧାୟକଙ୍କ ବ୍ଲକ୍ ପ୍ରତିନିଧି ମାଣିକ୍ୟ ଚନ୍ଦ୍ର ନାଏକ ଏବଂ ସମଗୁଡ଼ାଠାରେ ପରମେଶ୍ୱର ନାଏକ ପ୍ରମୁଖ ଉପସ୍ଥିତ ଥିଲେ। ଏଥିସହିତ ପ୍ରସିଦ୍ଧ ଘୁମୁରା ଗୁରୁ କୈଳାଶ ଚନ୍ଦ୍ର ନାଏକ ଓ ସଂକୀର୍ତ୍ତନ ଗୁରୁ ଡମ୍ବରୁଧର ମହାଲିକ ମଧ୍ୟ ଗରିମାମୟ ଉପସ୍ଥିତି ଜାହିର କରିଥିଲେ।
ଆଦିବାସୀ ସଂସ୍କୃତି ମଧ୍ୟରେ ଓଡ଼ିଆ ଲୋକପରମ୍ପରାର ଏହି ମିଶ୍ରଣ ଏକ ନୂତନ ସାଂସ୍କୃତିକ ସେତୁ ସଦୃଶ ହୋଇଛି। ଗତ କିଛି ବର୍ଷ ହେବ ଏହି ଦୁର୍ଗମ ପାହାଡ଼ିଆ ଅଞ୍ଚଳରେ ରଜ ପର୍ବକୁ ନେଇ ବ୍ୟାପକ ଉତ୍ସାହ ପ୍ରକାଶ ପାଉଛି। ରଜ ଏବେ କେବଳ ଏକ ପରମ୍ପରା ହୋଇ ରହିନାହିଁ, ବରଂ ଦୁର୍ଗମ ଅଞ୍ଚଳରେ ଏହା ସାମାଜିକ ସଂହତି ଓ ସାଂସ୍କୃତିକ ଆଦାନ-ପ୍ରଦାନର ଏକ ପ୍ରମୁଖ ମାଧ୍ୟମ ପାଲଟିଛି।
