ବଞ୍ଚୋ, ୪।୮(ପ୍ରଦୋଷ ବିଶ୍ୱାଳ): ଆନନ୍ଦପୁର ଥାନା ଅନ୍ତର୍ଗତ ଶିବରାୟଣପୁର ଗ୍ରାମରେ ରାସ୍ତା ଅବରୋଧକୁ କେନ୍ଦ୍ର କରି ଘଟିଥିବା ମାରପିଟ୍ ଘଟଣାରେ ପୋଲିସ ବାପା ଓ ପୁଅଙ୍କୁ ଗିରଫ କରିଛି। ଗିରଫ ହୋଇଥିବା ଅଭିଯୁକ୍ତମାନେ ହେଲେ ସାଗର ଘଡ଼େଇ ଏବଂ ତାଙ୍କ ପୁଅ ଦୁଷ୍ମନ୍ତ ଘଡ଼େଇ। ଉଭୟଙ୍କର ଘର ଶିବରାୟଣପୁର ଗ୍ରାମରେ ବୋଲି ଜଣାପଡ଼ିଛି।
ପୋଲିସ ସୂଚନା ମୁତାବକ, ଗ୍ରାମର ଦିଲ୍ଲୀପ ମହାନ୍ତି ଗତ ଅଗଷ୍ଟ ୧ ତାରିଖ ରାତି ପ୍ରାୟ ୯ଟା ୩୦ ମିନିଟ୍ ସମୟରେ ଆନନ୍ଦପୁର ଥାନାରେ ଏକ ଲିଖିତ ଅଭିଯୋଗ କରିଥିଲେ। ଏହି ଅଭିଯୋଗକୁ ଆଧାର କରି ଆନନ୍ଦପୁର ଥାନାରେ କେସ୍ ନଂ-୨୨୩ (ତାରିଖ ୦୨.୦୮.୨୦୨୬) ଅନୁସାରେ ଭାରତୀୟ ନ୍ୟାୟ ସଂହିତା (BNS)ର ଧାରା ୧୨୬(୨), ୨୯୬, ୧୧୫(୨), ୩୫୧(୩) ଏବଂ ୩(୫) ଅଧୀନରେ ଏକ ମାମଲା ରୁଜୁ କରାଯାଇଥିଲା।
ତଦନ୍ତରୁ ଜଣାପଡ଼ିଛି ଯେ, ଅଭିଯୁକ୍ତମାନେ ନିୟମିତ ଭାବେ ରାସ୍ତା ଉପରେ ଟେଣ୍ଟ ହାଉସ୍ ସାମଗ୍ରୀ ଏବଂ ଏକ ମୋଟରସାଇକେଲ୍ ରଖି ରାସ୍ତାକୁ ଅବରୋଧ କରୁଥିଲେ। ଫଳରେ ଦିଲ୍ଲୀପ ମହାନ୍ତି ଓ ତାଙ୍କ ଭାଇ ସେହି ବାଟଦେଇ ଚାରିଚକିଆ ଗାଡ଼ିରେ ଯିବାରେ ଅସୁବିଧା ହୋଇଥିଲା। ସେମାନେ ରାସ୍ତା ଖାଲି କରିବାକୁ ଅନୁରୋଧ କରିବା ସହ ବାରମ୍ବାର କାହିଁକି ରାସ୍ତା ଅବରୋଧ କରାଯାଉଛି ବୋଲି ପ୍ରଶ୍ନ କରିଥିଲେ। ଏହାକୁ କେନ୍ଦ୍ର କରି ଉଭୟ ପକ୍ଷଙ୍କ ମଧ୍ୟରେ ବଚସା ହୋଇଥିବାବେଳେ ଅଭିଯୁକ୍ତମାନେ ଦିଲ୍ଲୀପ ମହାନ୍ତି ଓ ତାଙ୍କ ଭାଇଙ୍କୁ ମାରପିଟ୍ କରିଥିବା ପୋଲିସ ତଦନ୍ତରୁ ସ୍ପଷ୍ଟ ହୋଇଛି।
ଏହି ଘଟଣାରେ ପୋଲିସ ତଦନ୍ତ ଜାରି ରଖି ମଙ୍ଗଳବାର ଦିନ ସାଗର ଘଡ଼େଇ ଓ ଦୁଷ୍ମନ୍ତ ଘଡ଼େଇଙ୍କୁ ଗିରଫ କରି କୋର୍ଟ ଚାଲାଣ କରିଛି।
