ଫତେହପୁର,୨୩।୧୦: ଉତ୍ତର ପ୍ରଦେଶର ଫତେପୁର ଜିଲାରେ ଏକ ଅଭାବନୀୟ ଘଟଣା ଘଟିଛି। ପ୍ରେମିକାଙ୍କୁ ଭେଟିବାକୁ ଆସିଥିବା ପ୍ରେମିକଙ୍କୁ ଅତି ନିର୍ମମ ଭାବେ ପିଟିପିଟି ହତ୍ୟା କରାଯାଇଛି। ଆରପୁର ଗାଁରେ ଜଣେ ଯୁବକଙ୍କୁ ହତ୍ୟା କରିବା ପରେ ସମଗ୍ର ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି। ଏହି ମାମଲାରେ ଯୁବତୀଙ୍କ ବାପାଙ୍କ ସମେତ ୪ ଜଣଙ୍କ ବିରୋଧରେ ହତ୍ୟା ମାମଲା ରୁଜୁ ହୋଇଛି। କିନ୍ତୁ ଘଟଣା ପରଠାରୁ ସମସ୍ତ ଅଭିଯୁକ୍ତ ଘରେ ତାଲା ପକାଇ ଘଟଣାସ୍ଥଳରୁ ଫେରାର ଅଛନ୍ତି।
ଅରୁପୁର ଗ୍ରାମରେ ରହୁଥିବା ଅନିରୁଦ୍ଧ ନାମକ ଜଣେ ଯୁବକ ନିଜ ଗାଁର ଜଣେ ଯୁବତୀଙ୍କ ସହ ପ୍ରେମ ସମ୍ପର୍କ ରଖିଥିଲେ। ଘଟଣା ଦିନ ୨୫ ବର୍ଷୀୟ ଅନିରୁଦ୍ଧ ତାଙ୍କ ପ୍ରେମିକାଙ୍କୁ ଭେଟିବା ପାଇଁ ତାଙ୍କ ଘରେ ପହଞ୍ଚିଥିଲେ। ଅନିରୁଦ୍ଧ ଏକ କୋଠରୀରେ ତାଙ୍କ ପ୍ରେମିକାଙ୍କୁ ଭେଟୁଥିବାବେଳେ ହଠାତ୍ ଯୁବତୀଙ୍କ ପରିବାର ସଦସ୍ୟ ଦେଖିଦେଇଥିଲେ। ଏହାପରେ ସେମାନେ ଅନିରୁଦ୍ଧଙ୍କୁ ବାହାର କରି ଜୋରରେ ପିଟିଥିଲେ। ସେ ବାରମ୍ବାର କ୍ଷମା ମାଗିବାଥିଲେ ମଧ୍ୟ ଯୁବତୀଙ୍କ ପରିବାର ତାଙ୍କୁ ନିର୍ଦ୍ଦୟ ଭାବରେ ପିଟିଥିଲେ। ଯୁବକଙ୍କ ପରିବାରୟ ସୂଚନା ପାଇବା ପରେ ସଙ୍ଗେ ସଙ୍ଗେ ଘଟଣାସ୍ଥଳରେ ପହଞ୍ଚି ତାଙ୍କୁ ଉଦ୍ଧାର କରି ଜିଲା ଡାକ୍ତରଖାନାକୁ ନେଇଥିଲେ। ଚିକିତ୍ସା ସମୟରେ ତାଙ୍କର ମୃତ୍ୟୁ ଘଟିଥିଲା। ଅଭିଯୁକ୍ତଙ୍କୁ ଧରିବା ପାଇଁ ପୋଲିସ ଚେଷ୍ଟା କରୁଛି।
