ନୀଳଗିରି,୧୧।୧୧(ସ୍ବ.ପ୍ର.): ବାଲେଶ୍ୱର ଜିଲା ନୀଳଗିରି ବ୍ଲକ ଅଞ୍ଚଳରେ ଧାନ ଚାଷ ନଷ୍ଟ ହେବାକୁ ବସିଛି। ଏବେ ଧାନ ଗଛରୁ କେଣ୍ଡାଗୁଡ଼ିକ ବାହାରିଥିବା ବେଳେ ଚକଡ଼ା ଓ ଜଉଆ ରୋଗ ଦାଉ ସାଧିଛି। ସ୍ବଳ୍ପ ବୃଷ୍ଟି, ଲଘୁଚାପଜନିତ ବର୍ଷା ଓ ହାତୀମାନଙ୍କ କବଳରୁ ବହୁ କଷ୍ଟରେ ଫସଲ ବଞ୍ଚାଇ ଚାଷୀ ଅମଳ ପାଇଁ ଆଶା ରଖିଥିବା ବେଳେ ଏହି ରୋଗ ପୋକ ଦମନ କରିବା ସେମାନଙ୍କ ପକ୍ଷରେ କଷ୍ଟସାଧ୍ୟ ହୋଇପଡ଼ିଛି। ଚାଷୀମାନେ ଉଚ୍ଚ ଦରରେ କୀଟନାଶକ କିଣି ବାରମ୍ବାର ସିଞ୍ଚନ କରିଥିଲେ ମଧ୍ୟ କୌଣସି ସୁଫଳ ମିଳୁନାହିଁ। ବିଶେଷ କରି ନୀଳଗିରି ବ୍ଲକ ଧରମପୁର ପଞ୍ଚାୟତ ବାଂଶପାଳ ଗ୍ରାମରେ ଚକଡ଼ା ପ୍ରଭାବ ଦେଖାଦେଇଥିବାରୁ ବାଧ୍ୟ ହୋଇ ଚାଷୀମାନେ ଧାନଗଛକୁ ଜାଳିଦେଇଥିବା ଦେଖିବାକୁ ମିଳିଛି। ନୀଳଗିରି ଉପଖଣ୍ଡକୁ ମରୁଡି ଘୋଷଣା ଦାବିରେ ସିପିଆଇ, ନୀଳଗିରି ଅଞ୍ଚଳ କମିଟି ପକ୍ଷରୁ ଉପଜିଲାପାଳ ଦୀପ୍ତିରଞ୍ଜନ ସେଠୀଙ୍କୁ ଦାବିପତ୍ର ପ୍ରଦାନ କରାଯାଇଛି।
ଦାବିପତ୍ରରେ ଦର୍ଶାଯାଇଛି ଯେ, ନୀଳଗିରି ଉପଖଣ୍ଡ ଏକ ପାହାଡ଼ିଆ ଅଞ୍ଚଳ। ପଶ୍ଚିମରେ ଦେବଗିରି ପାହାଡ଼, କୁଲଡ଼ିହା ଅଭୟାରଣ୍ୟ, ବିଜ୍ଞାପିତ ଅଞ୍ଚଳକୁ ଲାଗି ସ୍ବର୍ଣ୍ଣଚୂଡ଼ ପର୍ବତ ରହିଛି। ପାହାଡ଼ ପର୍ବତରୁ ପାଣି ସମୁଦ୍ରରେ ମିଶେ। ମାତ୍ର ଉକ୍ତ ପାଣିକୁ ଅଟକାଇବା ଭଳି କୌଣସି ନଦୀବନ୍ଧ ଯୋଜନା ନାହିଁ। ଏହି ଉପଖଣ୍ଡର ଉତ୍ତରରେ ଟଙ୍ଗଣା, ସୋନ ଭଳି ନଦୀର ପାଣିକୁ ନେଇ ଚାଷରେ ବିନିଯୋଗ କରିବାର କୌଣସି ବ୍ୟବସ୍ଥା ନ ଥିବାରୁ ବର୍ଷାପାଣିକୁ ଭରସା କରି ଚାଷୀ ଗୋଟିଏ ଥର ଖରିଫ ଋତୁରେ ଧାନ ଚାଷ କରେ। ଦୀର୍ଘ ଏକ ମାସ ଧରି ବର୍ଷା ନ ହେବା ଯୋଗୁ ଚାଷୀର ଷୋଳପଣ ଆଶା ଆଜି ମରୁଡ଼ି ଗର୍ଭରେ। ପୁଣି ଜମି ପାହାଡ଼ କୋଳରେ ଝରଣା ପାଣିରେ ଯେଉଁ ଚାଷ ହୋଇଥିଲା, ତାହା ହାତୀ ଦ୍ୱାରା ସମ୍ପୂର୍ଣ୍ଣ ନଷ୍ଟ ହୋଇଛି। ଏବେ ଶୁଖିଲା ଧାନ କ୍ଷେତରେ ଚକଡ଼ା ପୋକ ଚାଷୀଙ୍କ ଦୁଃଖକୁ ଦ୍ୱିଗୁଣିତ କରିଛି। ଚାଷୀକୁଳକୁ ଉଦ୍ଧାର ପାଇଁ ସିପିଆଇ ପକ୍ଷରୁ ଦାବିପତ୍ର ଦିଆଯାଇ ସମାଧାନ କରିବାକୁ ଦାବି ହୋଇଛି। ଦାବିଗୁଡ଼ିକୁ ଯୁଦ୍ଧକାଳୀନ ଭିତ୍ତିରେ କାର୍ଯ୍ୟକାରୀ କରା ନ ଗଲେ ଚାଷୀମାନଙ୍କ ସୁରକ୍ଷା ପାଇଁ ଦଳ ଆଗାମୀ ସପ୍ତାହରେ ରାଜରାସ୍ତାକୁ ଓହ୍ଲାଇବ ବୋଲି ଚେତାବନୀ ଦେଇଛି। ଦାବିପତ୍ର ପ୍ରଦାନ ବେଳେ ସିପିଆଇର ଜିଲା ସେକ୍ରେଟାରୀ ନିରଞ୍ଜନ ବାରିକଙ୍କ ସହ ଶତାଧିକ ଚାଷୀ ଉପସ୍ଥିତ ଥିଲେ।
