କେସିଙ୍ଗା,୬।୪(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ବ୍ଲକ ଅନ୍ତର୍ଗତ ଶିରୋଲ ଗ୍ରାମ ପଞ୍ଚାୟତରେ ଚାଷୀଙ୍କ ସୁବିଧା ପାଇ ଗତ ୨୩-୨୪ ଆର୍ଥିକ ବର୍ଷରେ ଖଳା ନିର୍ମାଣ ପାଇଁ ଜିଲା ଗ୍ରାମ୍ୟ ଉନ୍ନୟନ ବିଭାଗ କଳାହାଣ୍ଡି ପକ୍ଷରୁ ୭ଲକ୍ଷ୩୨ ହଜାର ଟଙ୍କା ମଞ୍ଜୁର ହୋଇଥିଲା। ଏଥିପାଇଁ କେସିଙ୍ଗା ପଞ୍ଚାୟତ ସମିତିର କାର୍ଯ୍ୟ ନିର୍ବାହୀ ସଂସ୍ଥା ପକ୍ଷରୁ କାର୍ଯ୍ୟ କରିବା କଥା, କିନ୍ତୁ ଶିରୋଲ ଗ୍ରାମ ଜଣେ ଠିକାଦାରଙ୍କୁ ଉକ୍ତ ଧାନ ଖଳା ନିର୍ମାଣ ପାଇଁ ଦାୟିତ୍ୱ ଦିଆଯାଇଥିଲା। ଏହି ଖଳା ନିର୍ମାଣ କାର୍ଯ୍ୟ ସଂପୂର୍ଣ୍ଣ ହୋଇଥିଲେ ଶିରୋଲ ଗ୍ରାମର ପ୍ରାୟ ଶାତାଧିକ ଚାଷୀ ଧାନ କାଟି ଏହି ଖଳାରେ ରଖି ଧାନ ମଡ଼ାଇ ସୁବିଧାରେ ଘରକୁ ନେଇ ପାରିବେ। କିନ୍ତୁ ଠିକାଦାର ଜଣଙ୍କ ଖଳାର ଚତୁଃପାର୍ଶ୍ୱରେ ସିମେଣ୍ଟର ଫାଉଣ୍ଡେଶନ ଉଠାଇ ନିରବ ରହିଗଲେ। ଖଳା ଉପରେ ଆଉ କଂକ୍ରିଟ କରିଲେ ନାହିଁ। ଯାହା ଫଳରେ ଦୀର୍ଘ ୩ବର୍ଷ ହେଲା ଅର୍ଦ୍ଧନିର୍ମିତ ଅବସ୍ଥାରେ ପଡିରହିଛି। ଆଜିହେବ କାଲି ହେବ ବୋଲି ଯେଉଁ ଆଶା କରିଥିଲେ ତାହା ସମ୍ପୂର୍ଣ୍ଣ ନ ହେବାରୁ ଚାଷୀ ମନରେ ଅସନ୍ତୋଷ ହେବା ସହ ବହୁତ ହଇରାଣ ହେଉଛନ୍ତି। ବ୍ଲକ ପ୍ରଶାସନର ଉଦାସୀନତା ଯୋଗୁ ଖଳା କାମ ନିର୍ମାଣ ନ ହୋଇ ଆଜକୁ ୩ବର୍ଷ ବିତିଗଲାଣି ଅର୍ଦ୍ଧ ନିର୍ମିତ ଅବସ୍ଥାରେ ପଡି ରହିଛି । ଏହି ଖଳା ନିର୍ମାଣ ସମ୍ପୁର୍ଣ୍ଣ ହେଲେ ଶିରୋଲ ଗ୍ରାମର ଶାତାଧିକ ଚାଷୀ ଧାନ ରଖି ମଡ଼ାଇ ଘରକୁ ନେବାରେ ସୁବିଧା ହୋଇଥାନ୍ତା। ଶିରୋଲ ଗ୍ରାମରୁ ପ୍ରାୟ ଦେଢ଼ କିମି ଦୂରରେ ଏହି ଖଳା ନିର୍ମାଣ ପାଇଁ ଜାଗା ନିରୂପଣ କରାଯାଇଛି। ଖଳାର ଚତୁଃପାର୍ଶ୍ୱରେ ଚାଷ ଜମି ଥିବାରୁ ଚାଷୀଙ୍କ ସୁବିଧା ହେବା ପାଇଁ ଏହି ଖଳାନିର୍ମାଣ ପାଇଁ ଶିରୋଲ ଗ୍ରାମର ଜଣେ ଠିକାଦାରଙ୍କୁ ଦାୟିତ୍ୱ ଦିଆଯାଇଥିଲା। କିନ୍ତୁ ଚାଷୀମାନେ ୩ବର୍ଷ ହେଲା ବ୍ଲକ ପ୍ରଶାସନକୁ ଅଭିଯୋଗ କରିଥିଲେ ସୁଦ୍ଧା ଆଜି ଯାଏ ଉକ୍ତ ଖଳାଟି ସମ୍ପୂର୍ଣ୍ଣ ହୋଇ ନ ଥିବାରୁ ଚାଷୀମନରେ ଅସନ୍ତୋଷ ହେବା ସହ ବହୁତ ହଇରାଣ ହରକତ ହୋଇ ଆସୁଛନ୍ତି । ଏ ସଂକ୍ରାନ୍ତରେ ଯେଉଁ ଯନ୍ତ୍ରୀ ଦାୟିତ୍ୱରେ ଥିଲେ ସେ ହେଉଛନ୍ତି ତ୍ରିଲୋଚନ ବେହେରା।ତାଙ୍କୁ ପଚାରିବାରୁ ଠିକାଦାର କାମ ନ କରିବାରୁ ଅଦ୍ଧନିର୍ମିତ ଅବସ୍ଥାରେ ପଡି ରହିଛି ଏବଂ ବିଲ ମଧ୍ୟ କରାଯାଇ ନାହିଁ ବୋଲି ପ୍ରକାଶ କରିଥିଲେ। ତେଣୁ ଚାଷୀଙ୍କ ଦାବି ମୁତାବକ ଅନ୍ୟ ଠିକାଦାରଙ୍କୁ ଖଳା ନିର୍ମାଣ ଦାୟିତ୍ୱ ଦିଆଯାଉ ବୋଲି ଚାଷୀମାନେ ବିଡିଓ ନିକଟରେ ଦାବି କରିଛନ୍ତି।
