ବଞ୍ଚୋ,୧୭ା୩(ପ୍ରଦୋଷ କୁମାର ବିଶ୍ୱାଳ): ଆନନ୍ଦପୁର କ୍ଷୁଦ୍ରଜଳସେଚନ ଅଧୀନ ପାଇକଚାଟ୍ରା କ୍ଷୁଦ୍ର ଜଳସେଚନ ପ୍ରକଳ୍ପ ନେଇ ଗୁରୁତର ଅନିୟମିତତା ଅଭିଯୋଗ ସାମ୍ନାକୁ ଆସିଛି। ପାଣି ପଞ୍ଚାୟତ ଗଠନରେ ଅଣଚାଷୀମାନଙ୍କୁ ସମ୍ମିଳିତ କରାଯାଇଥିବା ନେଇ ସ୍ଥାନୀୟ ଚାଷୀ ଓ ଗ୍ରାମବାସୀ ଆନନ୍ଦପୁର ଉପଜିଲାପାଳଙ୍କ ନିକଟରେ ଅଭିଯୋଗ କରିଛନ୍ତି।
ଅଭିଯୋଗରେ ଦର୍ଶାଯାଇଛି ଯେ, ପାଣି ପଞ୍ଚାୟତର କେତେଜଣ ସଦସ୍ୟ ନିଜେ ଚାଷୀ ନୁହନ୍ତି, ତଥାପି ସେମାନେ ନାବାର୍ଡ ମଞ୍ଜୁରୀପ୍ରାପ୍ତ ଟେଣ୍ଡର କାମରେ ଜଡିତ ରହିଛନ୍ତି। ଏହାଦ୍ୱାରା ପ୍ରକଳ୍ପର ଅର୍ଥର ଅପବ୍ୟୟ ହେବା ସହ ଚାଷୀମାନେ ଯଥୋଚିତ ସୁବିଧାରୁ ବଞ୍ଚିତ ହେବାର ଆଶଙ୍କା ପ୍ରକାଶ କରିଛନ୍ତି।
ବେଆଇନ ଭାବେ ଗଠିତ ପାଣି ପଞ୍ଚାୟତକୁ ତୁରନ୍ତ ରଦ୍ଦ କରାଯାଇ ସ୍ଥାନୀୟ କୃଷକମାନଙ୍କ ସମ୍ମତିରେ ନୂତନ ପାଣିପଞ୍ଚାୟତ ଗଠନ କରାଯିବା ଲାଗି ଗୌରାଙ୍ଗ ବାରିକ, ବଟକୃଷ୍ଣ ରାଉତ, ଅନନ୍ତ ଚରଣ ରାଉତ, ପ୍ରତାପ ମାଝିଙ୍କ ସହ ଅନ୍ୟ ଗ୍ରାମବାସୀ ଦାବି କରିଛନ୍ତି।
ଏହି ସମ୍ପର୍କରେ ଜଳସମ୍ପଦ ବିଭାଗର ଅଧିକାରୀ ଦେବେନ୍ଦ୍ର ଜରିଆ ଓ ଆନନ୍ଦପୁର ଉପଜିଲାପାଳ ନୀଳମାଧବ ସୁନାଙ୍କୁ ପଚାରିବାରୁ ଘଟଣାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି।
